ପୁଣେ,୧୧।୩ : କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ଶନିବାର କରୋନା ମହାମାରୀ ସମୟରେ ପ୍ରଦାନ କରାଯାଇଥିବା ଭୁଲ ତଥ୍ୟ ଏବଂ ମିଥ୍ୟା ପ୍ରଚାର ସମ୍ପର୍କରେ ସୂଚନା ଦେଇଛନ୍ତି। ଏହାଦ୍ୱାରା ସାରା ବିଶ୍ୱରେ ହଜାର ହଜାର ଲୋକଙ୍କ ମୃତ୍ୟୁ ଘଟିଥିଲା। ପୁଣେ ସହରର ଏକ ଘରୋଇ ବିଶ୍ୱବିଦ୍ୟାଳୟରେ ଆୟୋଜିତ ହୋଇଥିବା ଓ୍ବାଇ-୨୦ ନାମକ ଏକ କାର୍ଯ୍ୟକ୍ରମରେ ଯୋଗଦେଇ ସେ ଏଭଳି କହିଛନ୍ତି।
ଓ୍ବାଇ-୨୦ ହେଉଛି ସମସ୍ତ ଜି-୨୦ ସଦସ୍ୟ ଦେଶର ଯୁବକମାନଙ୍କ ପାଇଁ ଏକ ପରାମର୍ଶ ପ୍ଲାଟଫର୍ମ, ଯେଉଁଠାରେ ସେମାନେ ପାରସ୍ପରିକ ସହଯୋଗ ପାଇଁ କାର୍ଯ୍ୟ କରନ୍ତି।
ମାନସିକ ସ୍ବାସ୍ଥ୍ୟ ପ୍ରସଙ୍ଗରେ ଠାକୁର କହିଛନ୍ତି ଯେ ମହାମାରୀଠାରୁ ଅଧିକ ଭୟଙ୍କର ଥିଲା ମିଥ୍ୟା ଏବଂ ଭୁଲ ତଥ୍ୟ ପ୍ରସାର। ଏହା ଦ୍ୱାରା ମଣିଷ ସମାଜକୁ ବହୁମୂଲ୍ୟ ଦେବାକୁ ପଡ଼ିଥିଲା।
ତେଣୁ ବେଳେବେଳେ ଆମକୁ ମଧ୍ୟ ଟେକ୍ନୋଲୋଜି ସାହାଯ୍ୟକାରୀ କି ନୁହେଁ ତାହା ମଧ୍ୟ ଦେଖିବାକୁ ପଡ଼ିବ।
ସେ କହିଛନ୍ତି ଯେ ବିଶ୍ୱରେ ଭାରତର ସ୍ଥିତି ସମ୍ପ୍ରତି ସକାରାତ୍ମକ ଭାବେ ବଦଳି ଯାଇଛି। ଏହା ଭାରତ ପାଇଁ ନୂଆ ସୁଯୋଗ ସୃଷ୍ଟି କରିଛି।
