ଅଙ୍କାରା,୧୨ ।୨: ତୁର୍କୀ ଓ ସିରିଆରେ ଆସିଥିବା ଚଳିତ ଦଶନ୍ଧିର ସବୁଠାରୁ ବିନାଶକାରୀ ଭୂକମ୍ପରେ ଏବେ ସୁଦ୍ଧା ୨୫,୦୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇ ସାରିଲାଣି । ହେଲେ ଏହାରି ଭିତରେ ୧୨୨ ଘଣ୍ଟା ପରେ ୩ ଜଣ ମହିଳାଙ୍କୁ ଜୀବନ୍ତ ଉଦ୍ଧାର କରିବା କୌଣସି ଚମତ୍କାରଠାରୁ କମ ନୁହେଁ ବୋଲି କୁହାଯାଉଛି । ଏମାନେ ହେଉଛନ୍ତି ୭୦ ବର୍ଷୀୟା ମେନେକସେ ତବକ, ୫୫ ବର୍ଷୀୟା ମସଲଲ୍ଲାହ ସିସେକ ଓ ତୃତୀୟ ଜଣକ ୪୦ ବର୍ଷୀୟା ଜେନେପ କହରାମନ । ତେବେ ଜେନେପଙ୍କୁ ସର୍ବ ପ୍ରଥମେ ୧୦୪ ଘଣ୍ଟା ପରେ କୋଠାର ଭଗ୍ନାବଶେଷ ମଧ୍ୟରୁ ଉଦ୍ଧାର କରାଯାଇଥିଲା । ଏମାନଙ୍କୁ ଉଦ୍ଧାର କରି ତୁରନ୍ତ ଚିକିତ୍ସା କରାଯାଇଛି । ଜେନେପଙ୍କୁ ଉଦ୍ଧାର କରିବା ପରେ ତାଙ୍କ ସାନ ଭଉଣୀ ଆତ୍ମହରା ହୋଇ ଉଦ୍ଧାରକାରୀ ଦଳର ସଦସ୍ୟ ଷ୍ଟିଭନ ବାୟରଙ୍କୁ ଆଲିଙ୍ଗନ କରିଥିଲେ ଆଉ କହିଥିଲେ ମୁଁ ଚମତ୍କାରରେ ବିଶ୍ୱାସ କରୁଛି । ପ୍ରକୃତରେ ଏତେ ଘଣ୍ଟାପରେ ଜୀବନ୍ତ ଉଦ୍ଧାର ହେବା ଏକ ଚମତ୍କାର । ଏବେ ଭାରତୀୟ ଉଦ୍ଧାରକାରୀ ଦଳଙ୍କୁ ସାରା ବିଶ୍ୱରେ ପ୍ରଶଂସା କରାଯାଉଛି ।
ତୁର୍କୀ ଓ ସିରିଆରେ ଆସିଥିବା ଭୂକମ୍ପର କିଛି ଛାତିଥରା ଦୃଶ୍ୟ ଭିତରେ ଏମିତି କିଛି ଦୃଶ୍ୟ ସାମ୍ନାକୁ ଆସୁଛି ଯାହା ଆଖିରେ ଆନନ୍ଦାଶ୍ରୁ ଭରି ଦେଉଛି । ଟନ ଟନ ଭଙ୍ଗା ଘର ତଳୁ ଏବେ ଜଣେ ୧୦ ଦିନର ନବଜାତ ଶିଶୁକୁ ଉଦ୍ଧାର କରାଯାଇଛି । ହାତେର ଦକ୍ଷିଣ ଅଞ୍ଚଳରେ ୧୦ ଦିନର ଏହି ନବଜାତ ଓ ତାଙ୍କ ମାଆଙ୍କୁ ଭୂକମ୍ପର ୯୦ ଘଣ୍ଟା ପରେ ଜୀବନ୍ତ ଉଦ୍ଧାର କରାଯାଇଥିଲା । ଏବେ ଜୀବନ୍ତଙ୍କ ସଂଖ୍ୟା କମ ହେବାରେ ଲାଗିଛି ।
