ଷ୍ଟକ୍ହାମ,୨୫।୫: ଜାପାନରେ ଏବେ କୋଭିଡ୍-୧୯ର ଚତୁର୍ଥ ଓ୍ବେଭ୍ ଚାଲିଛି। ଜୁଲାଇ ୨୩ ତାରିଖରେ ଆରମ୍ଭ ହେବାକୁ ଯାଉଥିବା ଅଲିମ୍ପିକ୍ସକୁ ଏହି ମହାମାରୀ ପାଇଁ ବାତିଲ କରିବା ନେଇ ତର୍କବିତର୍କ ଆରମ୍ଭ ହୋଇଛି। ଜାପାନ ନାଗରିକ ମଧ୍ୟ ଅଲିମ୍ପିକ୍ସ ଓ ପାରା ଅଲିମ୍ପିକ୍ସ ବାତିଲ କରିବାକୁ ବିକ୍ଷୋଭ, ଆନ୍ଦୋଳନ ଜାରି ରଖିଛନ୍ତି।
ଜାପାନରେ ୬୦ରୁ ୮୦ ପ୍ରତିଶତ ଲୋକ ଅଲିମ୍ପିକ୍ସ ବାତିଲ ହେବାକୁ କିମ୍ବା ସ୍ଥଗିତ ରଖିବାକୁ ଚାହାନ୍ତି ବୋଲି ଏକ ଓପିନିୟନ ପୁଲ୍ରୁ ଜଣାପଡିଛି। ତେଣୁ ଅଲିମ୍ପିକ୍ସ ବାତିଲ ହେବ କି ବୋଲି ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ମେଗା ଇଭେଣ୍ଟ ବାତିଲ ହେବ ବୋଲି ଚର୍ଚ୍ଚା ହେଉଥିଲେ ମଧ୍ୟ ପ୍ରତିଥର ଜାପାନ ସରକାର ଓ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ଏହାକୁ ଖଣ୍ଡନ କରିଆସୁଥିଲେ। ଏହି ବର୍ଷ ମଧ୍ୟ ଜାପାନରେ ସାଧାରଣ ନିର୍ବାଚନ ଆୟୋଜନ ହେବ। ଶିଞ୍ଜୋ ଆବେଙ୍କଠାରୁ ଦାୟିତ୍ୱ ଗ୍ରହଣ କରିବା ପରେ ପ୍ରଧାନମନ୍ତ୍ରୀ ୟୋଶିହାଇଡ ସୁଗା ଓ ଶାସକ ଦଳ ଲିବରାଲ ଡେମାକ୍ରାଟିକ ପାର୍ଟି (ଏଲ୍ଡିପି)ଙ୍କ ପାଇଁ ଏହା ଶୁଭ ଖବର ବିବେଚିତ ହୋଇନାହିଁ।
କୋଭିଡ୍-୧୯ ସଂକ୍ରମଣକୁ ରୋକିବାରେ ଅବଶ୍ୟ ଜାପାନ କିଛିମାତ୍ରରେ ସଫଳ ହୋଇଛି। ମହାମାରୀରେ ଜାପାନରେ ଏପର୍ଯ୍ୟନ୍ତ ୧୧, ୯୦୦ ଲୋକ ପ୍ରାଣ ହରାଇଛନ୍ତି। ଅନ୍ୟ ଦେଶ ତୁଳନାରେ ଦେଖିବାକୁ ଗଲେ ଏହା ସେତେ ଅଧିକ ନୁହେଁ ବୋଲି କୁହାଯାଇପାରେ। ମାସ୍କର ବହୁଳ ବ୍ୟବହାର, କଣ୍ଟାକ୍ଟ ଟ୍ରେସିଂ, ଠିକ୍ ସମୟରେ ଲକ୍ଡାଉନ୍ ହେବା ଦ୍ୱାର ଏହା ସମ୍ଭବ ହୋଇଛି। ଲୋକେ ଅଲିମ୍ପିକ୍ସ ଆୟୋଜନ ହେଉ ବୋଲି ଚାହୁଁ ନାହାନ୍ତି। ତେବେ ଏହାର ପ୍ରାସଙ୍ଗିକତା ରିହିଛି କି ଓ ଏହାକୁ କ’ଣ ସତରେ ଗୁରୁତ୍ୱ ଦିଆଯାଉଛି ବୋଲି ପ୍ରଶ୍ନ ଉଠିଛି। ବିରୋଧୀ ଦଳର ନେତାମାନେ ଅଲିମ୍ପିକ୍ସ ଆୟୋଜନକୁ ମଧ୍ୟ ବିରୋଧ କରୁଛନ୍ତି। ତେବେ ଜାପାନ ସରକାର ଓ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଏହି ମେଗା ଇଭେଣ୍ଟ ଆୟୋଜନ କରିବାକୁ ବଦ୍ଧପରିକର ବୋଲି ଘୋଷଣା କରିସାରିଛନ୍ତି। ଅଲିମ୍ପିକ୍ସ ଆୟୋଜନ ପାଇଁ ଜାପାନ ଏପର୍ଯ୍ୟନ୍ତ ବହୁ ପରିମାଣର ଅର୍ଥ ବ୍ୟୟ କରିସାରିଛି। ତେଣୁ ଜାପାନ ଏକତରଫା ଭାବେ କିମ୍ବା ଆଇଓସି ସହ ମିଳିତ ଭାବେ ଏହାକୁ ବାତିଲ କରିବ ନାହିଁ। କିନ୍ତୁ ଅଲିମ୍ପିକ୍ସ ଆୟୋଜନ ହେଲେ ମଧ୍ୟ ନିଶ୍ଚିତ ଭାବେ ପ୍ରଭାବିତ ହେବ ବୋଲି କୁହାଯାଇପାରେ।
ସାରା ବିଶ୍ୱରୁ ଆଥ୍ଲେଟମାନେ ଜାପାନ ଆସିବେ। ସେମାନେ କରୋନାର ବିଭିନ୍ନ ଭାରିଆଣ୍ଟ ଧରି ଆସିବାର ଆଶଙ୍କା ରହିଛି। ତେଣୁ ରିସ୍କ ନିଶ୍ଚିତ ଭାବେ ରହିଛି। ଅଲିମ୍ପିକ୍ସ ଆୟୋଜନକୁ ନେଇ ସୁଗା ନିଜର ନେତୃତ୍ୱକୁ ବାଜି ଲଗାଇଛନ୍ତି। ସୁଗାଙ୍କ ସହ ଶାସକ ଦଳ ଏଲ୍ପିଡିର ଭାଗ୍ୟ ମଧ୍ୟ ଏହି ମେଗା ଇଭେଣ୍ଟ ସଫଳ ଆୟୋଜନ ଉପରେ ନିର୍ଭର କରୁଛି। ଯଦି ଅଲିମ୍ପିକ୍ସ ବିଫଳ ହୁଏ ତା’ହେଲେ ସୁଗାଙ୍କୁ ନିଶ୍ଚିତ ଭାବେ ମୂଲ୍ୟ ଦେବାକୁ ହେବ। ଆୟୋଜନ ସଫଳ ହେଲେ ମଧ୍ୟ ସୁଗା ଏଥିରେ କେତେ ଲାଭ ପାଇଛନ୍ତି ତାହା କହିବା କଷ୍ଟକର। ତେଣୁ ଆଇଓସି ଓ ପ୍ରଧାନମନ୍ତ୍ରୀ ସୁଗା ନିଶ୍ଚିତ ଭାବେ କଡ଼ା ପରୀକ୍ଷା ତଥା ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି ବୋଲି କୁହାଯାଇପାରେ। କିନ୍ତୁ ଅଲିମ୍ପିକ୍ସ ବାତିଲ ହେବା କୁହାଯାଇ ନ ପାରେ।
