ହାଇଦ୍ରାବାଦ,୫ା୩: ଚୋରି ପାଇଁ ମଣିଷ କେତେ ନିମ୍ନସ୍ତରକୁ ଖସିପାରେ ଏବଂ ଜଘନ୍ୟକାଣ୍ଡ ଘଟାଇପାରେ ତାହା ଦେଖିବାକୁ ମିଳିଛି ସିକନ୍ଦରାବାଦର ନାଚରମରେ। ହାଇଦ୍ରାବାଦ ପୋଲିସ ପି. ଭାର୍ଗବୀ ନାମ୍ନୀ ଜଣେ ୩୨ବର୍ଷୀୟା ମହିଳାଙ୍କୁ ଗତ ବୁଧବାର ଗିରଫ କରିଛି, ଯିଏ କି ଚୋରି କରିବା ନିମନ୍ତେ ବାଥ୍ରୁମ୍ରେ ବ୍ୟବହୃତ ‘ହର୍ପିକ୍’ ଏବଂ ‘ଝଣ୍ଡୁବାମ୍’ର ବିଷାକ୍ତ ମିଶ୍ରଣକୁ ବ୍ୟବହାର କରି ୭୩ ବର୍ଷୀୟା ମାଲିକାଣୀଙ୍କୁ ଅନ୍ଧ କରିଦେଇଛନ୍ତି। ଘରୋଇ ପରିଚାରିକା ଭାର୍ଗବୀଙ୍କ ନୃଶଂସ କାଣ୍ଡର ଶିକାର ହୋଇଥିବା ବୃଦ୍ଧା ହେମବତୀ ନାଚରମସ୍ଥିତ ଏକ ଆପାର୍ଟମେଣ୍ଟ କମ୍ପ୍ଲେକ୍ସରେ ରହୁଥିବାବେଳେ ତାଙ୍କ ପୁଅ ଶଶିଧର ଲଣ୍ଡନରେ ରୁହନ୍ତି। ମା’ ହେମବତୀଙ୍କ ଯତ୍ନନେବା ପାଇଁ ଶଶିଧର ୨୦୨୧ ଅଗଷ୍ଟରେ ଭାର୍ଗବୀଙ୍କୁ ମାସିକ ୧୫ ହଜାର ଟଙ୍କା ଦରମାରେ ନିଯୁକ୍ତ କରିଥିଲେ। ସ୍ବାମୀଙ୍କଠାରୁ ଅଲଗା ହୋଇଥିବା ଭାର୍ଗବୀ ତାଙ୍କ ୭ ବର୍ଷର ଝିଅ ସହ ହେମବତୀଙ୍କ ଆପାର୍ଟମେଣ୍ଟରେ ରହୁଥିଲେ। କିନ୍ତୁ ଏକାକୀ ରହୁଥିବା ହେମବତୀଙ୍କୁ ଲୁଟିବା ଭାର୍ଗବୀଙ୍କ ଲକ୍ଷ୍ୟ ଥିଲା। ଏଥିପାଇଁ ସେ ସୁଯୋଗକୁ ଅପେକ୍ଷା କରି ରହିଥିଲେ। ଗତ ଅକ୍ଟୋବରରେ ହେମବତୀଙ୍କ ଆଖି ସମସ୍ୟା ଆସିବା ପରେ ଡାକ୍ତର ତାଙ୍କୁ ‘ଆଇ ଡ୍ରପ୍’ ପକାଇବାକୁ ପରାମର୍ଶ ଦେଇଥିବା ବେଳେ ଭାର୍ଗବୀଙ୍କ ସଇତାନି ବୁଦ୍ଧି ଜାଗି ଉଠିଥିଲା। ହେମବତୀଙ୍କ ଆଖିରେ ଡାକ୍ତରଙ୍କ କହିବାନୁଯାୟୀ ଆଇ ଡ୍ରପ୍ ନ ପକାଇ ଭାର୍ଗବୀ ପାଣି, ହର୍ପିକ୍ ଏବଂ ଝଣ୍ଡୁବାମ୍ର ଏକ ମିଶ୍ରଣ ପ୍ରସ୍ତୁତ କରି ତାହାକୁ ପକାଇଥିଲେ। ଫଳରେ କିଛି ଦିନ ପରେ ତାଙ୍କ ଆଖି ସଂକ୍ରମିତ ହୋଇଯାଇଥିଲା। ଏନେଇ ହେମବତୀ ପୁଅ ଶଶିଧରଙ୍କୁ ଜଣାଇବା ପରେ ସ୍ଥାନୀୟ ଏକ ଘରୋଇ ହସ୍ପିଟାଲରେ ଚିକିତ୍ସା ବ୍ୟବସ୍ଥା କରାଯାଇଥିଲା। କିନ୍ତୁ ସୁଫଳ ମିଳି ନ ଥିଲା, ବରଂ ଆଖି ଅଧିକ ଖରାପ ହୋଇଥିଲା। ଏହାପରେ ହେମବତୀଙ୍କୁ ତାଙ୍କ ଝିଅ ଉର୍ବଶୀ ଆଉଥରେ ହସ୍ପିଟାଲ ନେଇଥିଲେ ମଧ୍ୟ ରୋଗ ନିରୂପଣ ହୋଇପାରି ନ ଥିଲା। ଏହାପରେ ହେମବତୀ ସମ୍ପୂର୍ଣ୍ଣ ଭାବେ ଦୃଷ୍ଟିଶକ୍ତ ହରାଇ ବସିଥିଲେ। ଫଳରେ ଶଶିଧର ଲଣ୍ଡନରୁ ହାଇଦ୍ରାବାଦ ଆସି ମା’ଙ୍କୁ ଏଲ୍.ଭି. ପ୍ରସାଦ ଆଇ ହସ୍ପିଟାଲକୁ ନେଇଥିଲେ। ତରଳ ବିଷାକ୍ତ ପଡ଼ିଥିବାରୁ ଆଖି ସଂକ୍ରମିତ ହୋଇଥିବା ଡାକ୍ତର ଯାଞ୍ଚ କରି କହିଥିଲେ। ଏହା ଜାଣିବା ପରେ କେୟାରଟେକର ଭାର୍ଗବୀଙ୍କ ଉପରେ ଶଶିଧର ଓ ପରିବାରବର୍ଗଙ୍କ ସନ୍ଦେହ ହୋଇଥିଲା। ଏନେଇ ଅଭିଯୋଗ ହେବା ପରେ ପୋଲିସ ଭାର୍ଗବୀଙ୍କୁ ଜେରା କରିବାରୁ ସେ ସବୁ ସତ କଥା ଓକାଳିଥିଲେ। ହେମବତୀଙ୍କୁ ଅନ୍ଧ କରି ତାଙ୍କଠାରୁ ନଗଦ ୪୦ ହଜାର ଟଙ୍କା, ଦୁଇ ସୁନା ଚୁଡ଼ି, ସୁନାଚେନ ଓ ଅନ୍ୟ ଅଳଙ୍କାର ଚୋରି କରି ନେଇଥିବା ଭାର୍ଗବୀ ମାନିଥିଲେ। ଏହାପରେ ପୋଲିସ ତାଙ୍କୁ କୋର୍ଟ ଚାଲାଣ କରିଥିଲା।
