ରାଜନଗର,୭ା୫(ଭାସ୍କର ରାଉତରାୟ): କେନ୍ଦ୍ରାପଡ଼ା ଜିଲା ରାଜନଗର ବିଧାନସଭା ନିର୍ବାଚନମଣ୍ଡଳୀରେ ନେତାଙ୍କ ଦଳ ବଦଳ ରାଜନୈତିକ ଦୃଶ୍ୟପଟରେ ପରିବର୍ତ୍ତନ ଆଣିଛି। ଏଠାରେ ବିଧାୟକ ଧ୍ରୁବ ସାହୁଙ୍କୁ ବିଜେଡି ପୁଣି ଥରେ ପ୍ରାର୍ଥୀ କରିଛି। ଅପରପକ୍ଷରେ କଂଗ୍ରେସରୁ ଅଶୋକ କୁମାର ପ୍ରତିହାରୀ ଓ ଭାଜପାରୁ ଲଳିତ କୁମାର ବେହେରା ପ୍ରାର୍ଥୀ ହୋଇଛନ୍ତି। ୨୦୧୪ରେ ଏହି ଆସନରେ କଂଗ୍ରେସ ପ୍ରାର୍ଥୀ ଅଂଶୁମାନ ମହାନ୍ତି ବିଜେଡି ପ୍ରାର୍ଥୀ ଧ୍ରୁବ ସାହୁଙ୍କୁ ହରାଇ ବିଧାୟକ ହୋଇଥିଲେ। ୨୦୧୯ରେ ଅଂଶୁମାନଙ୍କୁ ହରାଇ ଧ୍ରୁବ ବାଜି ମାରିନେଇଥିଲେ। ଏହି ଦୁଇ ପ୍ରତିଦ୍ୱନ୍ଦ୍ୱୀ ଏବେ ଗୋଟିଏ ଦଳରେ। ଅଂଶୁମାନ କଂଗ୍ରେସ ଛାଡ଼ି ବିଜେଡିରେ ଯୋଗଦେବା ପରେ ତାଙ୍କୁ ଦଳ କେନ୍ଦ୍ରାପଡ଼ା ଲୋକ ସଭା ଆସନ ନିମନ୍ତେ ପ୍ରାର୍ଥୀ କରିଛି। ଏହାପରେ ଧ୍ରୁବ ଦୀର୍ଘଦିନର ଶତ୍ରୁତା ଭୁଲି ଅଂଶୁମାନଙ୍କୁ ସ୍ବାଗତ କରିବା ସହ ଉଭୟ ଏକ ହୋଇଛନ୍ତି। ସେମାନେ ବିଭିନ୍ନ ପଞ୍ଚାୟତରେ ମିଶ୍ରଣ ପର୍ବ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱ ପ୍ରତି ପୂର୍ଣ୍ଣ ଆସ୍ଥା ପ୍ରକଟ କରିବାକୁ ପ୍ରଚାର ଜୋର୍ଦାର କରୁଛନ୍ତି। ଉଭୟଙ୍କୁ ଗୋଟିଏ ମଞ୍ଚରେ ଦେଖି ରାଜନଗରବାସୀ ଆଲୋଚନା କରୁଛନ୍ତି ଯେ, ରାଜନୀତିରେ ମିତ୍ରତା ଓ ଶତ୍ରୁତା ସମୁଦ୍ରର ଢେଉ ଭଳି ସ୍ଥିର ନୁହେଁ। ଉଭୟଙ୍କୁ ଉଦାହରଣ ଦେଇ କାଲିର ବିରୋଧୀ ଆଜି ଭାଇ-ଭାଇ ବୋଲି ସେମାନେ ଚର୍ଚ୍ଚା କରୁଛନ୍ତି।
ଦଳ ଏକ, କାର୍ଯ୍ୟାଳୟ ଦୁଇ
ଅଂଶୁମାନ ବିଜେଡିରେ ମିଶିବା ପରେ ତାଙ୍କ ବାପା ନଳିନୀକାନ୍ତ ମହାନ୍ତିଙ୍କ କଂଗ୍ରେସ କାର୍ଯ୍ୟାଳୟର ଦୃଶ୍ୟକୁ ପରିବର୍ତ୍ତନ କରିଛନ୍ତି। ଶଙ୍ଖ ଚିହ୍ନ ସହ ମୁଖ୍ୟମନ୍ତ୍ରୀଙ୍କ ସମେତ ବରିଷ୍ଠ ନେତାଙ୍କ ଫଟୋ ଥିବା ବ୍ୟାନର ଉକ୍ତ କାର୍ଯ୍ୟାଳୟରେ ଲଗାଯାଇଛି। ଏହାଛଡ଼ା ବିଜେଡି ପତାକା ଦ୍ୱାରା ଅଫିସ ଛାଇ ହୋଇଯାଇଛି। ଅପରପକ୍ଷରେ ରାଜନଗର ଉପକଣ୍ଠରେ ବିଧାୟକ ଧ୍ରୁବ ସାହୁ, ସାଂସଦ ପ୍ରାର୍ଥୀ ଅଂଶୁମାନ ମହାନ୍ତି ଏବଂ ମୁଖ୍ୟମନ୍ତ୍ରୀଙ୍କ ଫଟୋ ସମ୍ବଳିତ ବ୍ୟାନର ଲଗାଯାଇଥିବା ବିଜେଡିର ପୁରୁଣା କାର୍ଯ୍ୟାଳୟ ରହିଛି।
