ନୂଆଦିଲ୍ଲୀ,୧୬।୧: ଭାରତର ଟେଷ୍ଟ ଅଧିନାୟକ ପଦ ଛାଡ଼ିବା ନେଇ ହଠାତ୍ ଘୋଷଣା କରି ସମସ୍ତଙ୍କୁ ଚମକାଇଛନ୍ତି ବିରାଟ କୋହଲି। ଅନ୍ୟମାନଙ୍କ ଭଳି ତାଙ୍କ ସାଥୀ ଖେଳାଳି ତଥା ଦଳର ଟି-୨୦ ଓ ଦିନିକିଆ ଅଧିନାୟକ ରୋହିତ ଶର୍ମା ଏହାକୁ ନେଇ ଆଶ୍ଚର୍ଯ୍ୟ ହୋଇଥିବା କହିଛନ୍ତି। ସେ ନିଜର ଇନ୍ଷ୍ଟାଗ୍ରାମ ଆକାଉଣ୍ଟରେ କୋହଲିଙ୍କ ସହ ଫଟୋ ପୋଷ୍ଟ କରି ଲେଖିଛନ୍ତି, ‘ଚକିତ ହେଲି। ହେଲେ ଭାରତୀୟ ଅଧିନାୟକ ଭାବେ ପାଇଥିବା ସଫଳତା ପାଇଁ ଅଭିନନ୍ଦନ। ଭବିଷ୍ୟତ ଲାଗି ବହୁତ ବହୁତ ଶୁଭେଚ୍ଛା। ’
View this post on Instagram
ପ୍ରକାଶ ଯେ, ୨୦୧୫ ପ୍ରାରମ୍ଭରେ ଅଷ୍ଟ୍ରେଲିଆରେ ମହେନ୍ଦ୍ର ସିଂହ ଧୋନୀ ଅବସର ଘୋଷଣା କରିବା ପରେ କୋହଲି ପୂର୍ଣ୍ଣକାଳୀନ ଟେଷ୍ଟ ଅଧିନାୟକ ହୋଇଥିଲେ। ଶନିବାର କୋହଲି ନିଜର ସୋସିଆଲ ମିଡିଆ ଆକାଉଣ୍ଟରେ ପୋଷ୍ଟ କରି ଅଧିନାୟକ ପଦ ଛାଡ଼ିଥିବା ନେଇ ଜଣାଇଥିଲେ। ଦକ୍ଷିଣ ଆଫ୍ରିକାଠାରୁ ଭାରତ ୧-୨ରେ ଟେଷ୍ଟ ସିରିଜ ହାରିବା ପରେ ସେ ଏହି ନିଷ୍ପତ୍ତି ନେଇଥିଲେ। ପୂର୍ବରୁ ସେ ଟି୨୦ ନେତୃତ୍ୱ ଛାଡ଼ିଥିବା ବେଳେ ଦିନିକିଆ ଅଧିନାୟକ ପଦରୁ ତାଙ୍କୁ ବହିଷ୍କାର କରାଯାଇଥିଲା।
