କାମାକ୍ଷାନଗର, ୧୦।୭(ସୁଧୀର ପରିଡ଼ା) : ପରିବା ଚାଷ ପାଇଁ ସୁନାମ ଅର୍ଜନ କରିଛି ଢେଙ୍କାନାଳ ଜିଲାର କାମାକ୍ଷାନଗର। ବ୍ଲକର ସୋଗର, ସମାଟାଙ୍ଗୀ, ଭଗୀରଥପୁର, ଜଗନ୍ନାଥପୁର, ଅଁଳାବେରେଣି, ତୁମୁସିଙ୍ଗା ଆଦି ଅଞ୍ଚଳରେ ଉତ୍ପାଦିତ ହେଉଥିବା ପରିବା ବର୍ଷର ଅଧିକାଂଶ ସମୟ ଖାଉଟିଙ୍କ ଚାହିଦା ମେଣ୍ଟାଇଥାଏ। ଏହାକୁ ବାଦ୍ଦେଲେ କଙ୍କଡ଼ାହାଡ଼, ଭୁବନ ବ୍ଲକ, ପଡ଼ୋଶୀ ଅନୁଗୋଳ ଜିଲାରୁ ମଧ୍ୟ ପରିବା ଆମଦାନୀ ହୋଇ ଆସିଥାଏ। ତେବେ ମୌସୁମୀ ଋତୁରେ ଲଘୁଚାପଜନିତ ଲଗାଣ ବର୍ଷାରେ ପରିବା ଚାଷ ଉଜୁଡ଼ିଯିବା ପରେ ଦର ଆକାଶଛୁଅଁା ହୋଇଯାଇଛି। ବିଶେଷକରି ଟମାଟୋ କିଣିବା ବେଳକୁ ଭାବିବାକୁ ବାଧ୍ୟ ହେଉଛନ୍ତି ଖାଉଟି।
କାମାକ୍ଷାନଗର ସହରରେ ଛୋଟ ବଡ଼ ୩୦ରୁ ୩୫ଟି ପରିବା ଦୋକାନ ରହିଛି। ଦର ବୃଦ୍ଧି ପୂର୍ବରୁ ପରିବା ବ୍ୟବସାୟୀମାନେ ଦୈନିକ ୨୦ କୁଇଣ୍ଟାଲ ଟମାଟୋ ବିକ୍ରି କରୁଥିଲେ। ଏବେ ଏହା ୩ କୁଇଣ୍ଟାଲକୁ ଖସିଆସିଛି। ଏବେ ଏହାର ବଜାର ଦର ୧୦୦ରୁ ୧୧୦ ଟଙ୍କା ରହିଛି। ଓଡ଼ିଶାରେ ବର୍ଷାଦିନେ ଟମାଟୋ ଚାଷ ମୁଖ୍ୟତଃ ହୁଏନାହିଁ। ତେଣୁ ବେଙ୍ଗାଲୁରୁରୁ ଆମଦାନୀ ହୋଇ ଆସୁଥିବାରୁ ଏଭଳି ଅସ୍ବାଭାବିକ ସ୍ଥିତି ସୃଷ୍ଟି ହୋଇଛି। ଦୈନିକ ୧ କୁଇଣ୍ଟାଲ ଟମାଟୋ ବିକ୍ରି କରୁଥିବା ପରିବା ବ୍ୟବସାୟୀ ବ୍ରହ୍ମାନନ୍ଦ ସାହୁଙ୍କ ପକ୍ଷେ ଏବେ ୩୦ କେଜି ବିକ୍ରି କରିବା କଷ୍ଟକର ହୋଇପଡୁଥିବା ସେ କହିଛନ୍ତି।
କେବଳ ଏତିକି ନୁହେଁ, ଟମାଟୋ ଉପରେ ନିର୍ଭରଶୀଳ ଢାବା, ହୋଟେଲ ମାଲିକ ଚାଟ୍ ବ୍ୟବସାୟୀଙ୍କ ମଧ୍ୟ ଚିନ୍ତା ବଢ଼ିଯାଇଛି। ପରିବା ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ଦର ବୃଦ୍ଧି ପାଇଁ ଲାଭ ଅଧିକ ହେଉ ନ ଥିବାରୁ ଅନେକେ ହୋଟେଲ ବନ୍ଦ କରିଦେବେ ବୋଲି ଯୋଜନା କଲେଣି। ଏ ସମ୍ପର୍କରେ ସହରର ଅନ୍ୟତମ ପ୍ରତିଷ୍ଠିତ ଢାବା ମାଲିକ ସୌମ୍ୟରଞ୍ଜନ ସାହୁ କୁହନ୍ତି, ଢାବାରେ ଯଦିଓ ଟମାଟୋ ଅଧିକ ବ୍ୟବହାର ହୁଏ ନାହିଁ, ତେବେ ସାଲାଡ୍, ଗ୍ରାହକଙ୍କ ଚାହିଦା ଅନୁଯାୟୀ ରେସିପି ପ୍ରସ୍ତୁତ କରିବା ବେଳେ ଏହା ଦରକାର ହୋଇଥାଏ। ତେବେ ପରିବା ଅଧିକ ଆସେ। ଏବେ ଦର ଏମିତି ହୋଇଛି ଯେ, ଆଳୁ ବ୍ୟବହାର ଅଧିକ ହେଉଛି। ଏଭଳି କିଛିଦିନ ଲାଗି ରହିବ।
