ନୂଆଦିଲ୍ଲୀ: ରେକର୍ଡ କରିବା ଯେମିତି କେତେଜଣଙ୍କର ନିଶା ପାଲଟି ଯାଇଥାଏ। ଆଉ ଭାବିଲେ ଆଶ୍ଚର୍ଯ୍ୟ ଲାଗେ ଯେ ଏହି ରେକର୍ଡ ନିଶାରେ ସେମାନେ ନିଜକୁ କଷ୍ଟ ଦେବାକୁ ବି ପଛାନ୍ତି ନାହିଁ। ଠିକ୍ ଏମିତି କିଛି କରି ଏବେ ଗିନିଜ୍ ରେକର୍ଡ କରିଛନ୍ତି ଭାଲେରଜାନ୍ ରୋମାନୋଭସ୍କି।
ପାଦରୁ ମୁଣ୍ଡ ପର୍ଯ୍ୟନ୍ତ ବରଫ ଭର୍ତ୍ତି। ବାହାରକୁ କେବଳ ମୁହଁ ହିଁ ଦେଖାଯାଉଛି। ଏମିତି ଅବସ୍ଥାରେ କେହି ହୁଏତ କେଇ ମିନିଟ୍ ରହିବା କଥା ଚିନ୍ତା କରିପାରିବେ। କିନ୍ତୁ ବରଫ ଭିତରେ ଏମିତି ଅବସ୍ଥାରେ ପୂରା ୩ ଘଣ୍ଟା ରହିପାରିଛନ୍ତି ପୋଲାଣ୍ଡର ଭାଲେରଜାନ୍ ରୋମାନୋଭସ୍କି। ବରଫ ଖଣ୍ଡେ ହାତରେ କେଇ ମିନିଟ୍ ଧରି ରଖିବା ଯେଉଁଠି ସାଧାରଣ ଲୋକଙ୍କ ପାଇଁ କଷ୍ଟକର ହୋଇଥାଏ ସେଠି ଭାଲେରଜାନ୍ କିଭଳି ଏପରି କାମ କରିପାରିଲେ ତାହା ଏବେ ସମସ୍ତଙ୍କ ପାଇଁ ଆଶ୍ଚର୍ଯ୍ୟର ବିଷୟ ପାଲଟିଛି। ତେବେ ଏମିତି ଏକ ଦୁଃସାହସିକ ପଦକ୍ଷେପ ନେଇ ଏବେ ସେ ଗିନିଜ୍ ୱାର୍ଲଡ ରେକର୍ଡସରେ ସ୍ଥାନ ପାଇଛନ୍ତି। ଏନେଇ ଏବେ ଏକ ଭିଜୁଆଲକୁ ଗିନିଜ୍ ୱାର୍ଲଡ ରେକର୍ଡସର ଅଫିସିଆଲ ଇନଷ୍ଟାଗ୍ରାମ୍ ପେଜ୍ରେ ଶେୟାର କରାଯାଇଛି। ଭିଜୁଆଲରେ ଦେଖିବାକୁ ମିଳିଛି, ବରଫ ଭିତରେ ବେକ ପର୍ଯ୍ୟନ୍ତ ଢାଙ୍କି ହୋଇ ଏକ କାଚ ବାକ୍ସରେ ବସିଛନ୍ତି ଭାଲେରଜାନ୍। ତାଙ୍କ ପାଖରେ ଗିନିଜ୍ ରେକର୍ଡସର ଅଧିକାରୀମାନେ ଅଛନ୍ତି। ମଝିରେ ମଝିରେ ତାଙ୍କ ସ୍ବାସ୍ଥ୍ୟ ପରୀକ୍ଷା ବି କରାଯାଉଛି। ତେବେ ଏମିତି ଅବସ୍ଥାରେ ସେ ମୋଟ ୩ ଘଣ୍ଟା ୨୮ ସେକେଣ୍ଡ ରହିପାରିଛନ୍ତି ବୋଲି ଅଧିକାରୀମାନେ କହିଛନ୍ତି। ତେବେ ଭାଲେରଜାନ୍ଙ୍କ ପୂର୍ବରୁ ଫ୍ରାନ୍ସର ରୋମେନ୍ ଭାନ୍ଦେନଡ୍ରୋପ୍ଙ୍କ ନାଁରେ ଏହି ରେକର୍ଡ ରହିଥିଲା। ସେ ବରଫ ଭିତରେ ୨ ଘଣ୍ଟା ୩୫ ମିନିଟ୍ ରହି ରେକର୍ଡ କରିଥିଲେ। କିନ୍ତୁ ତାଙ୍କ ରେକର୍ଡକୁ ଭାଙ୍ଗି ଏବେ ନୂଆ ରେକର୍ଡ କରିଛନ୍ତି ଭାଲେରଜାନ୍। ତେବେ ଆପଣ ଜାଣିଲେ ହୁଏତ ଆଶ୍ଚର୍ଯ୍ୟ ହେବେ କି ଏହି ରେକର୍ଡ ପାଇଁ ସେ କିଛି ମାସ ପୂର୍ବରୁ ଅଭ୍ୟାସ କରୁଥିଲେ। ଏଥିପାଇଁ ସେ ଢେର୍ ଦିନ ଆଗରୁ ଥଣ୍ଡା ପାଣି ପିଉଥିଲେ ଓ ଘର ତାପମାତ୍ରାକୁ ଖୁବ୍ ଥଣ୍ଡା କରି ସେଠାରେ ରହୁଥିଲେ।
