ନୂଆଦିଲ୍ଲୀ,୧୨ା୮: ମାତ୍ର ୨ ମିନିଟ୍ ୧୮ ସେକେଣ୍ଡର ଅନ୍ଧାର ଦେଖିବା ପାଇଁ ଲୋକମାନେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରୁଛନ୍ତି । ଆଜି ଅର୍ଥାତ୍ ଅଗଷ୍ଟ ୧୨ରେ ହେବାକୁ ଥିବା ସୂର୍ଯ୍ୟପରାଗ (Total Solar Eclipse) ପାଇଁ ୟୁରୋପରେ ଅନେକ ସ୍ୱତନ୍ତ୍ର ବିମାନ ଉଡ଼ାଣର ବ୍ୟବସ୍ଥା କରାଯାଇଛି । ଏହି ବିମାନଗୁଡ଼ିକରେ ଯାତ୍ରୀମାନଙ୍କ ସହିତ ଜ୍ୟୋତିର୍ବିଦମାନେ (Astronomers) ଏବଂ ଏଷ୍ଟ୍ରୋ-ଫଟୋଗ୍ରାଫରମାନେ ମଧ୍ୟ ଉପସ୍ଥିତ ରହିବେ।
ଏହି ଉଡ଼ାଣଗୁଡ଼ିକର ମୁଖ୍ୟ ଉଦ୍ଦେଶ୍ୟ ହେଉଛି ମେଘଠାରୁ ବହୁ ଉପରକୁ ଯାଇ ସୂର୍ଯ୍ୟପରାଗର ଏକ ସ୍ପଷ୍ଟ ଦୃଶ୍ୟ ଦେଖିବା। କେତେକ ବିମାନର ରୁଟ୍ ମଧ୍ୟ ଏପରି ଭାବରେ ପ୍ରସ୍ତୁତ କରାଯାଇଛି ଯେପରି ଯାତ୍ରୀମାନେ ଝରକା ଦେଇ ସୂର୍ଯ୍ୟ, ଚନ୍ଦ୍ରଙ୍କ ଛାୟା ଏବଂ ଆକାଶରେ ସୃଷ୍ଟି ହେଉଥିବା ଦୁର୍ଲଭ ଦୃଶ୍ୟଗୁଡ଼ିକୁ ସହଜରେ ଦେଖିପାରିବେ।NASAର ସୂଚନା ଅନୁଯାୟୀ, ପୂର୍ଣ୍ଣ ସୂର୍ଯ୍ୟପରାଗର ପଥ ଉତ୍ତର ରୁଷିଆରୁ ଆରମ୍ଭ ହୋଇ ଗ୍ରୀନଲ୍ୟାଣ୍ଡ, ଆଇସଲ୍ୟାଣ୍ଡ, ଆଟଲାଣ୍ଟିକ ମହାସାଗର ଏବଂ ସ୍ପେନ୍ ଦେଇ ଗତି କରିବ । ଉତ୍ତର-ପୂର୍ବ ପର୍ତ୍ତୁଗାଲର ଏକ କ୍ଷୁଦ୍ର ଅଂଶରେ ମଧ୍ୟ ଏହା ସମ୍ପୂର୍ଣ୍ଣ ଭାବରେ ଦୃଶ୍ୟମାନ ହେବ। ୟୁରୋପ, କାନାଡ଼ା, ଉତ୍ତର ଆମେରିକା ଏବଂ ଉତ୍ତର-ପଶ୍ଚିମ ଆଫ୍ରିକାର ବୃହତ ଅଞ୍ଚଳରେ ଆଂଶିକ ସୂର୍ଯ୍ୟପରାଗ ଦେଖିବାକୁ ମିଳିବ। ତେବେ ଭାରତରେ ଏହି ସୂର୍ଯ୍ୟୋପରାଗ ଦେଖାଯିବ ନାହିଁ।
ଏକ ରିପୋର୍ଟ ଅନୁଯାୟୀ, ବ୍ରସେଲ୍ସ ଏୟାରଲାଇନ୍ସର (Brussels Airlines) ସ୍ୱତନ୍ତ୍ର ଉଡ଼ାଣର ଟିକେଟ୍ ମୂଲ୍ୟ ପ୍ରାୟ ୩୫୦ ଡଲାର ରଖାଯାଇଥିଲା। ASL Group ର Embraer E135 ଫ୍ଲାଇଟରେ ପ୍ରତି ଯାତ୍ରୀଙ୍କ ପାଇଁ ମୂଲ୍ୟ ପ୍ରାୟ ୯୨୦ ଡଲାର ପର୍ଯ୍ୟନ୍ତ ଥିଲା। ସେହିପରି କେତେକ ସ୍ୱତନ୍ତ୍ର ପ୍ୟାକେଜରେ ମୂଲ୍ୟ ପ୍ରାୟ ୧,୨୦୦ ଡଲାର ଅର୍ଥାତ୍ ପ୍ରାୟ ୧ ଲକ୍ଷ ଟଙ୍କା ପର୍ଯ୍ୟନ୍ତ ରହିଥିବା କୁହାଯାଉଛି।ଏୟାର ଚାର୍ଟର ସର୍ଭିସ ମଧ୍ୟ ଯାତ୍ରୀମାନଙ୍କ ପାଇଁ ଏକ ସ୍ୱତନ୍ତ୍ର ଏକ୍ଲିପ୍ସ ଚାର୍ଟର ପ୍ୟାକେଜ୍ (eclipse charter package) ପ୍ରସ୍ତୁତ କରିଛି। ଏହାର ପ୍ରାରମ୍ଭିକ ମୂଲ୍ୟ ପ୍ରତି ବ୍ୟକ୍ତି ପିଛା ୮୯୯ ପାଉଣ୍ଡ ଥିବା କୁହାଯାଇଛି। ଏଥିରେ ଉଡ଼ାଣ ସହିତ ପରାଗ ଦେଖିବା ସ୍ଥାନରେ ପହଞ୍ଚିବାର ବ୍ୟବସ୍ଥା ମଧ୍ୟ ଅନ୍ତର୍ଭୁକ୍ତ।
ଏକ ସମ୍ପୂର୍ଣ୍ଣ ପ୍ରାଇଭେଟ୍ ଜେଟ୍ ବୁକ୍ କରିବାର ଖର୍ଚ୍ଚ ଏହାଠାରୁ ବହୁତ ଅଧିକ ହୋଇପାରେ। ତଥାପି, ବିମାନ, ରୁଟ୍ ଏବଂ ସୁବିଧା ବିଷୟରେ ଜାଣି ନଥିଲେ ୫୦,୦୦୦ ଡଲାରର ମୂଲ୍ୟକୁ ଏକ ପ୍ରମାଣିତ ତଥ୍ୟ କୁହାଯାଇପାରିବ ନାହିଁ।
