ମୟୂରଭଞ୍ଜ ଜିଲା ଶିମିଳିପାଳର ମନଲୋଭା ପ୍ରାକୃତିକ ପରିବେଶ ସାଙ୍ଗକୁ ସୁଉଚ୍ଚ ବୃକ୍ଷର ଘଞ୍ଚ ଜଙ୍ଗଲ ପରିପୂର୍ଣ୍ଣ ସବୁଜିମା ଆକର୍ଷିତ କରେ ପର୍ଯ୍ୟଟକଙ୍କୁ। ଏହାରି ମଧ୍ୟରେ ଅପୂର୍ବ ଶୋଭା ଓ ସୁଷମାର ଗନ୍ତାଘର ପାଲଟିଛି ‘ବ୍ରାହ୍ମଣକୁଣ୍ଡ’। ବାଙ୍ଗିରିପୋଷି ବ୍ଲକ ଚାକିଡ଼ି ପଞ୍ଚାୟତର ବଣ-ଜଙ୍ଗଲ ଘେରା ପାହାଡ଼ିଆ ରାସ୍ତାର ଅଙ୍କାବଙ୍କା ପଥ ଦେଇ ରହିଛି ଏହାର ସ୍ଥିତି। ଚତୁର୍ଦ୍ଦିଗରେ ପରିବେଷ୍ଟିତ ହୋଇଛି ବୃହଦାକାୟ ପଥର ଏବଂ ତା’ ମଧ୍ୟରେ ପାହାଡ଼ିଆ ଝରଣା। ଝରଣାର କାଚକେନ୍ଦୁ ପାଣି ଉପରୁ ଝରି ପଡ଼ି ତଳେ ଜମା ହେବା ପରେ ସୃଷ୍ଟି ହୋଇଛି ଏକ ବିରାଟ ପାଣିକୁଣ୍ଡ। ଆଉ ସେହି କୁଣ୍ଡରେ ଶୋଭା ମଣ୍ଡନ କରୁଛନ୍ତି ଦୀର୍ଘବର୍ଷ ଧରି ସଂରକ୍ଷିତ ରହିଥିବା ଶହ ଶହ ବଡ଼ ମାଛ। ନୀଳ ରଙ୍ଗର ଶୀତଳ ଜଳରାଶି ମଧ୍ୟରେ ମାଛଙ୍କ ପହଁରିବା ଦୃଶ୍ୟ ଦେଖଣାହାରୀଙ୍କ ପାଇଁ ପାଲଟିଯାଏ ଅଭୁଲା ସ୍ମୃତି। ନିକଟସ୍ଥ ପାହାଡ଼ ମଧ୍ୟରେ ରହିଛି ଆରାଧ୍ୟ ଦେବୀଦେବଙ୍କ ଏକ ପୂଜାସ୍ଥଳୀ। ଆଦିବାସୀ-ଦେହୁରୀ ପରମ୍ପରାରେ ସେଠାରେ ପ୍ରତ୍ୟେକ ଦିନ ପୂଜା କରାଯାଏ। ଆଖପାଖ ୩ଟି ଗ୍ରାମର ଗ୍ରାମବାସୀ ମିଳିତ ଭାବେ ବାବା ବାଘଜୋଡ଼ା ପୂଜା କମିଟି ଗଠନ କରି ଉକ୍ତ ସ୍ଥାନର ବିକାଶ ପାଇଁ ସଂଗ୍ରାମ ଜାରି ରଖିଛନ୍ତି। ସ୍ଥାନଟିର ରକ୍ଷଣାବେକ୍ଷଣ ସହିତ ପର୍ଯ୍ୟଟକଙ୍କ ସୁରକ୍ଷା ନିମନ୍ତେ ପ୍ରତିଦିନ ସକାଳୁ ସନ୍ଧ୍ୟା ପର୍ଯ୍ୟନ୍ତ ଉକ୍ତ କମିଟିର ଉପସ୍ଥିତି ଦେଖିବାକୁ ମିଳିଥାଏ। ରାତ୍ରି ଯାପନ ପାଇଁ ଶିମିଳିପାଳ ରିସୋର୍ଟ, ଖଇରି ରିସୋର୍ଟ ସହ ହୋଟେଲ ବାଙ୍ଗିରିପୋଷୀ ନାମକ ୩ଟି ଲଜିଂ ବ୍ୟବସ୍ଥା ରହିଛି।
କେମିତି ଯିବେ
ବାରିପଦାଠାରୁ ଏହି ସ୍ଥାନର ଦୂରତା ୬୦ କି.ମି.। ଭୁବନେଶ୍ୱର-ବାଙ୍ଗିରିପୋଷି ସୁପରଫାଷ୍ଟ ଟ୍ରେନ୍ ଯୋଗେ ଆସି ବାଙ୍ଗିରିପୋଷିରେ ଓହ୍ଲାଇ ହେବ। ବାଙ୍ଗିରିପୋଷି ବଜାରରୁ ବ୍ରାହ୍ମଣକୁଣ୍ଡ ଯିବା ପାଇଁ ସବୁ ସମୟରେ ଟ୍ୟାକ୍ସି ଓ ଅଟୋ ଉପଲବ୍ଧ ରହିଥାଏ। ଏହି ବଜାରଠାରୁ ୨ଟି ରାସ୍ତା ଦେଇ ଯିବାକୁ ପଡ଼ିଥାଏ। କୁସୁମବନ୍ଧ ପଞ୍ଚାୟତ ଦେଇ ୨୦ କି.ମି. ଓ ସୋରିଷପାଳ ଦେଇ ୩୫ କି.ମି. ପର୍ଯ୍ୟନ୍ତ ଦୂରତା ଅତିକ୍ରାନ୍ତ କରିବାକୁ ପଡ଼ିଥାଏ। ୪୯ ନଂ. ଜାତୀୟ ରାଜପଥରେ ବାଙ୍ଗିରିପୋଷି ଅବସ୍ଥିତ ଥିବାରୁ ଏଠାକୁ ସବୁ ସ୍ଥାନରୁ ଯାତ୍ରୀବାହୀ ଯାନର ଚଳପ୍ରଚଳ ସୁବିଧା ରହିଛି।
– ରିପୋର୍ଟ: ନୀଳାଦ୍ରି ବିହାରୀ ଦଣ୍ଡପାଟ, ବାରିପଦା ଅଫିସ
