କେନ୍ଦ୍ରାପଡ଼ା ଅଫିସ/ ଚଣ୍ଡିଖୋଲ,୨୫ା୭(ଡି.ଏନ.ଏ.): ହରିଦାସପୁର-ପାରାଦୀପ ନୂଆ ବ୍ରଡ୍ଗେଜ୍ ରେଳପଥରେ ଶୁକ୍ରବାର ପ୍ରଥମଥର ପାଇଁ ବିଦ୍ୟୁତ୍ ଚାଳିତ ଟ୍ରେନର ଟ୍ରାଏଲ ରନ ହୋଇଛି। ଏଥିରେ ପୂର୍ବତଟ ରେଳପଥର ବରିଷ୍ଠ ଅଧିକାରୀଙ୍କ ସହ ବିଭିନ୍ନ ବିଭାଗର ଅଧିକାରୀମାନେ ହରିଦାସପୁରଠାରୁ ପାରାଦୀପ ପର୍ଯ୍ୟନ୍ତ ଯାଇଥିଲେ। ୨୦୧୯ ଜୁନ ୨୯ରେ ପ୍ରଥମେ ଟାୱାର କାର କେନ୍ଦ୍ରାପଡ଼ା ଷ୍ଟେଶନ ପର୍ଯ୍ୟନ୍ତ ଆସିଥିଲା। ପୂର୍ବତଟ ରେଳ ବିଭାଗ ମୁଖ୍ୟ ସୁରକ୍ଷା ଅଧିକାରୀ ଶୈଲେନ୍ଦ୍ର କପିଲ, ରେଳବିକାଶ ନିଗମ ଲିମିଟେଡର କାର୍ଯ୍ୟନିର୍ବାହୀ ନିର୍ଦ୍ଦେଶକ ସରୋଜ କାନ୍ତ ପାତ୍ର, ମୁଖ୍ୟ ଟ୍ରାକ ଇଞ୍ଜିନିୟର ଜଗନ୍ନାଥ ପରିଡା, ମୁଖ୍ୟ ବ୍ରିଜ୍ ଇଞ୍ଜିନିୟର କେ.ଜି ଅଗ୍ରୱାଲ, ସିଗନାଲ ଇଞ୍ଜିନିୟର ଭି. ସୋରେନ, ରେଳ ବିକାଶ ନିଗମ ଲିମିଟେଡର ଡିଜିଏମ୍ ଆର୍.ପି. ପାଣ୍ଡେ, ଅଶୋକ କୁମାର ତ୍ରିପାଠୀ, ଶ୍ରୀନିବାସ ସାହୁ, ଏସ୍ଏକେବାସା, ଏସ୍.କେ. ପାତ୍ର, ପିକେ ମହାନ୍ତି, ଏସ୍.କେ. ପୁରୋହିତ, ରାଜେନ୍ଦ୍ର ଧମ୍ବେଲ, ଡି.ପି. ଦାଶ ପ୍ରମୁଖ ଟ୍ରେନରେ ଯାତ୍ରା କରିଥିଲେ। ଆସନ୍ତା ଅଗଷ୍ଟ ସୁଦ୍ଧା କେନ୍ଦ୍ରାପଡ଼ା ଜିଲା ମଧ୍ୟଦେଇ ରେଳ ଚାଲିବା ସମ୍ଭାବନା ରହିଛି।
ବୁଦ୍ଧିଜୀବୀ ପ୍ରଶାନ୍ତ ନାୟକ କୁହନ୍ତି, ଆମ କେନ୍ଦ୍ରାପଡାବାସୀଙ୍କ ପାଇଁ ଏହା ଏକ ଐତିହାସିକ ଦିନ। ଜିଲାକୁ ପ୍ରଥମଥର ପାଇଁ ରେଳ ଇଞ୍ଜିନ ଗଡିଥିବାରୁ ଦୀର୍ଘ ୨୨ବର୍ଷର ସ୍ବପ୍ନ ପୂରଣ ହେବାକୁ ଯାଉଛି। ସାମାଜିକ କର୍ମୀ ସମୀର ଚାନ୍ଦ କୁହନ୍ତି, ରେଳ ଗଡିଲେ କେନ୍ଦ୍ରାପଡା ଜିଲାର ବିକାଶ ନିଶ୍ଚିତ ହେବ। ଶିଳ୍ପୋଦ୍ୟୋଗୀମାନେ କଞ୍ଚାମାଲ ନେବାଆଣିବା ଅସୁବିଧାକୁ ଦୃଷ୍ଟିରେ ରଖି ଜିଲାରେ ଶିଳ୍ପ ପ୍ରତିଷ୍ଠା ପାଇଁ ଆଗ୍ରହ ପ୍ରକାଶ କରୁ ନ ଥିଲେ। ଏବେ ଏହା ସମ୍ଭବ ହେବ। କୃଷକ ନେତା ବିଧୁଭୂଷଣ ମହାପାତ୍ର କୁହନ୍ତି, ରେଳ ଆସିବାକୁ ସ୍ବାଗତ କରୁଛି। ତେବେ ରେଳପଥ ପାଇଁ ଭୋଗୁଥିବା ଚାଷୀଙ୍କ ଯନ୍ତ୍ରଣାକୁ ଭୁଲିବା କଷ୍ଟ। ଫାଟକ ବିହୀନ ରେଳପଥ ନିର୍ମାଣ ପାଇଁ ବହୁ କ୍ଷେତରୁ ମାଟି ଉଠାଯାଇଛ। ଫଳରେ ସାମାନ୍ୟ ବର୍ଷାରେ କ୍ଷେତରେ ହୋଇଥିବା ଗାଢ଼ରେ ପାଣି ଜମିରହି ନଷ୍ଟ ହେଉଛି। ସେହିପରି ରେଳପଥ ନିର୍ମାଣ ସମୟରେ ଜିଲା ପ୍ରଶାସନ ଓ ରେଳପଥ ବିଭାଗ କାର୍ଯ୍ୟକର୍ତ୍ତାଙ୍କୁ ବାରମ୍ବାର ସାଇଫନ ନିର୍ମାଣ ପାଇଁ ଅନୁରୋଧ ସତ୍ତ୍ୱେ ଜଳ ନିଷ୍କାସନ ବ୍ୟବସ୍ଥା କରାଗଲା ନାହିଁ। ସହରର ଲକ୍ଷ୍ମୀକାନ୍ତ ନାୟକ କୁହନ୍ତି, ରେଳପଥ ନିର୍ମାଣ ସମୟରେ ବହୁ ଜମି ଚାଲିଯାଇଛି। ତେବେ ଉପଯୁକ୍ତ ମୂଲ୍ୟ ଅଦ୍ୟାବଧି ମିଳିନାହିଁ। ଏ ନେଇ ମାମଲା ଚାଲିଛି। ତେବେ ରେଳ ଚଳାଚଳକୁ ସେ ସ୍ବାଗତ କରିଛନ୍ତି।
