ଟୋକିଓ,୧।୯:ଟୋକିଓ ପାରାଲିମ୍ପିକ୍ସରେ ଭାରତର ସିହଂରାଜ ଆଧାନା ପୁରୁଷ ୧୦ ମିଟର ଏୟାର ପିସ୍ତଲ ଇଭେଣ୍ଟ ଏସ୍ଏଚ୍-୧ର ଫାଇନାଲରେ ବ୍ରୋଞ୍ଜ ପଦକ ଜିତି ଇତିହାସ ସୃଷ୍ଟି କରିଛନ୍ତି। ସେ ୨୧୬.୮ ପଏଣ୍ଟ ସହ ଏହି ପଦକ ଜିତିଛନ୍ତି। ଏହି ଐତିହାସିକ ସଫଳତା ପରେ ସମସ୍ତେ ତାଙ୍କୁ ପ୍ରଶଂସା କରୁଛନ୍ତି। ବ୍ରୋଞ୍ଜ ପଦକ ଜିତିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ତାଙ୍କୁ ଅଭିନନ୍ଦନ ଜଣାଇଛନ୍ତି। ହରିୟାଣାର ବାହାଦୂରଗଡର ଶୁଟର ସିଂହରାଜଙ୍କ ଯାତ୍ରା ଟୋକିଓ ପାରାଲିମ୍ପିକ୍ସ ପର୍ଯ୍ୟନ୍ତ ସହଜ ନ ଥିଲା। ଏହି ଯାତ୍ରା ସମୟରେ ତାଙ୍କୁ ଅନେକ କଷ୍ଟ ଅତିକ୍ରମ କରିବାକୁ ପଡିଲା।
ଅକ୍ଷମତା ତାଙ୍କୁ କେବେ ଶୁଟର ହେବାକୁ ଅଟକାଇ ନ ଥିଲା। ଆର୍ଥିକ ପ୍ରତିବନ୍ଧକ ହେତୁ ସେ ତାଲିମ ଜାରି ରଖିବା ଏବଂ ପରିବାରକୁ ସାହାଯ୍ୟ କରିବା ପାଇଁ ଅନେକ ଅସୁବିଧାର ସମ୍ମୁଖୀନ ହୋଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦେଇଥିବା ଏକ ସାକ୍ଷାତକାରରେ ସିଂହରାଜ କହିଥିଲେ ଯେ, ଶୁଟର ହେବାର ସ୍ବପ୍ନକୁ ପୂରଣ କରିବା ପାଇଁ ତାଙ୍କ ସ୍ତ୍ରୀଙ୍କୁ ଅଳଙ୍କାର ବିକ୍ରି କରିବାକୁ ପଡ଼ିଥିଲା। ଶୁଟିଂ ଏକ ମହଙ୍ଗା ଖେଳ ଏବଂ ଏହା ମୋ ପାଇଁ ସହଜ ନ ଥିଲା। ମୋର ଶୁଟିଂ ସ୍ବପ୍ନକୁ ପୂରଣ କରିବା ପାଇଁ ମୋ ସ୍ତ୍ରୀ ତାଙ୍କ ଅଳଙ୍କାର ବିକ୍ରି କରିଥିଲେ।
ମାର୍ଚ୍ଚ ୨୦୨୧ ରେ ସଂଯୁକ୍ତ ଆରବ ଏମିରେଟ୍ସରେ ଆୟୋଜିତ ପାରା ଶୁଟିଂ ବିଶ୍ୱକପରେ ପାରା ଆଥଲେଟ ସଂହରାଜ ସ୍ବର୍ଣ୍ଣ ପଦକ ଜିତିଥିଲେ। ସେ ପୁରୁଷ ୧୦ ମିଟର ଏୟାର ପିସ୍ତଲ ଏସ୍ଏଚ୍-୧ ଇଭେଣ୍ଟ ଫାଇନାଲରେ ଉଜବେକିସ୍ତାନର ସଭର୍ର୍ ଇବ୍ରାଗିମୋଭଙ୍କୁ ୨.୮ ପଏଣ୍ଟରେ ପରାସ୍ତ କରି ସ୍ବର୍ଣ୍ଣ ପଦକ ଜିତିଥିଲେ। ଏହା ପରେ ସିଂହରାଜଙ୍କ କାରଭାନ ଆଗକୁ ଯାଇ ଆଜି ଟୋକିଓ ଅଲିମ୍ପିକ୍ସରେ ପୁରୁଷ ୧୦ମିଟର ଏୟାର ପିସ୍ତଲ ଇଭେଣ୍ଟରେ ବ୍ରୋଞ୍ଜ ପଦକ ଜିତି ଦେଶ ପାଇଁ ପୁରସ୍କାର ଆଣିଛନ୍ତି।
