ନୂଆଦିଲ୍ଲୀ,୧।୫: ଆଗାମୀ ଲୋକ ସଭା ଏବଂ ରାଷ୍ଟ୍ରପତି ନିର୍ବାଚନକୁ ନେଇ ବିଜେଡିର ଯୋଜନା ସମ୍ପର୍କରେ ଦଳ ସଭାପତି ତଥା ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାପିଚୁପି ମତ ରଖିଛନ୍ତି। ପ୍ରସ୍ତାବିତ ତୃତୀୟ ସାମ୍ମୁଖ୍ୟ ନେଇ ପ୍ରଶ୍ନ ହେବାରୁ ନିର୍ବାଚନ ବହୁତ ଡେରି ଅଛି, ସମୟ ଆସିଲେ ଆମେ ଏନେଇ ବିଚାର କରିବୁ ବୋଲି ନବୀନ କହିଥିଲେ। ତେବେ କୌଣସି ରାଜନୈତକ ମେଣ୍ଟ ଗଠନଠାରୁ ତାଙ୍କ ଦଳ ସ୍ବାଧୀନ ରହିବାକୁ ପସନ୍ଦ କରିବ ବୋଲି ସେ ମତ ରଖିଥିଲେ। ସେହିପରି ରାଷ୍ଟ୍ରପତି ନିର୍ବାଚନରେ ପ୍ରାର୍ଥୀଙ୍କୁ ଚାହିଁ ନିଷ୍ପତ୍ତି ନିଆଯିବ ବୋଲି ବିଜେଡି ସୁପ୍ରିମୋ କହିଛନ୍ତି। କାରଣ ପ୍ରାର୍ଥୀ ହେଉଛନ୍ତି ଅଧିକ ଗୁରୁତ୍ୱପୂର୍ଣ୍ଣ। ୨୦୧୭ ରାଷ୍ଟ୍ରପତି ନିର୍ବାଚନରେ ଏନ୍ଡିଏ ପ୍ରାର୍ଥୀ ରାମନାଥ କୋବିନ୍ଦଙ୍କୁ ବିଜେଡି ସମର୍ଥନ ଦେଇଥିଲା। ଶାସକ ଏନ୍ଡିଏ ପାଖରେ ସଂଖ୍ୟାଗରିଷ୍ଠତା ଲାଗି ୧.୨ ପ୍ରତିଶତ କମ୍ ଭୋଟ ରହିଥିବାରୁ ରାଷ୍ଟ୍ରପତି ପ୍ରାର୍ଥୀଙ୍କୁ ଜିତାଇବାକୁ ହେଲେ ବିଜେଡିର ସମର୍ଥନ ଗୁରୁତ୍ୱପୂର୍ଣ୍ଣ। ପାର୍ଲାମେଣ୍ଟର ଉଭୟ ଗୃହରେ ୨୧ ଏମ୍ପିଙ୍କ ସହ ନବୀନଙ୍କ ନିୟନ୍ତ୍ରଣରେ ୩.୨୨ ପ୍ରତିଶତ ଭୋଟ ରହିଥିବାରୁ ଜୁଲାଇରେ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ଏନ୍ଡିଏ ପ୍ରାର୍ଥୀଙ୍କୁ ସହଜରେ ବିଜୟୀ କରାଇପାରିବ ବୋଲି କୁହାଯାଉଛି।
ଭାରତର ରାଷ୍ଟ୍ରପତିଙ୍କୁ ଇଲେକ୍ଟୋରାଲ କଲେଜ ନିର୍ବାଚିତ କରିଥାଏ। ଏଥିରେ ୭୭୬ ଏମ୍ପି ଏବଂ ୪,୧୨୦ ବିଧାୟକ ସଦସ୍ୟ ଅଛନ୍ତି। ସରକାର ମେଣ୍ଟ ସହଯୋଗୀ ଦଳ ସମେତ ଓ୍ବାଇଏସ୍ଆର୍ କଂଗ୍ରେସ ଏବଂ ବିଜେଡି ଭଳି ଦଳଗୁଡ଼ିକର ସମର୍ଥନ ପାଇଁ ଉଦ୍ୟମ ଚଳାଇଛନ୍ତି। ରାଷ୍ଟ୍ରପତି ନିର୍ବାଚନରେ ବିରୋଧୀ ଦଳ ମିଳିତ ପ୍ରାର୍ଥୀ ଦେବା ନେଇ ଚର୍ଚ୍ଚା ହେଉଥିଲାବେଳେ ଓଡ଼ିଶା ମୁଖ୍ୟମନ୍ତ୍ରୀଙ୍କ ଆଭିମୁଖ୍ୟ ଗୁରୁତ୍ୱପୂର୍ଣ୍ଣ। ମିଳିତ ବିରୋଧୀ ଦଳ ପ୍ରାର୍ଥୀ ଦେବା ନେଇ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ, ଏମ୍.କେ. ଷ୍ଟାଲିନ୍ଙ୍କ ଡିଏମ୍କେ, ଉଦ୍ଧବ ଠାକ୍ରେଙ୍କ ଶିବସେନା, କେ. ଚନ୍ଦ୍ରଶେଖର ରାଓଙ୍କ ତେଲଙ୍ଗାନା ରାଷ୍ଟ୍ର ସମିତି ଗୁରୁତ୍ୱପୂର୍ଣ୍ଣ ଭୂମିକା ନେବା ଆଶା କରାଯାଉଛି। ସେହିପରି ୨୦୨୪ ସାଧାରଣ ନିର୍ବାଚନ ଭାଜପା ବିରୋଧୀ ତୃତୀୟ ସାମ୍ମୁଖ୍ୟ ଗଠନ ଲାଗି ଏହି ନେତାମାନେ ଉଦ୍ୟମ ଚଳାଇଛନ୍ତି।
