ଟୋକିଓ,୧୫।୪(ଏପି): ଆଗାମୀ ଟୋକିଓ ଅଲିମ୍ପିକ୍ସର ୧୦୦ ଦିନିଆ କାଉଣ୍ଟ ଡାଉନ ବା ଅବଗଣନା ବୁଧବାର ଆରମ୍ଭ ହୋଇଛି। କୋଭିଡ୍-୧୯ ପାଇଁ ଏହି ମେଗା ଇଭେଣ୍ଟ ଗୋଟିଏ ବର୍ଷ ଘୁଞ୍ଚାଯାଇଥିଲେ ମଧ୍ୟ ଏହାର ଆୟୋଜନ ନେଇ ଅନିଶ୍ଚୟତା ଦୂର ହୋଇନି। ତେବେ ଏହାର ସଫଳ ଆୟୋଜନ ପାଇଁ ଆୟୋଜକମାନ ପ୍ରୟାସ ଜାରି ରଖିଛନ୍ତି। କୋଭିଡ୍-୧୯ ମାମଲା ବଢିବାରେ ଲାଗିଛି। ଏହି ମେଗା ଇଭେଣ୍ଟର ଆୟୋଜନକୁ ମଧ୍ୟ ଜାପାନରେ ଜନସାଧାରଣ ବିରୋଧ କରୁଛନ୍ତି। ପୁଣି ବହୁ ଦୁର୍ନୀତି ଓ ଅର୍ଥ ତୋସରପାତ ଅଭିଯୋଗ ମଧ୍ୟ ଆୟୋଜକଙ୍କ ସମସ୍ୟାକୁ ଦ୍ୱିଗୁଣିତ କରିଛି। ବିଭିନ୍ନ ସମସ୍ୟାରେ ଛନ୍ଦିହୋଇପଡିଛି ଅଲିମ୍ପିକ୍ସ। ଆୟୋଜକଙ୍କ ସମ୍ମୁଖରେ ବହୁ ସଂଖ୍ୟାରେ ପ୍ରତିବନ୍ଧକ ଓ ପ୍ରଶ୍ନବାଚୀ ସୃଷ୍ଟି ହୋଇଛି।
ଦ୍ୱିତୀୟ ବିଶ୍ୱଯୁଦ୍ଧରେ ପରାସ୍ତ ହୋଇଥିଲେ ମଧ୍ୟ ୧୯୬୪ ଅଲିମ୍ପିକ୍ସକୁ ସଫଳ ଭାବେ ଆୟୋଜନ କରି ଜାପାନ ବିପର୍ଯ୍ୟୟରୁ ମୁକୁଳିଥିବାର ପ୍ରମାଣ ଦେଇଥିଲା। ଏଥର କିନ୍ତୁ କଥା ଅଲଗା ହୋଇଛି। ଜାପାନକୁ ସାରା ବିଶ୍ୱ କେଉଁ ନଜରରେ ଦେଖୁଛି ସେ ନେଇ ଅବଶ୍ୟ ସରକାର ଅବଗତ ରହିଛନ୍ତି। ଏବେ ଅଲିମ୍ପିକ ବାତିଲ ହେବା ସମ୍ଭାବନା ସୃଷ୍ଟି ହୋଇଛି ବୋଲି କେତେକ ମତ ଦେଇଛନ୍ତି। ଜୁଲାଇ ୨୩ରୁ ଅଲିମ୍ପିକ୍ସ ଆରମ୍ଭ ହୋଇ ଅଗଷ୍ଟ ୮ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଛି।
ଅଲିମ୍ପିକ ଆୟୋଜନରେ ୧୫.୪ ବିଲିୟନ ଆମେରିକୀୟ ଡଲାର ଖର୍ଚ୍ଚ ହେବ ବୋଲି ଆନୁଷ୍ଠାନିକ ଭାବେ ଆକଳନ କରାଯାଇଛି। କିନ୍ତୁ ଅଲିମ୍ପିକ ଆୟୋଜନରେ ଏହାର ଦୁଇଗୁଣା ଖର୍ଚ୍ଚ ହେବ ବୋଲି କେତେକ ସରକାରୀ ଅଡିଟ୍ରୁ ଜଣାପଡିଛି। ଅବଶ୍ୟ ପ୍ରସାରଣ ଅଧିକାର ଓ ପ୍ରାୟୋଜନ ବିକ୍ରିରୁ ୯୧ ପ୍ରତିଶତ ଅର୍ଥ ଉପାର୍ଜନ ହେବ ବୋଲି କୁହାଯାଇଛି।
ବିଦେଶୀ ପ୍ରଶଂସକଙ୍କୁ ବାରଣ
