ପୁରୀ ଅଫିସ, ୧୨। ୯: ଧର୍ମମାସ କାର୍ତ୍ତିରେ ହବିଷ ବ୍ରତ କରିବା ପାଇଁ ପୁରୀକୁ ହବିଷିଆଳିମାନେ ଆସିଥାନ୍ତି। ଏଠାରେ ମାସେ ପର୍ଯ୍ୟନ୍ତ ରହି ମହାପ୍ରଭୁଙ୍କୁ ଦର୍ଶନ କରିବା ସହ ରାଇଦାମୋଦର ପୂଜା କରିଥାନ୍ତି। ୨୦୧୬ରୁ ରାଜ୍ୟ ସରକାର ହବିଷିଆଳି ଯୋଜନାରେ ହବିଷିଆଳିଙ୍କୁ ମାଗଣାରେ ରହିବା, ଖାଇବା, ମନ୍ଦିର ନେବା ଆଦି ବ୍ୟବସ୍ଥା କରିଆସୁଛନ୍ତି। ଏଥିପାଇଁ ପ୍ରତିବର୍ଷ ଏକାଧିକ ହବିଷିଆଳି ଶିବିର କରାଯାଇଥାଏ। ମାତ୍ର ଚଳିତବର୍ଷ କରୋନା ପାଇଁ ହବିଷିଆଳି ଶିବିର ନ ହୋଇପାରେ। ପ୍ରତିବର୍ଷ ଅଗଷ୍ଟ ଆରମ୍ଭରୁ ହବିଷିଆଳିଙ୍କ ରହଣି ଲାଗି ସରକାରଙ୍କ ପକ୍ଷରୁ ନାମ ପଞ୍ଜୀକରଣ ପ୍ରକ୍ରିୟା ଆରମ୍ଭ ହୋଇଥାଏ। ହେଲେ ଚଳିତବର୍ଷ ସେପ୍ଟେମ୍ବର ମାସ ଅଧା ହେବାକୁ ବସିଥିବାବେଳେ ଏଯାବତ୍ କୌଣସି ପ୍ରସ୍ତୁତି ଆରମ୍ଭ ହୋଇନାହିଁ। ସେହିପରି ରାଜ୍ୟ ସରକାରଙ୍କ ପକ୍ଷରୁ ହବିଷିଆଳି ଯୋଜନା ସମ୍ପର୍କରେ ଏ ପର୍ଯ୍ୟନ୍ତ କୌଣସି ବୈଠକ ବସି ନାହିଁ। ବର୍ତ୍ତମାନ ଯେଉଁଭଳି ସ୍ଥିତି ରହିଛି ହବିଷିଆଳି ଶିବିର କରିବା ସମ୍ଭବ ନୁହେଁ ବୋଲି କହିଛନ୍ତି ଜିଲା ପର୍ଯ୍ୟଟନ ଅଧିକାରୀ।
ମହାମାରୀ କରୋନା ସଂକ୍ରମଣ ଏବେ ହୁ ହୁ ହୋଇ ବଢୁଛି। ପୁରୀରେ ମଧ୍ୟ ସଂକ୍ରମିତଙ୍କ ସଂଖ୍ୟା ଦ୍ରୁତଗତିରେ ବଢୁଛି। ବିଶେଷକରି ସେବାୟତ ଏବଂ ତାଙ୍କ ପରିବାର ସଦସ୍ୟଙ୍କ କ୍ଷେତ୍ରରେ ଏବେ ବେଶି ସଂକ୍ରମଣ ଦେଖିବାକୁ ମିଳୁଛି। ଏଥିପାଇଁ ମହାପ୍ରସାଦ ରାନ୍ଧିବାରେ ସମସ୍ୟା ହେଉଥିବାରୁ ବରାଦି ଅବଢା ଉପରେ ବି କଟକଣା ଲଗାଯାଇଛି। ତେଣୁ ଚଳିତବର୍ଷ ହବିଷିଆଳିଙ୍କୁ ମହାପ୍ରସାଦ ଯୋଗାଇବା ସମ୍ଭବ ନୁହେଁ। କରୋନା ସଂକ୍ରମଣକୁ କିପରି ରୋକାଯାଇପାରିବ ସେ ନେଇ ରାଜ୍ୟ ସରକାରଙ୍କ ପକ୍ଷରୁ କୋଭିଡ୍ ଗାଇଡ୍ଲାଇନ ଜାରି କରାଯାଇଛି। ଏଥିରେ ୬୦ ବର୍ଷରୁ ଊର୍ଦ୍ଧ୍ୱ ବ୍ୟକ୍ତିଙ୍କ ପ୍ରତି ଅଧିକ ଯନତ୍ବାନ ହେବାକୁ ସରକାର ପରାମର୍ଶ ଦେଉଛନ୍ତି। ସେହିପରି ସାମାଜିକ ଦୂରତା ରକ୍ଷା କରିବାକୁ ମଧ୍ୟ କୁହାଯାଉଛି। ତେଣୁ ଏ ସବୁକୁ ଦେଖିଲେ ଏ ବର୍ଷ ହବିଷିଆଳି ଶିବିର ସମ୍ଭବପର ନୁହେଁ ବୋଲି କୁହାଯାଉଛି। ଅନ୍ୟପକ୍ଷରେ ରାଜ୍ୟ ସରକାରଙ୍କ ପକ୍ଷରୁ ଏ ପର୍ଯ୍ୟନ୍ତ କୌଣସି ସୂଚନା ଆସି ନ ଥିବାରୁ ଚଳିତବର୍ଷ ହବିଷିଆଳି ଶିବରକୁ ନେଇ ଅନିଶ୍ଚିତତା ରହିଛି ବୋଲି ଗଣମାଧ୍ୟମକୁ ଜିଲା ପର୍ଯ୍ୟଟନ ଅଧିକାରୀ ଶଶାଙ୍କ ଶେଖର ରଥ କହିଛନ୍ତି।
ସୂଚନାଥାଉ କି, କିଛିବର୍ଷ ହେବ ରାଜ୍ୟ ସରକାର ହବିଷିଆଳି ଯୋଜନା କରିଛନ୍ତି। ଏହି ଯୋଜନାରେ ହବିଷିଆଳିମାନଙ୍କ ରହଣି, ଖାଇବା, ମନ୍ଦିର ନେବା ଆଦି ବ୍ୟବସ୍ଥା କରାଯାଇଥାଏ। ପ୍ରତିବର୍ଷ ପ୍ରାୟ ୩ ହଜାର ହବିଷିଆଳିଙ୍କ ପାଇଁ ବ୍ୟବସ୍ଥା କରାଯାଇଥାଏ। ମ୍ୟୁନିସିପାଲିଟି କଲ୍ୟାଣମଣ୍ଡପ, ରେଲୱେ ଟୁରିଷ୍ଟ କମ୍ପ୍ଲେକ୍ସ, ଜଗନ୍ନାଥ ବଲ୍ଲଭ ପରିସରରେ ହବିଷିଆଳି ଶିବିର କରାଯାଏ। ପ୍ରତିଦିନ ହବିଷିଆଳି ମହାପ୍ରସାଦ ସେବନ କରିଥାନ୍ତି।
