ହାଟଡିହୀ, ୩୦।୭(ଶୁଭକାନ୍ତ ନାୟକ): ସରକାର ଖେଳ ଏବଂ ଶାରୀରିକ ବିକାଶ ପାଇଁ କୋଟି କୋଟି ଟଙ୍କା ବ୍ୟୟ କରୁଥିବାବେଳେ କେନ୍ଦୁଝର ଜିଲା ହାଟଡିହୀ ତହସିଲ ଅଧୀନସ୍ଥ ବଡ଼ରମ୍ପାସ ଆର.ଆଇ. ସର୍କଲର ଧାନଘର ଗ୍ରାମରେ ଏକ ବ୍ୟତିକ୍ରମ ଘଟଣା ସାମ୍ନାକୁ ଆସିଛି। ଗ୍ରାମର ଏକମାତ୍ର ଖେଳ ପଡ଼ିଆକୁ କିଛି ବ୍ୟକ୍ତି ଜୋରଜବରଦସ୍ତ ଟ୍ରାକ୍ଟର ଦ୍ୱାରା ହଳ କରି ସେଠାରେ ଧାନତଳି ପକାଇଥିବା ଅଭିଯୋଗ ହୋଇଛି। ଏହି ଅଞ୍ଚଳ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ଏବଂ କୃଷକ ମୋର୍ଚ୍ଚାର ସାଧାରଣ ସମ୍ପାଦକ ବିଶ୍ୱନାଥ ପ୍ରତାପ ଯେନାଙ୍କ ନିଜ ପଞ୍ଚାୟତ ଓ ଗ୍ରାମ ଅଧୀନରେ ଥିବାରୁ ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଓ ଉତ୍ତେଜନା ପ୍ରକାଶ ପାଇଛି।
ଗ୍ରାମବାସୀଙ୍କ କହିବାନୁଯାୟୀ, ଗ୍ରାମର ପିଲାମାନଙ୍କ ଖେଳାଖେଳି ପାଇଁ ହାଟଡ଼ିହୀ ବ୍ଲକ ପକ୍ଷରୁ ଏହି ଖେଳ ପଡ଼ିଆର ଉନ୍ନତିକରଣ ନିମନ୍ତେ ପୂର୍ବରୁ ଅନେକ ଥର ଲକ୍ଷାଧିକ ଟଙ୍କା ବ୍ୟୟ ବରାଦ କରାଯାଇ ସହାୟତା ଯାଗାଇ ଦିଆଯାଇଥିଲା। କିନ୍ତୁ କିଛି ମୁଷ୍ଟିମୟ ଲୋକ ମିଶି ସେହି ଖେଳ ପଡ଼ିଆକୁ ଜୋରଜବରଦସ୍ତ ହଳ କରି ଧାନତଳି ପକାଇଥିବାରୁ ଏହା ଆଉ ପୂର୍ବସ୍ଥିତିକୁ ଫେରିବ ନାହିଁ ଏବଂ ପିଲାମାନେ ଖେଳରୁ ବଞ୍ଚିତ ହେବେ ବୋଲି ବୈଲୋଚନ ରାଉଳ, ଗଣେଶ୍ୱର ରାଉତ, ପଦ୍ମନାଭ ରାଉଳ, ରତ୍ନାକର ରାଉଳ ଓ ସନାତନ ନାୟକ ପ୍ରମୁଖ ଗ୍ରାମବାସୀ କେନ୍ଦୁଝର ଜିଲାପାଳ, ଆନନ୍ଦପୁର ଉପଜିଲାପାଳ ଏବଂ ହାଟଡିହୀ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରି କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ଅନ୍ୟପକ୍ଷରେ କୃଷକ ମୋର୍ଚ୍ଚାର ସାଧାରଣ ସମ୍ପାଦକ ବିଶ୍ୱନାଥ ପ୍ରତାପ ଯେନା ଏହାକୁ ସ୍ୱୀକାର କରି କହିଛନ୍ତି ଯେ, ସେ ଜଣେ କୃଷକ ନେତା ହୋଇଥିବାରୁ ସେ ଏବଂ ଅନ୍ୟ ୭ରୁ ୮ ଜଣ ଚାଷୀ ମିଳିମିଶି ଖେଳ ପଡ଼ିଆକୁ ହଳ କରି ଧାନତଳି ପକାଇଛନ୍ତି। ତେବେ ଏହା ପଛରେ ତହସିଲ କିମ୍ବା ପଞ୍ଚାୟତ ତରଫରୁ କୌଣସି ସ୍ୱୀକୃତି ମିଳି ନଥିବା ସେ ସ୍ୱୀକାର କରିଛନ୍ତି। ସେହିପରି ରମ୍ପାସ ଆର.ଆଇ. ନିବେଦିତା ସାହୁ ଘଟଣାସ୍ଥଳ ପରିଦର୍ଶନ କରି ଖେଳ ପଡ଼ିଆକୁ ହଳ କରାଯାଇ ଧାନତଳି ପକାଯାଇଥିବା ନେଇ ସ୍ପଷ୍ଟ କରିଛନ୍ତି।
