ଅମୃତସର,୨୧।୨: ମତଦାନ ହେଉଛି ପ୍ରତ୍ୟେକ ଭାରତୀୟ ନାଗରୀକଙ୍କ ମୌଳିକ ଅଧିକାର। ମତଦାନ ଯେତିକି ଆବଶ୍ୟକ ଏହାର ଗୋପନୀୟତା ରକ୍ଷା କରିବା ମଧ୍ୟ ସେତିକି ଜରୁରୀ। ରବିବାର ପଞ୍ଜାବରେ ଶେଷ ହୋଇଛି ପ୍ରଥମ ପର୍ଯ୍ୟାୟ ଭୋଟ ଗ୍ରହଣ । ସକାଳୁ ଭୋଟ ଦେବା ପାଇଁ ଅମୃତସର ପୋଲିଂ ବୁଥ୍ରେ ପହଞ୍ଚିଥିଲେ ଯମଜ ସୋହନ ଏବଂ ମୋହନ। ଦୁହେଁ ଯମଜ ହେବା ସତ୍ତ୍ୱେ ସେମାନଙ୍କ ଭୋଟ ଦୁଇଟି । ଗୋପନୀୟତା ରକ୍ଷା ଦୃଷ୍ଟିରୁ ଦୁହିଁଙ୍କ ଭୋଟ ଗ୍ରହଣ ବେଳର ଭିଡିଓ ତିଆରି କରିବା ପାଇଁ ପ୍ରଶାସନିକ ଅଧିକାରୀଙ୍କୁ ନିର୍ବାଚନ କମିଶନର ନିର୍ଦ୍ଦେଶ ଦେଇଥିଲେ। ଗୋପନୀୟତାକୁ କେନ୍ଦ୍ର କରି ସେମାନଙ୍କ ମତଦାନର ଭିଡିଓ ହେବା ସହ ଦୁଇ ଭାଇଙ୍କୁ ଚଷମା ପିନ୍ଧା ଯାଇଥିଲା, ଯେମିତି କେହି କାହାର ଭୋଟ ଦେଖି ନ ପାରିବେ।
୧୯ ବର୍ଷୀୟ ସୋହନ ଗତବର୍ଷ ଡିସେମ୍ବର ୨୦ ତାରିଖରେ ବିଦ୍ୟୁତ ବିଭାଗରେ ଚାକିରି ପାଇଥିଲେ। ଦୁହିଁଙ୍କ ଶରୀର ପରସ୍ପର ସହ ସଂଲଗ୍ନ ଥିବାରୁ ସୋହନ ଚାକିରି କରୁଥିବାବେଳେ କାମରେ ମୋହନ ତାଙ୍କୁ ସାହାଯ୍ୟ କରନ୍ତି। ୨୦୦୩ ଜୁନ୍ ୧୪ ତାରିଖରେ ରାଜଧାନୀ ଦିଲ୍ଲୀରେ ଜନ୍ମ ହୋଇଥିଲେ ସୋହନ-ମୋହନ। ସେମାନଙ୍କ ଶରୀରରେ ଦୁଇଟି ହୃତପିଣ୍ଡ, ବୃକକ, ମେରୁଦଣ୍ଡ ଥିବାବେଳେ ଦୁଇ ଭାଇ ଗୋଟିଏ ଯକୃତ ସାହାଯ୍ୟରେ ଜୀବିତ ଅଛନ୍ତି।
