ଲଣ୍ଡନ, ୧୪ା୫(ପି.ଟି.)-ଚେଲ୍ସି ବନାମ ମାଞ୍ଚେଷ୍ଟର ସିଟି ଚାମ୍ପିୟନ୍ସ ଲିଗ୍ ଫୁଟ୍ବଲ ଫାଇନାଲ ଇସ୍ତାନବୁଲ୍ରୁ ପୋତ୍ତେର୍ର୍ା ସ୍ଥାନାନ୍ତର କରାଯାଇଛି। ଷ୍ଟାଡିୟମରେ ମ୍ୟାଚ ଦେଖିବା ଲାଗି ଦୁଇ ଦଳର ୧୨,୦୦୦ ସମର୍ଥକଙ୍କୁ ଅନୁମତି ମିଳିବ। ୟୁନିୟନ ଅଫ୍ ୟୁରୋପିଆନ ଫୁଟ୍ବଲ ଆସୋସିଏଶନ (ୟୁଫା) ତରଫରୁ ଗୁରୁବାର ଏ ବିଷୟ ସ୍ପଷ୍ଟ କରାଯାଇଛି। କୋଭିଡ୍ ଯୋଗୁ ତୁର୍କୀକୁ ବିମାନ ଯାତାୟାତ କଟକଣା ଜାରି କରିଛି ଇଂଲଣ୍ଡ। ଫାଇନାଲ ମ୍ୟାଚ ମେ’ ୨୯ରେ ଖେଳାଯିବ। ପୋତ୍ତେର୍ର୍ାସ୍ଥିତ ଇଷ୍ଟଡିଓ ଡୁ ଡ୍ରାଗାଓ ଷ୍ଟାଡିୟମର ମୋଟ ଆସନ କ୍ଷମତା ୫୦,୦୦୦ ରହିଛି। ପ୍ରଥମ ବିକଳ୍ପ ସ୍ଥାନ ଭାବେ ଲଣ୍ଡନସ୍ଥିତ ଓ୍ବେମ୍ବଲି ଷ୍ଟାଡିୟମରେ ଏହି ମ୍ୟାଚ କରିବା ଲାଗି ବିଚାର କରାଯାଇଥିଲା। ମାତ୍ର ମ୍ୟାଚର ଅତିଥି ଓ ବ୍ରଡ୍କାଷ୍ଟରଙ୍କ ଲାଗି କ୍ୱାରାଣ୍ଟାଇନ ବ୍ୟବସ୍ଥା କରିବା ଲାଗି ବ୍ରିିଟିଶ ସରକାର ଅକ୍ଷମତା ପ୍ରକାଶ କରିଥିଲେ। ଆସନ୍ତା ସପ୍ତାହ ଆରମ୍ଭରୁ ପର୍ତ୍ତୁଗାଲ ସମେତ ୧୨ଟି ଦେଶରୁ କୌଣସି ଲୋକ ଫେରିଲେ କ୍ୱାରାଣ୍ଟାଇନରେ ରହିବାକୁ ପଡ଼ିବ ନାହିଁ ବୋଲି ଇଂଲଣ୍ଡ କହିଛି। ୟୁଫା ସୂଚନା ଅନୁସାରେ ଗୁରୁବାର ଉଭୟ ଚେଲ୍ସି ଓ ମାଞ୍ଚେଷ୍ଟର ସିଟି ସମର୍ଥକଙ୍କ ପାଇଁ ୬,୦୦୦ ଟିକେଟ ବିକ୍ରି ପାଇଁ ଛଡ଼ାଯାଇଛି। କୋଭିଡ୍ ପାଇଁ ସମର୍ଥକମାନେ ପ୍ରାୟ ଏକ ବର୍ଷ ହେବ ସେମାନଙ୍କ ପ୍ରିୟ ଦଳର ଖେଳ ଷ୍ଟାଡିୟମରେ ବସି ଉପଭୋଗ କରିପାରି ନାହାନ୍ତି। ତେଣୁ ଟିକେଟର ଚାହିଦା ରହିବ ବୋଲି ୟୁଫା ସଭାପତି ଆଲେକ୍ସାଣ୍ଡର ସେଫିରିନ୍ ପ୍ରକାଶ କରିଛନ୍ତି। ଗତବର୍ଷ ମଧ୍ୟ ଫାଇନାଲ ଇସ୍ତାନବୁଲ୍ରୁ ପର୍ତ୍ତୁଗାଲ ସ୍ଥାନାନ୍ତରିତ ହୋଇଥିଲା। ଏହା ବିନା ଦର୍ଶକରେ ଲିସ୍ବନରେ ଖେଳାଯାଇଥିଲା। ବେୟର୍ନ ମ୍ୟୁନିକ୍ ଟାଇଟଲ ବିଜୟୀ ହୋଇଥିଲା।
