ସ୍ବାବଲମ୍ବୀ ଓ ସଶକ୍ତୀକରଣର ଉଦାହରଣ ପାଲଟିଛନ୍ତି ମହାରାଷ୍ଟ୍ରର ଜୟଶ୍ରୀ ଗୋର୍ଖା ମାଳୀ। ଜୟଶ୍ରୀଙ୍କ ବୟସ ୪୭। ସେ ଧାରାଶିବ ଜିଲା ଟେର୍ ଗାଁରେ ଜୈବିକ ପଦ୍ଧତିରେ ୧.୫ ଏକରରେ ଚାଷ କରୁଛନ୍ତି ଏବଂ ଜଣେ ସଫଳ ମହିଳା ଚାଷୀ ଭାବେ ଜିଲାରେ ପରିଚୟ ସୃଷ୍ଟି କରିଛନ୍ତି। ସେ ଗୋପାଳନ କରୁଛନ୍ତି ଏବଂ ଗୋରୁଙ୍କ ପାଇଁ ଜୈବିକ ପଦ୍ଧତିରେ ଘାସଚାଷକରି ସେମାନଙ୍କୁ ଖାଦ୍ୟ ଯୋଗାଉଛନ୍ତି। ପ୍ରତିଦିନ ପାଖାପାଖି ୧୦୦୦ ଟଙ୍କାର କ୍ଷୀର ବିକ୍ରି କରୁଛନ୍ତି। ଏହା ବ୍ୟତୀତ କୃଷି ଉତ୍ପାଦିତ ଶସ୍ୟ ଓ ପନିପରିବା ବିକ୍ରିକରି ବେଶ୍ ଲାଭ କରୁଛନ୍ତି। ଜିଆଖତ ଉତ୍ପାଦନ କରି ନିଜ କ୍ଷେତରେ ପ୍ରୟୋଗ କରୁଛନ୍ତି। ବଡ଼ କଥା ହେଉଛି ସେ ସ୍ଥାନୀୟ ମହିଳାଙ୍କୁ ସ୍ବାବଲମ୍ବୀ କରାଇବା ସହ ରୋଜଗାର ଯୋଗାଇ ଦେଇଛନ୍ତି। ଜୟଶ୍ରୀ ୨୦୧୮ରେ ଶକ୍ତି ୟୁନିକ ରିସୋର୍ସ ଏଣ୍ଟରପ୍ରାଇଜେସ( ଏସ୍ୟୁଆର୍ଇ)ରେ ପ୍ରଶିକ୍ଷଣ ନେବା ପରେ ଏହି ଚାଷ ଆରମ୍ଭ କରିଥିଲେ। ଜୟଶ୍ରୀ ସଫଳତା ପାଇବା ପରେ ସ୍ଥାନୀୟ ଅଞ୍ଚଳରେ ଏବେ ଏସ୍ୟୁଆର୍ଇ ନେତୃତ୍ୱ ନେଇ ମହିଳାଙ୍କୁ ଜୈବିକ କୃଷିରେ ସାମିଲ କରିବାରେ ଲାଗିଛନ୍ତି।
