ଓ୍ବାଶିଂଟନ୍, ୨୨।୨: ମହାକାଶରେ ବିନା ମାଟିରେ ଗଛ ଲାଗିବ। ଏହି ଗବେଷଣା ନିମନ୍ତେ ଆମେରିକା ମହାକାଶ ଗବେଷଣା ସଂସ୍ଥା ନାସା ନର୍ଥରୋପ୍ ଗ୍ରୁମ୍ମ୍ୟାନ୍(ଏନ୍ଜି)ର ସିଗ୍ନସ୍ ସ୍ପେସ୍କ୍ରାଫ୍ଟକୁ ଅନ୍ତର୍ଜାତୀୟ ସ୍ପେସ୍ ଷ୍ଟେଶନ (ଆଇଏସ୍ଏସ୍)କୁ ପଠାଇଛି। ଏଥିରେ ପ୍ରାୟ ୩,୭୬୪ କେ.ଜିର କାର୍ଗୋ ରହିଥିବାବେଳେ ସୋମବାର ତାହା ଆଇଏସ୍ଏସ୍ରେ ପହଞ୍ଚିଛି। ଏଥିରେ ମହାକାଶଚାରୀଙ୍କ ନିମନ୍ତେ ସ୍ନାକ୍ସ ରହିବା ସହ ଅନ୍ୟାନ୍ୟ ବୈଜ୍ଞାନିକ ସାମଗ୍ରୀ ପଠାଯାଇଛି। ମହାକାଶରେ ବିନା ମାଟିରେ ଗଛ ଲଗାଯିବା, ସ୍ତନ ଓ ପ୍ରୋଷ୍ଟେଟ୍ କ୍ୟାନ୍ସର ସେଲ ଉପରେ ଏକ ଡ୍ରଗ୍ସର ପ୍ରଭାବ ଏବଂ ଅତ୍ୟଧିକ ତାପମାତ୍ରାରେ ଲିଥିୟମ-ଆୟନ ସେକେଣ୍ଡାରୀ ବ୍ୟାଟେରିର କ୍ଷମତା ପରୀକ୍ଷଣ ପାଇଁ ପ୍ରଯୁକ୍ତିବିଦ୍ୟା ବ୍ୟବହାର ନିମନ୍ତେ ନାସା ଏହି ପେଲୋଡ୍ ପଠାଇଛି। ବୃଦ୍ଧାବସ୍ଥାକୁ ରୋକିବା ଏବଂ ଅମ୍ଳଜାନ ଉତ୍ପାଦନ ନିମନ୍ତେ ଏହି ପେଲୋଡ୍ରେ ଥିବା ଟେକ୍ନୋଲୋଜି ପରୀକ୍ଷା କରାଯିବ। ଚନ୍ଦ୍ର ଓ ମଙ୍ଗଳରେ ଚାଷ ସହ ମନୁଷ୍ୟ ରହିବା ଉପଯୋଗୀ ପରିବେଶ ପ୍ରସ୍ତୁତ ନିମନ୍ତେ ଏପରି ଗବେଷଣା କରାଯାଉଥିବା ନାସା କହିଛି।
