ଚେନ୍ନାଇ,୧୩।୫(ପି.ଟି.): ସମ୍ମାନଜନକ ଅର୍ଜୁନ ପୁରସ୍କାର ଜିତିଥିତ୍ବା ଭାରତୀୟ ଟେବୁଲ ଟେନିସ ଖେଳାଳି ଭି. ଚନ୍ଦ୍ରଶେଖର ୬୪ ବର୍ଷ ବୟସରେ ପରଲୋକ ଗମନ କରିଛନ୍ତି। କୋଭିଡ୍-୧୯ ସଂକ୍ରମଣ କାରଣରୁ ଏକ ସ୍ଥାନୀୟ ପ୍ରାଇଭେଟ ହସ୍ପିଟାଲରେ ତାଙ୍କର ଦେହାନ୍ତ ହୋଇଛି ବୋଲି ତାଙ୍କ ପରିବାର ତରଫରୁ କୁହାଯାଇଛି।
ମୃତ୍ୟୁ ବେଳକୁ ତାଙ୍କ ପାଖରେ ପୁଅ ଓ ସ୍ତ୍ରୀ ରହିଥିଲେ। ଚନ୍ଦ୍ରା ଭାବେ ଲୋକପ୍ରିୟ ଥିବା ଏହି ପୂର୍ବତନ ଖେଳାଳି ୩ଥର ଜାତୀୟ ଚାମ୍ପିୟନ ହେବାର ଗୌରବ ଅର୍ଜନ କରିଛନ୍ତି। ସେ ଚେନ୍ନାଇସ୍ଥିତ ତାମିଝାଗା ଟେବୁଲ ଟେନିସ ଆସୋସିଏଶନର ଅଧ୍ୟକ୍ଷ ଓ ଏସ୍ଡିଏଟି- ମେଡିମିକ୍ସ ଟିଟି ଏକାଡେମୀର ନିର୍ଦ୍ଦେଶକ ଏବଂ ହେଡ୍ କୋଚ୍ ରହିଥିଲେ। ଚେନ୍ନାଇ ଜନ୍ମିତ ଚନ୍ଦ୍ରଶେଖର ୧୯୮୨ ରାଜ୍ୟଗୋଷ୍ଠୀ କ୍ରୀଡ଼ା ସେମିଫାଇନାଲରେ ପ୍ରବେଶ କରିଥିଲେ। ଇଞ୍ଜୁରି କାରଣରୁ ସେ ୧୯୮୩ରେ ଅବସର ନେଇଥିଲେ। ତେବେ କୋଚ୍ ଭାବେ ସେ ବେଶ୍ ସଫଳ ରହିଥିଲେ। ତାଙ୍କ ଦେହାନ୍ତରେ ଟିଟି ଖେଳାଳି ଶରଥ କମଲ, ଜି. ସାଥିୟଁା, ଏସ. ରମଣ ଓ ଏମ୍.ଏସ୍. ମିଥିଲି ଶୋକ ପ୍ରକାଶ କରିଛନ୍ତି। ସାରା ଟିଟି ଜଗତ ମଧ୍ୟ ତାଙ୍କ ଦେହାନ୍ତରେ ଶୋକ ଜାହିର କରିଛି।
