ତିରୁପତି,୨୭ ।୯: ଆନ୍ଧ୍ର ପ୍ରଦେଶର ତିରୁପତିରେ ଏକ ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି । ଏଠାରେ ଏକ ମର୍ସିଡିଜ କାର ଏକ ଟ୍ରାକ୍ଟର ସହ ଧକ୍କା ହେବା ପରେ ଟ୍ରାକ୍ଟରଟି ଦୁଇ ଖଣ୍ଡ ହୋଇଯାଇଛି । ତେବେ ମର୍ସିଡିଜରେ ଥିବା ସମସ୍ତ ଯାତ୍ରୀଙ୍କୁ ସାମାନ୍ୟ ଆଘାତ ଲାଗିଛି । ଘଟଣାଟି ସୋମବାର ଘଟିଛି । ଦୁର୍ଘଟଣା ତିରୁପତି ନିକଟ ଚନ୍ଦ୍ରଗିରି ବାଇପାସ ରୋଡରେ ହୋଇଛି । ଏଠାରେ ଏକ ମର୍ସିଡିଜ କାର ସାମ୍ନାକୁ ଓଲଟା ରାସ୍ତାରେ ଆସୁଥିବା ଏକ ଟ୍ରାକ୍ଟର ଚାଲି ଆସିଥିଲା ଫଳରେ ଦ୍ରୁତ ଗତିରେ ଥିବା ମର୍ସିଡିଜ ସହ ଟ୍ରାକ୍ଟରଟି ଖୁବ ଜୋରରେ ଧକ୍କା ହୋଇଥିଲା ଓ ଦେଖୁଦେଖୁ ଟ୍ରାକ୍ଟରଟି ଦୁଇଖଣ୍ଡ ହୋଇଯାଇଥିଲା । ଆଶ୍ଚର୍ଯ୍ୟର କଥା ଦୁର୍ଘଟଣାରେ ବିଶେଷ କିଛି କ୍ଷତି ହୋଇ ନ ଥିବା ବେଳେ ଟ୍ରାକ୍ଟର ଚାଳକ ବି ସାମାନ୍ୟ ଆହତ ହୋଇଥିବା କୁହାଯାଉଛି ।
ସୂଚନାଯୋଗ୍ୟ, ନିକଟରେ ଉଦ୍ଦ୍ୟୋଗପତି ସାଇରସ ମିସ୍ତ୍ରୀଙ୍କର ମର୍ସିଡିଜ କାର ଦୁର୍ଘଟଣାରେ ମୃତ୍ୟୁ ହୋଇଥିବା ବେଳେ ଏହି କାରକୁ ନେଇ ପ୍ରଶ୍ନ ଉଠିଥିଲା । କାରଣ ସାଇରସ ମିସ୍ତ୍ରୀ ଯେଉଁ ମର୍ସିଡିଜରେ ଯାତ୍ରା କରୁଥିଲେ ତାହା ସବୁଠାରୁ ଅଧିକ ସୁରକ୍ଷିତ ବୋଲି କୁହାଯାଉଥିଲା । ୧୯୫୦ ସିସିର ଇଞ୍ଜିନ ଥିବା ଏହି କାରରେ ୭ଟି ଏୟାରବ୍ୟାଗ ରହିଛି ।
