ଟୁର୍ନାମେଣ୍ଟରୁ ଏଲିମିନେଟ୍ ହେବାର ଦ୍ୱାରଦେଶରୁ ଅପ୍ରତ୍ୟାଶିତ ଭାବେ ପ୍ରତ୍ୟାବର୍ତ୍ତନ କରିଥିଲା ପାକିସ୍ତାନ। ନେଦରଲାଣ୍ଡ୍ସ ନିକଟରୁ ଦକ୍ଷିଣ ଆଫ୍ରିକା ପରାଜିତ ହୋଇ ନ ଥିଲେ ଏବେ ସେମିଫାଇନାଲ ଲାଇନ୍ଅପ୍ ଭିନ୍ନ ଧରଣର ହୋଇଥାନ୍ତା। ଦକ୍ଷିଣ ଆଫ୍ରିକା ଏହାର କ୍ରିକେଟ ଇତିହାସରେ ସବୁଠାରୁ ବଡ଼ ବିପର୍ଯ୍ୟୟର ସମ୍ମୁଖୀନ ହୋଇ ନେଦରଲାଣ୍ଡ୍ସଠାରୁ ମାତ୍ର ୧୩ ରନ୍ରେ ହାରିଯିବା ଦ୍ୱାରା ବିଦାୟ ପଥରେ ଥିବା ପାକିସ୍ତାନ ପାଇଁ ସୁଯୋଗ ସୃଷ୍ଟି ହୋଇଥିଲା। ଶେଷ ଗ୍ରୁପ୍ ମ୍ୟାଚ୍ରେ ଦଳକୁ ଭାଗ୍ୟ ମଧ୍ୟ ସାଥ୍ ଦେଇଥିଲା। ପ୍ରତିଦ୍ୱନ୍ଦ୍ୱୀ ବାଂଲାଦେଶ ଦକ୍ଷତାଠାରୁ ନିମ୍ନଧରଣର ପ୍ରଦର୍ଶନ କରିଥିଲା। ସେମିଫାଇନାଲରେ ପହଞ୍ଚତ୍ ଯାଇଥିବାରୁ ପାକିସ୍ତାନ ପାଇଁ ଏବେ ଶ୍ରେଷ୍ଠ ପ୍ରଦର୍ଶନ ଦେବାର ସମୟ ଆସିଛି। ଭାରତଠାରୁ ୪ ଉଇକେଟରେ ଏବଂ ଜିମ୍ବାଓ୍ବେ ନିକଟରୁ ୧ ରନ୍ରେ ହାରିଯିବା ପରେ ପାକିସ୍ତାନର ଆଶା ମଉଳିଥିଲା। ମାତ୍ର ପରବର୍ତ୍ତୀ ୩ ମ୍ୟାଚ୍ରେ ଯଥାକ୍ରମେ ନେଦରଲାଣ୍ଡ୍ସ, ଦକ୍ଷିଣ ଆଫ୍ରିକା ଓ ବାଂଲାଦେଶକୁ ହରାଇ ଦଳ ବଡ଼ ମୁକାବିଲାରେ ପହଞ୍ଚତ୍ୟାଇଛି। ଟୁର୍ନାମେଣ୍ଟର ଅନ୍ୟତମ ସଫଳ ଦଳ ହେଉଛି ପାକିସ୍ତାନ। ଏହି ଦଳ ୨୦୦୭ ପ୍ରଥମ ସଂସ୍କରଣରେ ଭାରତଠାରୁ ହାରି ରନରଅପ୍ ହୋଇଥିଲେ ହେଁ ପରବର୍ତ୍ତୀ ୨୦୦୯ ଦ୍ୱିତୀୟ ସଂସ୍କରଣରେ ଚାମ୍ପିୟନ ହେବାର ସୌଭାଗ୍ୟ ପାଇଥିଲା। କେବଳ ସେତିକି ନୁହେଁ ଏହି ଦଳ ୨୦୧୦, ୨୦୧୨ ଓ ୨୦୨୧ରେ ସେମିଫାଇନାଲ ମଧ୍ୟ ଖେଳିଥିଲା।
ଅଧିନାୟକ ବାବର ଆଜମଙ୍କ ବିଫଳତା ଦଳକୁ ଚିନ୍ତାରେ ପକାଇଛି। ବାବର ୫ଟି ମ୍ୟାଚ୍ ଖେଳି ଏପର୍ଯ୍ୟନ୍ତ ମାତ୍ର ୭.୮୦ ଆଭରେଜ୍ରେ ୩୯ ରନ୍ କରିପାରିଛନ୍ତି। ଅନ୍ୟତମ ଓପ୍ନର ମହମ୍ମଦ ରିଜ୍ଓ୍ବାନ ମଧ୍ୟ ୨୦.୬୦ ଆଭରେଜ୍ରେ ୧୦୩ ରନ୍ କରିପାରିଛନ୍ତି। ଶାନ୍ ମାସୁଦ ସର୍ବାଧିକ ୧୩୪ ରନ୍ ସଂଗ୍ରହ କରିଛନ୍ତି। ଇଫ୍ତିକାର ଅହମଦ ଓ ଶଦାବ ଖାଁ ମଧ୍ୟ ଭଲ ଯୋଗଦାନ ଦେଇଛନ୍ତି। ବୋଲିଂରେ ଶଦାବ ସର୍ବାଧିକ ୧୦, ଶାହିନ ଶାହା ଆଫ୍ରିଦୀ ୮, ମହମ୍ମଦ ଓ୍ବାସିମ ୭ ଓ ହାରିସ ରୌଫ ୬ଟି ଉଇକେଟ ନେଇଛନ୍ତି। ତେଣୁ ଆଗାମୀ ମ୍ୟାଚ୍ରେ ଟପ୍ ଅର୍ଡର କ୍ଲିକ୍ କରିବା ସହ ପାକିସ୍ତାନକୁ ଦଳଗତ ପ୍ରଦର୍ଶନ ଦେବାକୁ ହେବ। ଗ୍ରୁପ୍ ପର୍ଯ୍ୟାୟ ଅପେକ୍ଷା ଏହି ଦଳ ନକ୍ଆଉଟ ମ୍ୟାଚ୍ଗୁଡ଼ିକରେ ବିପଜ୍ଜନକ ସାବ୍ୟସ୍ତ ହୋଇଥିବା ଇତିହାସ ରହିଛି। ତେଣୁ ନ୍ୟୁଜିଲାଣ୍ଡକୁ ଆଗାମୀ ମ୍ୟାଚ୍ ସତର୍କତାର ସହ ଖେଳିବାକୁ ହେବ।
