ଆରଡି, ୩୧।୧୦(ଡି.ଏନ.ଏ.): ଭଦ୍ରକ ଜିଲାର ଶୈବପୀଠ ଆରଡି ଷ୍ଟେଟବ୍ୟାଙ୍କ ପରିସରରେ ଥିବା ଏଟିଏମ୍କୁ ଦୁର୍ବୃତ୍ତମାନେ ଶନିବାର ବିଳମ୍ବିତ ରାତିରେ ଭାଙ୍ଗିଦେଇଛନ୍ତି। ହେଲେ ସେମାନେ ଟଙ୍କା ନେବାରେ ବିଫଳ ହୋଇଛନ୍ତି। ତେବେ ରବିବାର ବ୍ୟାଙ୍କ ଛୁଟି ରହିଥିବା ସୁଯୋଗରେ ଦୁର୍ବୃତ୍ତମାନେ ଏପରି କାର୍ଯ୍ୟ କରିବାକୁ ଉଦ୍ୟମ କରିଥିଲେ ।
ସୂଚନାନୁଯାୟୀ, ବ୍ୟାଙ୍କ ସମ୍ମୁଖରେ ଥିବା ୨ଟି ସିସି କ୍ୟାମେରା ସହ ଆଲାରାମ୍କୁ ସେମାନେ ଭାଙ୍ଗି ଦେଇଛନ୍ତି । ଏଥିସହିତ ସେମାନେ ଏକ ଗ୍ୟାସ କଟର ମେଶିନ, ଏକ ଗ୍ୟାସ ସିଲିଣ୍ଡର, ଲାଇଟର, ସେପ୍ଟି ମାଚିସ ଇତ୍ୟାଦି ଛାଡି ଚାଲି ଯାଇଛନ୍ତି । ଖବର ପାଇ ସଂପୃକ୍ତ ବ୍ୟାଙ୍କର ବ୍ରାଞ୍ଚ ମ୍ୟାନେଜର ଅୟସକାନ୍ତ ମାଝୀ ବ୍ୟାଙ୍କରେ ପହଞ୍ଚି ଚୋରି ହୋଇ ନ ଥିବା ସୂଚନା ଦେଇଛନ୍ତି । ଆରଡି ଫାଣ୍ଡି ପୋଲିସ ଦୁର୍ବୃତ୍ତ ଛାଡିଥିବା ସମସ୍ତ ସାମଗ୍ରୀକୁ ଜବତ କରିଛି । ସିଲିଣ୍ଡରରୁ ଗ୍ୟାସ ସରିଯାଇଥିବାରୁ ଟଙ୍କା ନେବାରେ ସକ୍ଷମ ହୋଇନଥିବା ବ୍ରାଞ୍ଚ ମ୍ୟାନେଜର କହିଛନ୍ତି। ତେବେ ଆରଡି ପୋଲିସ ଫାଣ୍ଡିର ୫୦ ମିଟର ଦୂରରେ ଥିବା ଏହି ବ୍ୟାଙ୍କ ପରିସରରୁ ଏଟିଏମ୍ ଭଙ୍ଗାଯାଇଥିବାରୁ ଏହା ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ପାଲଟିଛି।
