ପାରଳାଖେମୁଣ୍ଡି,୫ା୬(ଡି.ଏନ୍.ଏ): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ସହରରେ ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି । ଏହି ପୁରାତନ ପୌରପରିଷଦରେ ରାସ୍ତାଘାଟର ପ୍ରଶସ୍ତୀକରଣ କରାଯାଇ ନଥିବା ବେଳେ ଦିନକୁ ଦିନ ଜନସଂଖ୍ୟା ବୃଦ୍ଧିପାଉଛି। ଏହି ପୌରପରିଷଦ ୧୮୮୫ରେ ଗଠନ ହୋଇ ୧୩୮ ବର୍ଷ ପୂରଣ କଲାଣି। ହେଲେ ସେହି ପୁରୁଣା ଢାଞ୍ଚାରେ ହିଁ ରାସ୍ତା ଘାଟ ରହିଥିବା ବେଳେ ନୂତନ ଭାବେ ସାହି, ବସ୍ତି, ନଗର ଆଦି ଗଢିଉଠିଛି । ସହରର କୌଣସି ଉନ୍ନୟନମୂଳକ କାମ କିମ୍ବା ବିଶେଷ କରି ରାସ୍ତାର ପ୍ରଶସ୍ତୀକରଣ ହୋଇପାରିନାହିଁ । ସେହି ଅଣଓସାରିଆ ରାସ୍ତାରେ ବର୍ତ୍ତମାନ ବଢିଚାଲିଥିବା ଜନ ଓ ଯାନ ସଂଖ୍ୟା ସମସ୍ୟା ସୃଷ୍ଟି କରୁଛି। ଏଥିସାଙ୍ଗକୁ ବିପର୍ଯ୍ୟସ୍ତ ଟ୍ରାଫିକ ବ୍ୟବସ୍ଥା ସମସ୍ୟାକୁ ଦ୍ୱିଗୁଣିତ କରୁଛି। ଅସଜଡା ଟ୍ରାଫିକ ବ୍ୟବସ୍ଥା ଯୋଗୁଁ ଭାରୀଯାନ ପ୍ରବେଶ ପାଇଁ ସମୟ ନିର୍ଘଣ୍ଟ ହୋଇଥିଲେ ହେଁ ଅବାଧରେ ପ୍ରବେଶ ହେଉଛି। ଏହି ଭାରୀଯାନଗୁଡିକ ସହରର ୱାନ ୱେ ଟ୍ରାଫିକ ରାସ୍ତାରେ ପ୍ରବେଶ କରି ଯାତାୟତ କରୁଛି। ଏଥିଯୋଗୁଁ ଦୈନନ୍ଦିନ ବିଭିନ୍ନ ସମୟରେ ଟ୍ରାଫିକ ସମସ୍ୟା ଉପୁଜୁଥିବା ଲକ୍ଷ୍ୟ କରାଯାଉଛି।
ଯେ, ପାରଳାଖେମୁଣ୍ଡି ସହରାଞ୍ଚଳରେ ସକାଳ ୮ରୁ ରାତି ୯ ପର୍ଯ୍ୟନ୍ତ ଭାରୀଯାନ ଯାତାୟତ ଉପରେ କଟକଣା ଲଗାଯାଇଛି । ହେଲେ ଏସବୁ ନିୟମକୁ ବେଖାତିର କରି ଦୈନନ୍ଦିନ ୱାନ ୱେ ଟ୍ରାଫିକ ରାସ୍ତାରେ ଯାତାୟତ କରୁଥିବାର ଲକ୍ଷ୍ୟ କରାଯାଉଛି । ସହରରେ କେବଳ ମୁଖ୍ୟ ଦୁଇଗୋଟି ରାସ୍ତା ଯଥା ପୋଲିସ ଷ୍ଟେସନ ଛକଠାରୁ କଲେଜ ଛକ, ମୁଖ୍ୟବଜାର