ଟୋକିଓ,୧୦।୭(ଏପି): ଅଲିମ୍ପିକ୍ ମଶାଲ ରାଲି ଟୋକିଓରେ ପହଞ୍ଚିଛି। ଆୟୋଜକମାନେ ଶୁକ୍ରବାର ଏଥିପାଇଁ ଏକ ଜ୍ୟୋତି ଅନାବରଣ ତଥା ପ୍ରଜ୍ୱଳନ ଉତ୍ସବ ପାଳନ କରିଛନ୍ତି। ଏଥିସହ ଟୋକିଓରେ ମଶାଲ ରାଲି ଆରମ୍ଭ ହୋଇଛି। କୋଭିଡ୍-୧୯ କାରଣରୁ ଟୋକିଓରେ ସରକାର ଷ୍ଟେଟ୍ ଇମର୍ଜେନ୍ସି ଜାରି କରିବାର ଗୋଟିଏ ଦିନ ପରେ ଏହି ଉତ୍ସବ ପାଳନ କରାଯାଇଛି।
କରୋନା ସଂକ୍ରମଣ କାରଣରୁ ଟୋକିଓ ସଡ଼କରେ ଏହି ମଶାଲ ରାଲି ଆୟୋଜନ କରାଯାଇ ନ ଥିଲା। ଏହା ଟୋକିଓ ଉପକୂଳର ସୁଦୂର ଦ୍ୱୀପଗୁଡିକରେ ଆୟୋଜନ କରାଯାଇଥିଲା। ମାର୍ଚ୍ଚରୁ ଉତ୍ତର ପୂର୍ବାଞ୍ଚଳ ଜାପାନରେ ଆରମ୍ଭ ହୋଇଥିବା ଏହି ରାଲିର କାର୍ଯ୍ୟକ୍ରମରେ ବାରମ୍ବାର ପରିବର୍ତ୍ତନ କରାଯାଇଥିଲା।
ଉଦ୍ଘାଟନୀ ଉତ୍ସବରେ ମଶାଲ କିଭଳି ଷ୍ଟାଡିୟମରେ ପ୍ରବେଶ କରିବ ସେ ନେଇ କିଛି କୁହାଯାଇ ନାହିଁ। ଟୋକିଓସ୍ଥିତ ଷ୍ଟାଡିୟମ ଓ ଏରିନାଗୁଡିକର ଆଖପାଖ ଅଞ୍ଚଳରେ ପ୍ରଶଂସକଙ୍କୁ ବାରଣ କରାଯାଇଛି। ପୂର୍ବରୁ କେତେମାସ ପୂର୍ବରୁ ବିଦେଶୀ ଦର୍ଶକଙ୍କୁ ମଧ୍ୟ ବାରଣ କରାଯାଇଥିଲା। ଉଭୟ ଇନ୍ଡୋର ଓ ଆଉଟଡୋର ଭେନ୍ୟୁଗୁଡିକରୁ ପ୍ରଶଂସକଙ୍କ ଉପସ୍ଥିତିକୁ ବ୍ୟାନ୍ କରାଯାଇଛି। ଟୋକିଓ ସମେତ କାନାଗାଓ୍ବା, ସାଇଟାମା ଓ ଚିବାରେ ମଧ୍ୟ ଦର୍ଶକଙ୍କୁ ବ୍ୟାନ କରାଯାଇଛି। ଜୁଲାଇ ୧୨ରୁ ଇମର୍ଜେନ୍ସି ଆରମ୍ଭ ହୋଇ ଅଗଷ୍ଟ ୨୨ ତାରିଖ ପର୍ଯ୍ୟନ୍ତ ବଳବତ୍ତର ରହିବ। ଜୁଲାଇ ୨୩ରୁ ଆରମ୍ଭ ହୋଇ ଅଲିମ୍ପିକ୍ସ ଅଗଷ୍ଟ ୮ ତାରିଖରେ ଶେଷ ହେବ। ପାରା ଅଲିମ୍ପିକ୍ସ ଅଗଷ୍ଟ ୨୪ରୁ ଆରମ୍ଭ ହେବ।
