ସମ୍ବଲପୁର,୮ା୧(ପ୍ରମୋଦ ବହିଦାର): ସମ୍ବଲପୁର ଜିଲା ଅଇଁଠାପାଲି ଥାନା ଭାଲୁପାଲି ଛକରେ ବୁଧବାର ସନ୍ଧ୍ୟାରେ ଇଟା ବୋଝେଇ ଟ୍ରାକ୍ଟର ବିଜୁ ଏକ୍ସପ୍ରେସ୍ ୱେ(ରାଜ୍ୟ ରାଜପଥ-୧୦) ପାର୍ଶ୍ୱରେ ଥିବା ଏକ ହୋଟେଲକୁ ମାଡ଼ିଯାଇ ରାସ୍ତାପାର୍ଶ୍ୱସ୍ଥ ଡ୍ରେନରେ ଓଲଟି ପଡ଼ିଥିଲା। ଏଥିରେ ଟ୍ରାକ୍ଟର ଚାଳକଙ୍କ ସହ ୨ଜଣଙ୍କ ମୃତ୍ୟୁ ଘଟିଥିବା ବେଳେ ୫ଜଣ ଗୁରୁତର ଆହତ ହୋଇଛନ୍ତି। ମୃତକ ହେଲେ ଟ୍ରାକ୍ଟର ଚାଳକ ସିନ୍ଦୂରପଙ୍କର ମୂଳ ବାସିନ୍ଦା ତଥା ଅଇଁଠାପାଲି ଥାନା ପଧାନପଡ଼ାରେ ରହୁଥିବା ମୁକେଶ ବାଗ(୨୭) ଓ ହୋଟେଲ ମାଲିକଙ୍କ ନାତି ବିଧାନ୍ତ ସାହୁ(୬)। ଆହତଙ୍କ ମଧ୍ୟରେ ହୋଟେଲ ମାଲିକ ରାଜୁ ସାହୁଙ୍କ ଝିଅ ସୁନନ୍ଦା ସାହୁ(୩୦), ନିତେଶ ସାହୁ (୮) ଓ ସିଦ୍ଧାନ୍ତ ସାହୁ(୯) ଏବଂ ଟ୍ରାକ୍ଟରର ୨ ଶ୍ରମିକ ଝାରସୁଗୁଡ଼ା ଜିଲା ଚନ୍ଦନିମାଲର ଅଜିତ ଖଡ଼ିଆ (୨୩) ଓ ଦିଲୀପ ଖଡ଼ିଆ (୨୪) ରହିଛନ୍ତି। ଆହତ ମହିଳା ଓ ୨ ଶିଶୁଙ୍କୁ ଏକ ଘରୋଇ ନର୍ସିଂହୋମ୍ରେ ଭର୍ତ୍ତି କରାଯାଇଥିବା ବେଳେ ୨ ଶ୍ରମିକଙ୍କୁ ବୁର୍ଲା ଭିମ୍ସାରରେ ଭର୍ତ୍ତି କରାଯାଇଛି।
ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ, ବୁଧବାର ସନ୍ଧ୍ୟାରେ ରେଙ୍ଗାଲି ପଟୁ ଇଟା ବୋଝେଇ କରି ଏକ ଟ୍ରାକ୍ଟର (ନଂ.ଓଡି୧୫ଟି-୭୧୩୩) ୨ ଶ୍ରମିକଙ୍କୁ ନେଇ ବିଜୁ ଏକ୍ସପ୍ରେସ୍ ୱେରେ ସମ୍ବଲପୁର ପଟକୁ ଆସୁଥିଲା। ଭାଲୁପାଲି ଛକରେ ଜଣେ ସ୍କୁଟି ଆରୋହୀଙ୍କୁ ବଞ୍ଚାଇବାକୁ ଯାଇ ଟ୍ରାକ୍ଟର ଭାରସାମ୍ୟ ହରାଇ ଡିଭାଇଡର ଭାଙ୍ଗି ଅପରପାର୍ଶ୍ୱ ରାସ୍ତପାର୍ଶ୍ୱରେ ଥିବା ଏକ ହୋଟେଲ ଭିତରକୁ ମାଡ଼ିଯାଇ ଓଲଟି ପଡ଼ିଥିଲା। ଫଳରେ ହୋଟେଲରେ ବସିଥିବା ମାଲିକଙ୍କ ଝିଅ ଓ ୩ ନାତି ଗୁରୁତର ଆହତ ହୋଇଥିଲେ। ଡ୍ରାଇଭର ମୁକେଶଙ୍କ ସହ ଉଭୟ ଶ୍ରମିକଙ୍କୁ ସ୍ଥାନୀୟ ଲୋକଙ୍କ ସହାୟତାରେ ପୋଲିସ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟ ନେଇଥିଲା। ହେଲେ ସେଠାରେ ଡାକ୍ତର ମୁକେଶଙ୍କୁ ମୃତ ଘୋଷଣା କରିଥିଲେ। ଅପରପକ୍ଷରେ ଘରୋଇ ନର୍ସିଂହୋମ୍ରେ ଭର୍ତ୍ତି ହୋଇଥିବା ହୋଟେଲ ମାଲିକଙ୍କ ନାତି ବିଧାନ୍ତ ସାହୁଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା। ଭାରସାମ୍ୟ ହରାଇ ଟ୍ରାକ୍ଟର ହୋଟେଲକୁ ପଶିଯିବାବେଳେ ବାହାରେ ଥିବା ଏକ ସ୍କୁଟି ଓ ବାଇକ୍କୁ ଧକ୍କାଦେଇଥିବା ପ୍ରତ୍ୟକ୍ଷଦର୍ଶୀ କହିଛନ୍ତି।
