ନୂଆଦିଲ୍ଲୀ, ୨୬ା୫: ଚଳଚ୍ଚିତ୍ର ଏବଂ ଟେଲିଭିଜନ ପ୍ରୋଗ୍ରାମ ଭଳି ଓଟିଟି ପ୍ଲାଟ୍ଫର୍ମଗୁଡ଼ିକରେ ଖୁବ୍ଶୀଘ୍ର ତମାଖୁ ନିରୋଧୀ ସତର୍କ ସୂଚନା ପ୍ରସାରଣ କରାଯିବ। ଏଥିପାଇଁ ସ୍ବାସ୍ଥ୍ୟ ମନ୍ତ୍ରଣାଳୟ ଆନୁଷଙ୍ଗିକ ନିୟମାବଳୀରେ ସଂଶୋଧନ କରିବାକୁ ଯାଉଥିବା ଏକ ସୂତ୍ରରୁ ଜଣାପଡ଼ିଛି। ସିଗାରେଟ୍ ଓ ଅନ୍ୟାନ୍ୟ ତମାଖୁ ସାମଗ୍ରୀ ( ଉତ୍ପାଦନ, ବ୍ୟବସାୟ ଓ ଯୋଗାଣ ନିୟମାବଳୀ ଓ ବିଜ୍ଞାପନ ନିଷେଧ) ନିୟମ, ୨୦୦୪ର ସଂଶୋଧନ ପାଇଁ ମନ୍ତ୍ରଣାଳୟ ବିଚାର କରୁଛି। ଏନେଇ ଖୁବ୍ଶୀଘ୍ର ବିଜ୍ଞପ୍ତି ପ୍ରକାଶ ପାଇପାରେ। ଚିଠା ବିଜ୍ଞପ୍ତି ଅନୁଯାୟୀ ତମାଖୁ ସାମଗ୍ରୀ କିମ୍ବା ତାହାର ବ୍ୟବହାର ସମ୍ପର୍କରେ ଅନ୍ଲାଇନ୍ରେ ପ୍ରସାର କରୁଥିବା ପ୍ରକାଶକମାନେ ଏହାର କ୍ଷତିକାରକ ପ୍ରଭାବ ସମ୍ପର୍କରେ କାର୍ଯ୍ୟକ୍ରମ ଆରମ୍ଭରୁ ଏବଂ ମଝିରେ ୩୦ ସେକେଣ୍ଡ ଲେଖାଏ ଦେଖାଇବେ। ଏଥିସହ ତମାଖୁ ବିରୋଧୀ ସ୍ବାସ୍ଥ୍ୟ ସଚେତନତା ସ୍କ୍ରିନ୍ର ତଳଭାଗରେ ସ୍ପଷ୍ଟ ଭାବରେ ଲେଖିବା ଲାଗି କୁହାଯିବ। ସେହିପରି ତମାଖୁ ସେବନ ନ କରିବା ପାଇଁ ଅନୂ୍ୟନ ୨୦ ସେକେଣ୍ଡର ଏକ ଅଡିଓ ଭିଜୁଆଲ୍ ମଧ୍ୟ ପ୍ରୋଗ୍ରାମ ଆରମ୍ଭ ଓ ମଝିରେ ପ୍ରଦର୍ଶନ କରାଯିବ।