ବିଦେଶରୁ ପ୍ରଶଂସକଙ୍କୁ ଜାପାନରେ ପ୍ରବେଶ କରିବାରୁ ବାରଣ କରାଯାଇଛି। ପର୍ଯ୍ୟଟନ ଏକପ୍ରକାର ବନ୍ଦହୋଇଛି ବୋଲି କୁହାଯାଇପାରେ। କୌଣସି ଜନ ସମାଗମକୁ ବାତିଲ କରାଯାଇଛି। ଆଥ୍ଲେଟଙ୍କୁ ଡେରିରେ ଆସିବା ଓ ଶୀଘ୍ର ଯିବାକୁ ସୂଚନା ଦିଆଯାଇଛି। ବିଭିନ୍ନ ସମସ୍ୟାରେ ଆୟୋଜକ ଓ ଅଲିମ୍ପିକ୍ସ ଛନ୍ଦି ହୋଇଯାଇଛନ୍ତି। ଟୋକିଓ ଅଲିମ୍ପିକ୍ସ ନେତୃତ୍ୱରେ ମହିଳାଙ୍କୁ ଅବହେଳା ନେଇ ବେଶ୍ ବିବାଦ ସୃଷ୍ଟି ହୋଇଥିଲା। ଲାଞ୍ଚ କାରବାର ଓ ଅସଫଳ ଯୋଜନା ଅଲିମ୍ପିକ୍ସ ଆୟୋଜନକୁ ପ୍ରଭାବିତ କରିଛି। ଜାପାନର ୮୦ ପ୍ରତିଶତ ଲୋକ ଅଲିମ୍ପିକ ବାତିଲ ହେଉ ବୋଲି ମତ ଦେଇଛନ୍ତି। ବିଭିନ୍ନ ପୁଲ୍ରୁ ଏହା ଜଣାପଡିଛି। ଏହାକୁ ବୈଜ୍ଞାନିକମାନେ ମଧ୍ୟ ବିରୋଧ କରିଛନ୍ତି। ପୁଣି ଜାପାନରେ ୧ ପ୍ରତିଶତରୁ କମ୍ ଲୋକେ ଟିକା ନେଇଛନ୍ତି। କରୋନା ମହାମାରୀ କାରଣରୁ ଜାପାନରେ ୯,୫୦୦ ମୃତ୍ୟୁବରଣ କରିଛନ୍ତି। କୋଭିଡ୍-୧୯ ମୁକାବିଲାରେ ଜାପାନ ଏସିଆରେ ପଛରେ ପଡିଛି ଓ ସଫଳ ହୋଇପାରିନାହିଁ। ୨୦୦ଟି ଦେଶରୁ ୧୫, ୪୦୦ ଅଲିମ୍ପିକ ଓ ପାରା ଅଲିମ୍ପିକ ଆଥ୍ଲେଟ ଜାପାନରେ ପ୍ରବେଶ କରିବେ। ପୁଣି ୧୦ ହଜାର ଅଫିସିଆଲ, ଜଜ୍, ଗଣମାଧ୍ୟମ ଓ ପ୍ରସାରଣ ପ୍ରତିନିଧି ମଧ୍ୟ ଜାପାନ ଆସିବେ। କରୋନା କାରଣରୁ ଅଲିମ୍ପିକ ମଶାଲ ରାଲି ମଧ୍ୟ ପ୍ରଭାବିତ ହୋଇଥିଲା। ରାଲି ଓସାକା ସହରର ସର୍ବସାଧାଣ ସଡକରେ ଆୟୋଜନ ନ ହୋଇ ପାର୍କରେ ସୀମିତ ଧାବକଙ୍କୁ ନେଇ ଆୟୋଜିତ ହୋଇଥିଲା। ଅଲିମ୍ପିକ ପାଇଁ କରୋନ ମୁକବିଲାରେ ସରକାର ପଛରେ ପଡିଛନ୍ତି ବୋଲି କେତେକ ଅଭିଯୋଗ କରିଛନ୍ତି।
ବର୍ଷେ ତଳେ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଓ ଜାପାନ ସରକାର ମିଳିତ ଭାବେ ଅଲିମ୍ପିକ୍କୁ ବାତିଲ ନ କରି ଗୋଟିଏ ବର୍ଷ ଘୁଞ୍ଚାଇବାକୁ ନିଷ୍ପତ୍ତି ନେଇଥିଲେ। ବିଭିନ୍ସ ସମସ୍ୟା ସତ୍ତ୍ୱେ ଅଲିମ୍ପିକ ସଫଳତାର ସହ ଆୟୋଜନ ହେବ ବୋଲି ପ୍ରଧାନମନ୍ତ୍ରୀ ୟୋସିହିଡେ ସୁଗା ଆଶାପ୍ରକାଶ କରି କହିଛନ୍ତି। ଅଲିମ୍ପିକ ଉପରେ ତାଙ୍କ ପଦ ନିର୍ଭର କରୁଛି। ମହାମାରୀ ସତ୍ତ୍ୱେ ଅଲିମ୍ପିକ ପାଇଁ ଟୋକିଓର ପ୍ରସ୍ତୁତି ଶ୍ରେଷ୍ଠ ବୋଲି ଆଇଓସି ଅଧ୍ୟକ୍ଷ ଥୋମାସ ବାକ ବାରମ୍ବାର କହି ଆସୁଛନ୍ତି। ତେବେ ଅଲିମ୍ପିକ ଆୟୋଜନ ସଫଳ ହେଉଛି କି ନା ତାହା ଦେଖିବାକୁ ବାକି ରହିଲା।