ଧ୍ରୁବଙ୍କ ପୂର୍ବତନ ସହଯୋଗୀ ଏବେ କଂଗ୍ରେସ ପ୍ରାର୍ଥୀ
୨୦୦୭ରୁ ବିଧାୟକ ଧ୍ରୁବ ସାହୁ ତାଙ୍କ ରାଜନୈତିକ ପତିଆରାକୁ ବଢ଼ାଇବା ପାଇଁ ଯେଉଁ କେତେଜଣ ଯୁବକଙ୍କୁ ଆପଣେଇଥିଲେ, ସେମାନଙ୍କ ମଧ୍ୟରେ ବିଜେଡିର ପୂର୍ବତନ ବ୍ଲକ ସଭାପତି ତଥା ଜିଲା ପରିଷଦ ଉପାଧ୍ୟକ୍ଷ ଅଶୋକ କୁମାର ପ୍ରତିହାରୀ ରହିଥିଲେ। ୨୦୧୨, ୨୦୧୭, ୨୦୨୨ ପଞ୍ଚାୟତ ନିର୍ବାଚନରେ ତାଙ୍କୁ ଧ୍ରୁବ ଅଧିକ ଗୁରୁତ୍ୱ ଦେଇ ସାଙ୍ଗଠନିକ ମଙ୍ଗ ଧରାଇଥିଲେ। ଏପରିକି ୨୦୨୨ ପଞ୍ଚାୟତ ନିର୍ବାଚନ ପରେ ଅଶୋକଙ୍କୁ କେନ୍ଦ୍ରାପଡ଼ା ଜିଲା ପରିଷଦ ଉପାଧ୍ୟକ୍ଷ କରିବାରେ ଧ୍ରୁବଙ୍କ ପ୍ରମୁଖ ଭୂମିକା ରହିଥିଲା। ପରବର୍ତ୍ତୀ ସମୟରେ ଦଳବିରୋଧୀ କାର୍ଯ୍ୟ ପାଇଁ ଅଶୋକଙ୍କୁ ଦଳରୁ ବହିଷ୍କାର କରାଯାଇଥିଲା। ସେ କଂଗ୍ରେସରେ ମିଶିବା ପରେ ଦଳ ପକ୍ଷରୁ ତାଙ୍କୁ ପ୍ରାର୍ଥୀ କରାଯାଇଛି। ଏବେ ଗୁରୁ ଓ ଶିଷ୍ୟଙ୍କ ଲଢ଼େଇ ଏଠାରେ ବେଶ୍ ଆଲୋଚ୍ୟର ବିଷୟ ହୋଇଛି।
ନିର୍ଣ୍ଣାୟକ ହେବେ ବଙ୍ଗଭାଷୀ ଭୋଟର
ରାଜନଗର ନିର୍ବାଚନମଣ୍ଡଳୀର ବଙ୍ଗୀୟ ଅଧ୍ୟୁଷିତ ଅଞ୍ଚଳ ଭାବେ ଡାଙ୍ଗମାଳ, ଖମାରସାହି, କୃଷ୍ଣନଗର, ତାଳଚୁଆ, ରଙ୍ଗଣୀ, ବାଘମାରି ଓ କେରୁଅଁାପାଳ ପ୍ରଭୃତି ପଞ୍ଚାୟତରେ ପ୍ରାୟ ୯୦ ପ୍ରତିଶତ ବଙ୍ଗଭାଷୀ ବସବାସ କରୁଛନ୍ତି। ଚଳିତ ନିର୍ବାଚନରେ ଏହି ଅଞ୍ଚଳର ଲଳିତ କୁମାର ବେହେରାଙ୍କୁ ଭାଜପା ପ୍ରାର୍ଥୀ କରିଛି। ସେମାନଙ୍କ ଅଞ୍ଚଳରୁ ପ୍ରଥମକରି ଯୁବନେତା ଲଳିତ ନିର୍ବାଚନ ଲଢୁଥିବାରୁ ତାଙ୍କ ପ୍ରତି ବଙ୍ଗଭାଷୀ ଭୋଟରମାନଙ୍କର ଆନୁଗତ୍ୟ କେତେ ରହିବ, ତାହା ଜୁନ୍ ୪ରେ ସ୍ପଷ୍ଟ ହୋଇଯିବ।
