ଟୋକିଓ, ୨୮ା୭ (ଏପି)- ବ୍ରିଟେନର ଟମ୍ ଡିନ୍ ଥରେ ନୁହେଁ ଦୁଇଥର କରୋନା ସଂକ୍ରମିତ ହୋଇ ମଧ୍ୟ ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣ ଜିତିବାରେ ସମର୍ଥ ହୋଇଛନ୍ତି। ମଙ୍ଗଳବାର ସେ ପୁରୁଷ ୨୦୦ ମିଟର ଫ୍ରିଷ୍ଟାଇଲ ସନ୍ତରଣରେ ସ୍ବର୍ଣ୍ଣ ଜିତିଛନ୍ତି।
ଡିନ୍ କହିଛନ୍ତି ତାଙ୍କ ଜୀବନର ଏହା ହେଉଛି ସବୁଠାରୁ ବଡ଼ ସଫଳତା। ତାଙ୍କ ଦେଶର ଅନ୍ୟ ଜଣେ ପ୍ରତିଯୋଗୀ ଡନ୍କାନ୍ ସ୍କଟ୍ ରୌପ୍ୟ ପଦକ ଲାଭ କରିଛନ୍ତି। ବ୍ରିଟେନ ଦୀଘର୍ର୍ ୧୦୦ରୁ ଅଧିକ ବର୍ଷ ପରେ ସନ୍ତରଣ ପ୍ରତିଯୋଗିତାର କୌଣସି ଇଭେଣ୍ଟରେ ପ୍ରଥମ ଓ ଦ୍ୱିତୀୟ ସ୍ଥାନ ଅଧିକାର କରିପାରିଛି। ଦେଶ ପୂର୍ବରୁ ଏହ ସଫଳତା ୧୯୦୮ ଲଣ୍ଡନ ଗେମ୍ସରେ ହାସଲ କରିଥିଲା। ଡିନ୍ ୪ ମାସ ମଧ୍ୟରେ ଦ୍ୱିତୀୟ ଥର କରୋନା ସଂକ୍ରମିତ ହୋଇଥିଲେ। ତାଙ୍କର ଅହରହ କାଶ ହେଉଥିଲା। ଫୁସ୍ଫୁସ୍ କ୍ଷତିଗ୍ରସ୍ତ ହୋଇଥିଲା। ଜାନୁୟାରୀରେ ସେ ସନ୍ତରଣ କରିପାରିବେ କି ନା ତାଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା। ତାଭ୍କୁ ଟ୍ରେନିଂ ବନ୍ଦ କରିବାକୁ ହୋଇଥିଲା। ନିଜ ଆପାର୍ଟମେଣ୍ଟରେ କ୍ୱାରାଣ୍ଟାଇନ୍ରେ ରହିବାକୁ ହୋଇଥିଲା। ଆଉ ୩ ମାସ ପରେ ଅର୍ଥାତ ଏପ୍ରିଲ ଟ୍ରାଏଲ୍ସ ହେବାରୁ କାର୍ଯ୍ୟକ୍ରମ ରହିଥିଲା। ଅଲିମ୍ପକ ସ୍ବର୍ଣ୍ଣ ତ ଦୂରୁହ ବ୍ୟାପାର। ଟୋକିଓ ଅଲିମ୍ପିକ୍ସ ପାଇଁ ପ୍ରସ୍ତୁତି ବେଳେ ମହାମାରୀ କିପରି ବାଧା ସୃଷ୍ଟି କରିଥିଲା। ବହୁ ଅଲିମ୍ପିଆଙ୍କଠାରୁ ଅନେକ କଥା ଶୁଣିବାକୁ ମିଳେ। ମାତ୍ର ଡିନ୍ ଦୁଇଥର ଗୁରୁତର ଭାବେ ସଂକ୍ରମିତ ହୋଇଛନ୍ତି। ସୁସ୍ଥ ହେବା ପରେ ସେ ଏତେଟା ଦୁର୍ବଳ ହୋଇ ପଡ଼ିଥିଲେ ଯେ, ୬ ସପ୍ତାହ ଧରି ସନ୍ତରଣାଗାରକୁ ଯାଇ ପାରି ନ ଥିଲେ। ଅଲିମ୍ପିକ୍ସ ଟ୍ରାଏଲ ବେଳକୁ ସେ ଫିଟ୍ ହୋଇପାରିବେ କି ନା ସେ ନେଇ ତାଙ୍କର ସନ୍ଦେହ ରହିଥିଲା। କିନ୍ତୁ କୋଚ୍ ଡେଭିଡ ମ୍ୟାକ୍ନଲ୍ଟିଙ୍କ ଯୋଗୁ ସେ ପ୍ରଥମ ଥର ପାଇଁ ଅଲିମ୍ପିକ୍ସରେ ଭାଗ ନେଇ ପାରିଲେ ବୋଲି ୨୧ ବର୍ଷୀୟ ଡିନ୍ କହିଛନ୍ତି। ଡିନ୍ଙ୍କ ବିଜୟ ଗ୍ରେଟ୍ ବ୍ରିଟେନ ଟିମ୍କୁ ଆଶ୍ଚର୍ଯ୍ୟ ଚକିତ କରିଥିଲା। କାରଣ ସମସ୍ତେ ସ୍କଟ ସ୍ବର୍ଣ୍ଣ ଜିତିବେ ବୋଲି ଆଶା କରୁଥିଲେ। ମାତ୍ର ଡିନ୍ ଅଳ୍ପକେ ଆଗରେ ରହି ପ୍ରଥମ ହେବା ସହ ସ୍କଟଙ୍କ ଦ୍ୱାରା ପ୍ରତିଷ୍ଠା ବ୍ରିଟିଶ ରେକର୍ଡକୁ ସେ ଭଙ୍ଗ କରିଦେଇଥିଲେ।
