ଲକ୍ଷ୍ନୌ,୨୨ ।୨: ଉତ୍ତର ପ୍ରଦେଶ ବିଧାନସଭା ନିର୍ବାଚନର ତୃତୀୟ ପର୍ଯ୍ୟାୟ ମତଦାନ ଶେଷ ହୋଇଥିବା ବେଳେ ଚତୁର୍ଥ ପର୍ଯ୍ୟାୟ ମତଦାନ ହେବାକୁ ଆଉ ଗୋଟିଏ ଦିନ ବାକି ରହିଛି । ଏବେ ପଞ୍ଚମ ପର୍ଯ୍ୟାୟ ମତଦାନ ଲାଗି ପ୍ରାର୍ଥୀ ହୋଇଥିବା ବ୍ୟକ୍ତିମାନଙ୍କ ମଧ୍ୟରେ ସବୁଠାରୁ ଅଧିକ ଅପରାଧୀ ରହିଥିବା ଜଣାପଡିଛି । ପଞ୍ଚମ ପର୍ଯ୍ୟାୟରେ ମୋଟ ୬୮୫ ଜଣ ପ୍ରାର୍ଥୀ ରହିଛନ୍ତି । ଏମାନଙ୍କ ମଧ୍ୟରୁ ୧୮୫ ଜଣଙ୍କ ନାଁରେ ଅପରାଧ ମାମଲା ରହିଛି । ଏହାସହ କୋଇ ପତିଙ୍କ ସଂଖ୍ୟା ବି ଏକ ତୃତିୟାଂଶ ବୋଲି ଜଣାପଡିଛି । ସୋମବାର ଏଡିଆର ପକ୍ଷରୁ ପଞ୍ଚମ ପର୍ଯ୍ୟାୟ ପ୍ରାର୍ଥୀଙ୍କ ଶପଥ ପତ୍ର ବିଶ୍ଳେଷଣ କରିବା ପରେ ଏହି ତଥ୍ୟ ସାମ୍ନାକୁ ଆସିଛି ।
ଏଡିଆରର ସଂଯୋଜକ ସଞ୍ଜୟ ସିଂ ରିପୋର୍ଟ ଜାରି କରି କହିଛନ୍ତି, ପଞ୍ଚମ ପର୍ଯ୍ୟାୟ ଲାଗି ପ୍ରାର୍ଥୀମାନେ ଯେଉଁ ଶପଥପତ୍ର ଦାଖଲ କରିଛନ୍ତି ସେଥିରୁ ଜଣାପଡିଛି କି ପଞ୍ଚମ ପର୍ଯ୍ୟାୟରେ ସବୁଠାରୁ ଅଧିକ ଅପରାଧି ପ୍ରାର୍ଥୀ ରହିଛନ୍ତି । ଏହି ପର୍ଯ୍ୟାୟରେ ୧୮୫ ଜଣଙ୍କ ନାଁରେ ଅପରାଧ ମାମଲା ରହିଛି । ଏଥିମଧ୍ୟରୁ ସମାଜବାଦୀ ପାର୍ଟିରେ ସବୁଠାରୁ ଅଧିକ ୫୭ ଜଣଙ୍କ ମଧ୍ୟରୁ ୪୨ ଜଣଙ୍କ ନାଁରେ ଅପରାଧ ମାମଲା ରହିଛି । ସେହିପରି ଭାରତୀୟ ଜନତା ପାର୍ଟି(ଭାଜପା)ର ୫୨ ଜଣଙ୍କ ମଧ୍ୟରୁ ୨୫ ଜଣଙ୍କ ନାଁରେ ଅପରାଧ ରହିଛି । କଂଗ୍ରେସ ଓ ବହୁଜନ ସମାଜ ପାର୍ଟିର ୬୧ ପ୍ରାର୍ଥୀଙ୍କ ମଧ୍ୟରୁ ୨୩-୨୩ ଜଣଙ୍କ ନାଁରେ ଅପରାଧ ମାମଲା ରହିଛି ।
