ବର୍ଲିନ, ୨୩ା୧୨ (ଏପି)-ବୋରୁସିଆ ମଞ୍ଚେନଗ୍ଲାଡବ୍ୟାକ୍ ଷ୍ଟ୍ରାଇକର ମାର୍କସ ଥୁରମଙ୍କୁ ୫ଟି ମ୍ୟାଚରୁ ବାସନ୍ଦ କରାଯାଇଛି। ବୁନ୍ଦେସ୍ଲିଗାରେ ବିପକ୍ଷ ହଫେନ୍ହିମ୍ ଦଳର ଜଣେ ଖେଳାଳିଙ୍କ ମୁହଁକୁ ଛେପ ପକାଇଥିବା ଅଭିଯୋଗରେ ତାଙ୍କୁ ଏହି ଦଣ୍ଡବିଧାନ କରାଯାଇଥିବା ଜର୍ମାନ ଫୁଟ୍ବଲ ଫେଡେରେଶନ କହିଛି। ଥୁରମ ବର୍ତ୍ତମାନ ଜର୍ମାନ କପ୍ ଏବଂ ବୁନ୍ଦେସ୍ଲିଗାର କେତୋଟି ମ୍ୟାଚ ଖେଳିପାରିବେ ନାହିଁ। ମ୍ୟାଚ ବେଳେ ବଲକୁ ନିଜ ନିୟନ୍ତ୍ରଣକୁ ଆଣିବା ଲାଗି ସଂଘର୍ଷ ଚାଲିଥିବାବେଳେ ଥୁରମଙ୍କର ବିପକ୍ଷ ଖେଳାଳି ଷ୍ଟିଫାନ ପୋସ୍କଙ୍କ ସହ ବଚସା ହୋଇଥିଲା। କ୍ରୋଧରେ ଜର୍ଜରିତ ଥୁରମ ବିପକ୍ଷ ଖେଳାଳିଙ୍କ ମୁହଁକୁ ଛେପ ପକାଇଥିଲେ। ରେଫରି ଫ୍ରାଙ୍କ ଓ୍ବିଲେନବର୍ଗ ଭିଡିଓ ରିପ୍ଲେ ଦେଖିବାପରେ ଉଭୟ ଥୁରମ ଓ ପୋସ୍କଙ୍କୁ ପଡ଼ିଆ ଛାଡ଼ିବାକୁ ନିର୍ଦ୍ଦେଶ ଦେଇଥିଲେ। ଥୁରମଙ୍କୁ ଫେଡେରେଶନ ଆହୁରି ମଧ୍ୟ ୪୦,୦୦୦ ୟୁରୋ ଜରିମାନା କରିଛି। ଗ୍ଳାଡବ୍ୟାକ୍ ଆହୁରି ମଧ୍ୟ ଫ୍ରେଞ୍ଚ୍ ଖେଳାଳିଙ୍କୁ ଏକମାସର ପାରିଶ୍ରମିକ ଜରିମାନା କରିଛି। ଏହାକୁ ସମାଜସେବା ପାଇଁ ଦାନ କରାଯିବ।
