ରାୟପୁର,୭।୬: ଛତିଶଗଡ଼ ଏକ୍ସପ୍ରେସରେ ଏକ ଭୟଙ୍କର ଘଟଣା ଘଟିଛି। ପଞ୍ଜାବର ୩୮ ବର୍ଷୀୟ ଦିବ୍ୟାଙ୍ଗ କ୍ରିକେଟର ବିକ୍ରମ ସିଂହ ହ୍ବିଲଚେୟାର କ୍ରିକେଟ ଟୁର୍ନାମେଣ୍ଟ ପାଇଁ ଦିଲ୍ଲୀରୁ ଗ୍ବାଲିୟର ଯାଉଥିବା ସମୟରେ ମୃତ୍ୟୁବରଣ କରିଥିବା ଜଣାପଡ଼ିଛି। ଯାତ୍ରା ସମୟରେ ସିଂହଙ୍କ ସ୍ବାସ୍ଥ୍ୟାବସ୍ଥା ହଠାତ୍ ଖରାପ ହୋଇଯାଇଥିଲା। ତାଙ୍କୁ ସାହାଯ୍ୟ କରିବା ପାଇଁ ଅନେକ ଜରୁରୀକାଳୀନ କଲ କରାଯାଇଥିଲା କିନ୍ତୁ ସମୟ ମଧ୍ୟରେ ଡାକ୍ତରୀ ସହାୟତା ପହଞ୍ଚି ପାରି ନ ଥିଲା।
ସାହାଯ୍ୟ ପାଇଁ ବାରମ୍ବାର ଚେଷ୍ଟା କରାଯାଉଥିଲା କିନ୍ତୁ କୌଣସି ସାହାଯ୍ୟ ଆସି ନ ଥିଲା। ଟ୍ରେନ ମଥୁରା ଷ୍ଟେଶନରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ହୋଇଥିଲା।
ସିଂହ ଏବଂ ତାଙ୍କ ସାଥୀମାନେ ହଜରତ ନିଜାମୁଦ୍ଦିନ ଷ୍ଟେଶନ୍ ଛତିଶଗଡ଼ ଏକ୍ସପ୍ରେସ୍ରେ ଚଢ଼ିଥିଲେ। ଟ୍ରେନ ଛାଡ଼ିବାର କିଛି ସମୟ ପରେ, ତାଙ୍କର ପ୍ରବଳ ଯନ୍ତ୍ରଣା ଆରମ୍ଭ ହୋଇଥିଲା ଏବଂ ଟ୍ରେନ ମଥୁରା ନିକଟରେ ପହଞ୍ଚିବା ପରେ ତାଙ୍କ ଅବସ୍ଥା ଖରାପ ହୋଇଯାଇଥିଲା।
ସକାଳ ୪.୫୮ରେ ରେଳବାଇ ହେଲ୍ପଲାଇନକୁ ଏକ ଜରୁରୀକାଳୀନ କଲ କରାଯାଇଥିଲା, ତୁରନ୍ତ ଡାକ୍ତରୀ ସହାୟତା ଦାବି କରାଯାଇଥିଲା। ଅନେକ ଥର ଫୋନ କରିବା ସତ୍ତ୍ୱେ କୌଣସି ସାହାଯ୍ୟ ମିଳି ନ ଥିଲା।
ଟ୍ରେନ ପ୍ରାୟ ୯୦ ମିନିଟ ବିଳମ୍ବ ହୋଇଥିଲା ଏବଂ ଶେଷରେ ସକାଳ ୮.୧୦ରେ ମଥୁରା ଷ୍ଟେଶନରେ ପହଞ୍ଚିଥିଲା। ସେତେବେଳକୁ ତାଙ୍କର ମୃତ୍ୟୁ ହୋଇସାରିଥିଲା। ସେ ଆମ ଆଖି ସାମ୍ନାରେ ଯନ୍ତ୍ରଣାରେ ଛଟପଟ ହେଉଥିଲେ। ଆମେ ସାହାଯ୍ୟ ପାଇଁ ଡାକୁଥିଲୁ, କିନ୍ତୁ କେହି ଆସିଲେ ନାହିଁ ବୋଲି ତାଙ୍କ ଜଣେ ଶୋକସନ୍ତପ୍ତ ସାଥୀ କହିଥିଲେ।
