ପାରଳାଖେମୁଣ୍ଡି,୨ା୯(ଡି.ଏନ୍.ଏ.): ପାରଳାଖେମୁଣ୍ଡି ସହରର ମୁଖ୍ୟରାସ୍ତା କଡରେ ଗୋଦାମଗୁଡିକ ଥିବାରୁ ଟ୍ରାଫିକ ସମସ୍ୟା ଉପୁଜୁଛି । ସହରର ରାମସାଗର ରାସ୍ତାରୁ ଆରମ୍ଭ କରି ପୁରୁଣା ପାଟଣା ରାସ୍ତା ତଥା ଜାତୀୟ ରାଜପଥ ୩୨୬-ଏ କଡରେ ବହୁ ଗୋଦାମ ଗୃହ ନିର୍ମାଣ କରାଯାଇଛି। ସେହିପରି ରାଣୀପେଣ୍ଠ ରାସ୍ତାରୁ ପୁରୁଣା କୋର୍ଟ ଛକ ମଧ୍ୟରେ ମଧ୍ୟ ଗୋଦାମ ଗୃହ ଗଢି ଉଠିଛି । ଏସବୁ ସ୍ଥାନକୁ ଜିନିଷ ନେଇ ଆସୁଥିବା ଟ୍ରକଗୁଡିକୁ ଗୋଦାମ ପାର୍ଶ୍ୱ ରାସ୍ତାରେ ରହି ଦିନରେ ଅନଲୋଡିଂ କରାଯାଉଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଛି । ସହରର ପ୍ରମୁଖ ବ୍ୟବସାୟୀମାନେ ପୁରୁଣାପାଟଣା ରାସ୍ତାରେ ଗୋଦାମ କରିିଛନ୍ତି। କାରଣ ବ୍ୟବସାୟୀମାନେ ମୁଖ୍ୟତଃ ଆନ୍ଧ୍ରପ୍ରଦେଶରୁ ମାଲ ଆଣୁଥିବା ବେଳେ ପୁରୁଣାପାଟଣାରୁ ଆନ୍ଧ୍ର ବର୍ଡର ମାତ୍ର ୧କି.ମି. ଦୂର। ବ୍ୟବସାୟୀଙ୍କୁ ସୁବିଧା ହେଉଥିବାରୁ ଏହି ରାସ୍ତାରେ ବହୁ ସଂଖ୍ୟକ ଗୋଦାମ ଗୃହ ତୋଳିଛନ୍ତି । ଏପଟେ ସ୍ଥାନୀୟ ବାସିନ୍ଦାଙ୍କ ଠାରୁ ଆରମ୍ଭ କରି ଦୈନିକ ଯାତାୟତ କରୁଥିବା ଶତାଧିକ ଗାଡି ମୋଟର ଟ୍ରାଫିକରେ ଫସୁଛନ୍ତି। ତେଣୁ ଏପରି ମୁଖ୍ୟରାସ୍ତାରେ ଗୋଦାମ ଗୃହ ନିର୍ମାଣ ଉପରେ ଅଙ୍କୁଶ ଲଗାଇବାକୁ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି । ଅନ୍ୟପକ୍ଷରେ ସହର ମଧ୍ୟରେ ମଧ୍ୟ ବହୁ ଗୋଦାମ ଗୃହ ରହିଛି । ଏଥିଯୋଗୁ ମାଲବୋଝଇ ଟ୍ରକ ଗୁଡିକ ଦିନବେଳେ ସହରରେ ପ୍ରବେଶ କରି ଟ୍ରାଫିକ ସମସ୍ୟା ସୃଷ୍ଟି କରୁଥିବା ଅଭିଯୋଗ ହୋଇଛି ।