ଛକ, ବସଷ୍ଟାଣ୍ଡ ଛକ ଦେଇ ପୁରୁଣା କୋର୍ଟ ଛକ ଏବଂ ଅନ୍ୟଟି ପୁରୁଣାକୋର୍ଟ ଛକ ଠାରୁ ଗାନ୍ଧୀଛକ, ପ୍ୟାଲେସ ଛକ, ସିନେମା ହଲ ଛକ, ମେଡିକାଲ ଛକ ପୁଣି ପୋଲିସ ଷ୍ଟେସନ ଛକ ଦେଇ ଗୋଲାକାର ରାସ୍ତା ମୁଖ୍ୟ ରାସ୍ତା ଅଟେ । ଏହାକୁ ୱାନ ୱେ ଟ୍ରାଫିକ ରାସ୍ତା ବା ପ୍ରବେଶ ଓ ପ୍ରସ୍ଥାନ ରାସ୍ତା ରୂପେ ବ୍ୟବହାର କରାଯିବା ପାଇଁ ନିଷ୍ପତ୍ତି ହୋଇଥିଲା। ହେଲେ ପ୍ରସ୍ଥାନ ରାସ୍ତାରେ ଭାରୀଯାନଗୁଡିକ ଅବାଧ ପ୍ରବେଶ କରୁଥିବାରୁ ଟ୍ରାଫିକ ସମସ୍ୟା ଉପୁଜୁଛି। ସେହିପରି ସହରର ସାନିଆନାଇଡୁ ସାହି ବା ବଜାର ସାହି ମଧ୍ୟରେ ଏକ ଅଜବ ଟ୍ରାଫିକ ନିୟମ କରାଯାଇଥିବା ଦେଖିବାକୁ ମିଳୁଛି। ଦୁଇଚକିଆ ଯାନଗୁଡିକୁ ରାସ୍ତା ମଧ୍ୟ ଭାଗରେ ପାର୍କିଂ କରି ରଖାଯାଉଛି । ଏହି ସାହି ବେସ ଗହଳିପୂର୍ଣ୍ଣ ସହ ଅଣଓସାରିଆ ଅଟେ । ଏପରିି ସ୍ଥଳେ ରାସ୍ତାର ମଧ୍ୟ ଭାଗରେ ଦୁଇ ଚକିଆ ପାର୍କିଂ ବ୍ୟବସ୍ଥା ଯୋଗୁଁ ରାସ୍ତା ଆହୁରି ସଂକୀର୍ଣ୍ଣ ହୋଇପଡିଛି। ଏପରିସ୍ଥଳେ ବେପାରୀମାନଙ୍କ ଦୈରାତ୍ମ୍ୟ ବଢିବାରେ ଲାଗିଛି । ହୋଲସେଲ ଦୋକାନଗୁଡିକୁ ଜିନିଷ ନେବା ଆଣିବା କରିବା ନିମନ୍ତେ ବଡ ଯାନବାହାନ ଗୁଡିକୁ ଏହି ସଂକୀର୍ଣ୍ଣରାସ୍ତାରେ ପ୍ରବେଶ କରାଉଛନ୍ତି । ଫଳରେ ଦୈନନ୍ଦିନ ପ୍ରବଳ ଭିଡ ପରିଲକ୍ଷିତ ହେଉଛି। ଅନ୍ୟପକ୍ଷରେ ୨୦୧୨ରେ ଟ୍ରାଫିକ ସମ୍ବନ୍ଧୀୟ ବୈଠକ ହୋଇଥିବା ବେଳେ ଏହାପରେ ଆଉ ଗୋଟିଏ ବି ଟ୍ରାଫିକ ସମ୍ବନ୍ଧୀୟ ବୈଠକ ହୋଇନଥିବା ଜଣାପଡିଛି। ଇତି ମଧ୍ୟରେ କେତେ ଯେ ଆରକ୍ଷୀ ଅଧୀକ୍ଷକ ଦାୟିତ୍ୱ ତୁଲାଇ ବଦଳିହୋଇ ଗଲେଣି । ହେଲେ ଟ୍ରାଫିକ ବ୍ୟବସ୍ଥା ଉପରେ କୌଣସି ଗୁରୁତ୍ୱାରୋପ କରୁନାହାନ୍ତି ବୋଲି ସାଧାରଣରେ ଅଭିଯୋଗ ହେଉଛି।
