ଭୁବନେଶ୍ୱର, ୨୨।୧୨(ବ୍ୟୁରୋ): ରାଜ୍ୟ ସରକାରଙ୍କ ଶ୍ରମ ଓ କର୍ମଚାରୀ ରାଜ୍ୟ ବୀମା ବିଭାଗ ଦ୍ୱାରା ପରିଶ୍ରମ ପୋର୍ଟାଲର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଗତ ୧୭ ତାରିଖରେ ଲୋକାର୍ପଣ କରାଯାଇଛି। ବିଭିନ୍ନ ଶ୍ରମ ଆଇନ ଅନ୍ତର୍ଗତ ସମୁଦାୟ ୫୨ ସେବାକୁ ସମ୍ପୂର୍ଣ୍ଣ ସ୍ବୟଂଚାଳିତ ପ୍ରକ୍ରିୟା ଦ୍ୱାରା ଜନସାଧାରଣଙ୍କୁ ସହଜ ଓ ସରଳ ଉପାୟରେ ଯୋଗାଇବା ଉଦ୍ଦ୍ୟେଶରେ ପରିଶ୍ରମ ପୋର୍ଟାଲର ପରିକଳ୍ପନା କରାଯାଇଛି। ପ୍ରଥମ ପର୍ଯ୍ୟାୟରେ ଏହି ପୋର୍ଟଲ ଅଧିନରେ ୨୨ ସେବା ଆନ୍ଲାଇନ୍ ମାଧ୍ୟମରେ ଉପଲବ୍ଧ କରାଯାଇଛି। ଏହା ସଫଳ ଭାବେ କାର୍ଯ୍ୟକ୍ଷମ ହେଉଛି। ୨ୟ ପର୍ଯ୍ୟାୟରେ ମନ୍ତ୍ରୀ ସୁଶାନ୍ତ ସିଂଙ୍କ ଦ୍ୱାରା ମଙ୍ଗଳବାର ବାକି ୩୦ ସେବାରର ଲୋକାର୍ପଣ କରାଯାଇଛି।
ପ୍ରଥମ ପର୍ଯ୍ୟାୟରେ ୫ଟି ବିଭିନ୍ନ ଶ୍ରମ ଆଇନ ଅନ୍ତର୍ଗତ ୨୨ ସେବା ଯୋଗାଇ ଦିଆଯାଇଥିବା ବେଳେ ଦ୍ୱିତୀୟ ପର୍ଯ୍ୟାୟରେ ଆଉ ୬ ଶ୍ରମ ଆଇନ ଏବଂ ୨ ନୂତନ ଯୋଜନା ଅଧୀନରେ ୩୦ ସେବାର ଅନ୍ଲାଇନ୍ ଆବେଦନ ଅନୁମୋଦନ ଲାଗି ବ୍ୟବସ୍ଥା କରାଯାଇଛି। ଏହାଦ୍ୱାରା ବିଭିନ୍ନ ବୃହତ, ମଧ୍ୟମ, ଏବଂ କ୍ଷୁଦ୍ର ଶିଳ୍ପ, ମୋଟର ପରିବହନ, ବିଡି ତିଆରି ଶିଳ୍ପ ଇତ୍ୟାଦି ଅଂଶୀଦାରମାନେ ଖୁବ୍ ସହଜରେ ଆବଶ୍ୟକ ସେବାଗୁଡିକ ଉପଲବ୍ଧ କରିପାରିବେ। ଏହାସହ ଶିଳ୍ପ ସଂସ୍ଥାଗୁଡିକରେ ଛୁଟି ତାଲିକା ଅନୁମୋଦନ, ସ୍ଥାୟୀ ଆଦେଶ ପ୍ରମାଣପତ୍ର ଅନୁମୋଦନ ଇତ୍ୟାଦି ସେବାଗୁଡିକୁ ପରିଶ୍ରମ ପୋର୍ଟାଲ ଅଧୀନରେ ସରଳୀକୃତ ଇ-ପ୍ରଣାଳୀ ଦ୍ୱାରା ତ୍ୱରାନ୍ବିତ ଭାବେ ଏବଂ ସ୍ବଚ୍ଛତାର ସହିତ ଯୋଗାଇଦେବା ହେତୁ ରାଜ୍ୟରେ ବ୍ୟବସାୟ ସ୍ବଚ୍ଛନ୍ଦୀକରଣକୁ ପ୍ରୋତ୍ସାହିତ କରିବ। ଏବେସୁଦ୍ଧା ବିଭିନ୍ନ ଶିଳ୍ପଦ୍ୟୋଗୀ, ବାଣିଜ୍ୟ ବ୍ୟବସାୟ ପ୍ରତିଷ୍ଠାନ ଓ ଠିକାଦାର ଇତ୍ୟାଦି ଏହି ପୋର୍ଟାଲରେ ୧୧୮୫୪ ଦରଖାସ୍ତ ଦାଖଲ କରିଛନ୍ତି। ସେଥିରୁ ୧୦୫୭୯ ଦରଖାସ୍ତରେ ଆବଶ୍ୟକ ସେବା ମଞ୍ଜୁର କରାଯାଇଛି। ତୃତୀୟ ପକ୍ଷ ଚାହିଁଲେ ଯେକୌଣସି ଅନୁମୋଦନ ପ୍ରମାଣପତ୍ର ଏହି ପୋର୍ଟାଲରେ ଦେଖିପାରିବେ। ଏହି ପୋର୍ଟାଲରୁ ପ୍ରାୟ ୫ ହଜାରରୁ ଊର୍ଦ୍ଧ୍ୱ କାରଖାନା, ୫୦ ହଜାରରୁ ଅଧିକ ଦୋକାନ ଓ ବାଣିଜ୍ୟକ ପ୍ରତିଷ୍ଠାନ ଏବଂ ଲକ୍ଷେରୁ ଅଧିକ ଅଂଶୀଦାର ଲାଭ ପାଇପାରିବେ।
