ନୂଆଦିଲ୍ଲୀ,୨୫।୫ (ପି.ଟି.): ୨୦୨୭ ଫିଫା ମହିଳା ବିଶ୍ୱକପ୍କୁ ଭାରତୀୟ ଦଳ ପଠାଇବା ପାଇଁ ଅଲ୍ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ବିଧିବଦ୍ଧ ଭାବେ ଏକ ଯୋଜନା ପ୍ରସ୍ତୁତ କରିଛି। ଏହାକୁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ବିନା ଦ୍ୱିଧାରେ ସମର୍ଥନ ଜଣାଇଛି।
ଏହି ମେଗା ଇଭେଣ୍ଟ ପାଇଁ ଭାରତୀୟ ମହିଳା ଦଳ ଯୋଗ୍ୟତା ହାସଲ କରିବାରେ ସମର୍ଥ ହେବ ବୋଲି ଏଆଇଏଫ୍ଏଫ୍ ଅଧ୍ୟକ୍ଷ ପ୍ରଫୁଲ୍ଲ ପଟେଲ କହିଛନ୍ତି। ଫିଫା ବିଶ୍ୱକପ୍ ପାଇଁ ପୁରୁଷ ଦଳ ଯୋଗ୍ୟତା ହାସଲ କରିବା ପୂର୍ବରୁ ମହିଳା ଦଳ ସଫଳ ହେବ ବୋଲି ସେ କହିଛନ୍ତି। ଯଦିଓ ମହିଳା ଫୁଟବଲକୁ ସେତେଟା ଗୁରୁତ୍ୱ ଦିଆଯାଇନାହିଁ। ବର୍ତ୍ତମାନ ଦେଶରେ ମହିଳା ଫୁଟବଲର ବିକାଶ ପାଇଁ ଫେଡେରେଶନ କାର୍ଯ୍ୟ କରୁଛି ବୋଲି ସେ କହିଛନ୍ତି।
ଏବେକାର ୧୮ ବର୍ଷରୁ କମ୍ ଦଳ ପାଇଁ ଆମେ ସମ୍ପୂର୍ଣ୍ଣ ଯୋଜନା ପ୍ରସ୍ତୁତ କରିଛୁ। ଏହାଦ୍ୱାରା ଭାରତୀୟ ମହିଳା ଦଳ ୨୦୨୭ ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିପାରିବ ବୋଲି ସେ କହିଛନ୍ତି। ଆମର ଏହି ଯୋଜନାକୁ କ୍ରୀଡ଼ା ମନ୍ତ୍ରଣାଳୟ ଓ ସାଇ ସମର୍ଥନ କରିଛନ୍ତି। ଏଥିପାଇଁ ଆମେ କୃତଜ୍ଞ ବୋଲି ଏଆଇଏଫ୍ଏଫ୍ ସାଧାରଣ ସମ୍ପାଦକ କୁଶଲ ଦାସ କହିଛନ୍ତି। ୨୦୨୭ ବିଶ୍ୱକପ୍ ପାଇଁ ଭାରତୀୟ ମହିଳା ଦଳ ଯୋଗ୍ୟତା ହାସଲ କରିବାରେ ସମର୍ଥ ହେବ ବୋଲି ଗତ ଡିସେମ୍ବରରେ ପଟେଲ କହିଥିଲେ। ତେବେ ଏଥିପାଇଁ ଏକ ସ୍ବତନ୍ତ୍ର ରୋଡମ୍ୟାପ ପ୍ରସ୍ତୁତ କରିବା ଉପରେ କାର୍ଯ୍ୟକରିବାକୁ ଏଆଇଏଫ୍ଏଫ୍କୁ ମନ୍ତ୍ରଣାଳୟ ପରାମର୍ଶ ଦେଇଛି।
୧୭ ବର୍ଷରୁ କମ୍ ମହିଳା ବିଶ୍ୱକପ୍ ଭାରତରେ ଆସନ୍ତାବର୍ଷ ଅକ୍ଟୋବର ୧୧ରୁ ୩୦ ତାରିଖ ମଧ୍ୟରେ ଆୟୋଜନ ହେବ ବୋଲି ଫିଫା କାଉନସିଲ ଗତ ଗୁରୁବାର କହିଥିଲା। ଭାରତ ଗତବର୍ଷ ଏହି ମେଗା ଇଭେଣ୍ଟ ଆୟୋଜନ କରିବାର କାର୍ଯ୍ୟକ୍ରମ ଥିଲା। ତେବେ କୋଭିଡ୍-୧୯ କାରଣରୁ ଏହାକୁ ୨୦୨୧କୁ ଘୁଞ୍ଚାଇ ଦିଆଯାଇଥିଲା। ଭାରତ ମଧ୍ୟ ୨୦୨୨ରେ ଏଏଫ୍ସି ମହିଳା ଏସିଆନ କପ୍ ଆୟୋଜନ କରିବାର କାର୍ଯ୍ୟକ୍ରମ ରହିଛି। ଏହି ଦୁଇଟି ମେଗା ଇଭେଣ୍ଟ ସଫଳତାର ସହ ଆୟୋଜନ ହେଲେ ଏହା ଭାରତୀୟ ମହିଳା ଫୁଟବଲକୁ ଆହୁରି ଆଗକୁ ନେବାରେ ସହାୟ ହେବ।
