ପୁରୀ ଅଫିସ,୨୩ା୧୦: ଶ୍ରୀମନ୍ଦିରର ୩ଟି ଦ୍ୱାର (ଜୟ ବିଜୟ, କଳାହାଟ ଓ ବେହେରଣ) ରୁପା ଛାଉଣି ହେବ। ଜଣେ ଭକ୍ତ ଏଥିପାଇଁ ଆବଶ୍ୟକ ରୁପା ଏବଂ ଅନ୍ୟାନ୍ୟ ଖର୍ଚ୍ଚ ବହନ କରିବେ ବୋଲି ପୂର୍ବରୁ ସୂଚନା ମିଳିଥିଲା। ଏ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଥିବା ବେଳେ ଏବେ ଆହୁରି ୫ଟି ଦ୍ୱାର ରୁପା ଛାଉଣି କରାଯିବ ବୋଲି ଜଣାପଡ଼ିଛି। ଉପରୋକ୍ତ ୩ ଦ୍ୱାର ସମେତ ସାତପାହାଚ ଦ୍ୱାର, ପଶ୍ଚିମ ଭୋଗମଣ୍ଡପ, ନୃସିଂହ ମନ୍ଦିର, ମା’ ବିମଳା ଏବଂ ମା’ ମହାଲକ୍ଷ୍ମୀ ମନ୍ଦିରର ଗର୍ଭଦ୍ୱାରକୁ ରୁପା ଛାଉଣି କରାଯିବ। ଏଥିପାଇଁ ୧୫ ଜଣିଆ କମିଟି ଗଠନ ହୋଇଛି। କମିଟିର ପ୍ରଥମ ବୈଠକ ଆସନ୍ତା ୨୭ତାରିଖ ଅପରାହ୍ନରେ ନୀଳାଦ୍ରି ଭକ୍ତନିବାସରେ ବସିବ। ଏଥିରେ ମୁମ୍ବାଇର ରୁପା କାରିଗରମାନେ ଯୋଗଦେଇ ଏହାର ଡିଜାଇନ ଉପସ୍ଥାପନ କରିବେ। ବିସ୍ତୃତ ଭାବେ ଆଲୋଚନା ପରେ ଡିଜାଇନ ଚୂଡ଼ାନ୍ତ କରାଯିବ। ସେହିପରି ରୁପା ରଖାଯିବା ପାଇଁ ଷ୍ଟ୍ରଙ୍ଗ୍ରୁମ୍, କାରିଗରଙ୍କ ରହଣି, ସିସିଟିଭି କ୍ୟାମେରା ଲଗାଯିବା ଆଦି ବିଭିନ୍ନ ପ୍ରସଙ୍ଗରେ ମଧ୍ୟ ବୈଠକରେ ଆଲୋଚନା ହେବ।
ମହାପ୍ରଭୁଙ୍କୁ ଦାନ ଦେବା ପାଇଁ ଭକ୍ତଙ୍କ ମଧ୍ୟରେ ଆଗ୍ରହ ବଢିଛି। ପୂର୍ବରୁ ୩ଟି ଦ୍ୱାର ରୁପା ଛାଉଣି ଲାଗି ଜଣେ ଭକ୍ତ ଇଚ୍ଛାପ୍ରକାଶ କରିଥିଲେ। ସେହିପରି ଅନ୍ୟ ଜଣେ ଭକ୍ତ ଠାକୁରଙ୍କ ଆଭୂଷଣ ପାଇଁ ସୁନା ଦାନ ଦେବେ ବୋଲି କହିବା ପରେ ବୁଧବାର ବୈଠକ ବସି ଏହାର ଡିଜାଇନକୁ ଅନୁମୋଦନ କରାଯାଇଛି। ଖୁବ୍ଶୀଘ୍ର ମହାପ୍ରଭୁଙ୍କର ଶ୍ରୀମୁଖ ପଦ୍ମ, ଝୋବାକଣ୍ଠି ଓ ତଡ଼ଗୀ ନିର୍ମାଣ କରାଯିବ। ପୁନଶ୍ଚ ଆହୁରି ୫ଟି ଦ୍ୱାର ରୁପା ଛାଉଣି ପାଇଁ ଦାତା ସମସ୍ତ ଖର୍ଚ୍ଚ ବହନ କରିବେ ବୋଲି ଜଣାପଡ଼ିଛି। ପୂର୍ବରୁ ୩ଟି କବାଟ ପାଇଁ ଆଗ୍ରହ ପ୍ରକାଶ କରିଥିବା ଭକ୍ତ ଜଣଙ୍କ ହିଁ ଆଉ ୫ଟି ଦ୍ୱାର ରୁପା ଛାଉଣି ଲାଗି ଇଚ୍ଛା ପ୍ରକଟ କରିଥିବା ଅସମର୍ଥିତ ସୂତ୍ରରୁ ସୂଚନା ମିଳିଛି। ଏହି ୮ ଦ୍ୱାରର କବାଟ ନୂତନ ଭାବେ ତିଆରି ହେବ। ଏହା ଉପରେ ସୂକ୍ଷ୍ମ କାରୁକାର୍ଯ୍ୟପୂର୍ଣ୍ଣ ରୁପା ଚାଦର ଆବରଣ କରାଯିବ। ଏଥିରେ ପ୍ରାୟ ଅଢେଇ ଟନ୍ ରୁପା ଲାଗିବ। କମିଟି ବୈଠକ ପରେ ନୀଳାଦ୍ରି ଭକ୍ତ ନିବାସ ପରିସରରେ କବାଟ ତିଆରି କରାଯିବ। ଏଥିପାଇଁ ବର୍ମାଟିକ୍ କାଠ ଆସୁଛି। କବାଟ ନିର୍ମାଣ ସରିବା ପରେ ଏଥିରେ ରୁପା ଛାଉଣି ହେବ ବୋଲି ସୂଚନା ମିଳିଛି।
