ଛତ୍ରପୁର, ୩୧।୭ (ଦିଲ୍ଲୀପ ସାମଲ/ଦ୍ୱାରକା ପଟ୍ଟନାୟକ): ରାଜ୍ୟରେ ପ୍ରଥମ ଥର ପାଇଁ ବ୍ରହ୍ମପୁର ପାଟବୁଣାକାରଙ୍କୁ ସମର୍ପିତ ତଥା ପାରମ୍ପରିକ ପାଟବସ୍ତ୍ରରେ ନିର୍ମିତ ବିଭିନ୍ନ ପୋଷାକର ପ୍ରଦର୍ଶନୀ ଉତ୍ସବ ବ୍ରହ୍ମପୁରସ୍ଥିତ ‘ଆମେ ସବୁ’ ଡିଜିଟାଲ ପ୍ଲାଟଫର୍ମ ପକ୍ଷରୁ ଆୟୋଜନ କରାଯାଇଥିଲା। ଏହି ଉତ୍ସବ ଉପଲକ୍ଷେ ପ୍ରସ୍ତୁତ ସୁଦୃଶ୍ୟ ସ୍ମରଣିକା **‘ଲାବଣ୍ୟ’**କୁ ଶୁକ୍ରବାର ଛତ୍ରପୁରସ୍ଥିତ ଜିଲାପାଳଙ୍କ କାର୍ଯ୍ୟାଳୟରେ ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନ୍ ଉନ୍ମୋଚନ କରିଥିଲେ।
କାଳକ୍ରମେ ଲୋପ ପାଇବାକୁ ବସିଥିବା ବ୍ରହ୍ମପୁର ପାଟବସ୍ତ୍ରର ପରମ୍ପରାକୁ ପୁନର୍ଜୀବିତ କରିବା, ଏହାକୁ ଲୋକଲୋଚନକୁ ଆଣିବା ଏବଂ ବିଭିନ୍ନ ସ୍ଥାନରେ ପ୍ରଚାର ଓ ପ୍ରସାର କରି ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଏହି ଅଭିନବ ପଦକ୍ଷେପ ଗ୍ରହଣ କରାଯାଇଥିଲା।
ଏହି ଉତ୍ସବରେ ଅଞ୍ଚଳର ବିଭିନ୍ନ ମ୍ୟାନେଜମେଣ୍ଟ ଅନୁଷ୍ଠାନ ଓ ବୈଷୟିକ ମହାବିଦ୍ୟାଳୟର ଛାତ୍ରୀଛାତ୍ରୀମାନେ ପ୍ରଥମ ଥର ପାଇଁ ଅଂଶଗ୍ରହଣ କରିଥିଲେ। ପ୍ରତିଯୋଗୀମାନେ ଅନୁଷ୍ଠାନ ପକ୍ଷରୁ ପ୍ରଦତ୍ତ ବ୍ରହ୍ମପୁର ପାଟବସ୍ତ୍ର ବ୍ୟବହାର କରି ବିଭିନ୍ନ ପ୍ରକାରର ଆକର୍ଷଣୀୟ ପାରମ୍ପରିକ ଓ ଆଧୁନିକ ପୋଷାକ ପ୍ରସ୍ତୁତ କରିଥିଲେ। ବ୍ରହ୍ମପୁର ପାଟବସ୍ତ୍ରକୁ ନେଇ ଏଭଳି ଫ୍ୟାସନ୍ ଶୋ ଓଡ଼ିଶାରେ ପ୍ରଥମ ଥର ପାଇଁ ଆୟୋଜିତ ହୋଇଥିଲା।
ବ୍ରହ୍ମପୁର ପାଟବସ୍ତ୍ରର ପ୍ରଚାର ଓ ପ୍ରସାର ପାଇଁ ଏଭଳି ଅଭିନବ ପ୍ରୟାସକୁ ଜିଲାପାଳ ଭୂୟସୀ ପ୍ରଶଂସା କରିବା ସହ ଭବିଷ୍ୟତରେ ମଧ୍ୟ ଏପରି ଉଦ୍ୟମ ଜାରି ରଖିବାକୁ ପରାମର୍ଶ ଦେଇଥିଲେ।
ଏହି ଅବସରରେ ଆକାଶବାଣୀ ବ୍ରହ୍ମପୁର କେନ୍ଦ୍ରର ପ୍ରାକ୍ତନ ନିର୍ଦ୍ଦେଶକ ତଥା **‘ଆମେ ସବୁ’**ର ମୁଖ୍ୟ କାର୍ଯ୍ୟନିର୍ବାହୀ ହୃଷୀକେଶ ପାଣିଗ୍ରାହୀ, ବିଶିଷ୍ଟ ମନସ୍ତତ୍ତ୍ୱବିତ୍ ସୁଦୀପ୍ତା ପାଣିଗ୍ରାହୀ ଏବଂ ‘ଆମେ ସବୁ’ ଛତ୍ରପୁର ଆଞ୍ଚଳିକ ମୁଖ୍ୟ ତଥା ବରିଷ୍ଠ ସମାଜସେବୀ ଅରୁଣ କୁମାର ଶତପଥୀ ପ୍ରମୁଖ ଉପସ୍ଥିତ ଥିଲେ।
