ସୋନପୁର, ୨୬।୮(ନି.ପ୍ର.):ରାଜ୍ୟ ସରକାର ୫-ଟି ଯୋଜନାରେ ହାଇସ୍କୁଲଗୁଡିକୁ ପର୍ଯ୍ୟାୟକ୍ରମେ ସାମିଲ କରି ଏହାର ରୂପାନ୍ତରଣ କରୁଛନ୍ତି। ଗତ ନଭେମ୍ବର ୧୪ରେ ପ୍ରଥମ ପର୍ଯ୍ୟାୟରେ ସୁବର୍ଣ୍ଣପୁର ଜିଲାର ୧୧ଟି ହାଇସ୍କୁଲ ଓ ଦ୍ୱିତୀୟ ପର୍ଯ୍ୟାୟରେ ୪୧ଟି ହାଇସ୍କୁଲର ରୂପାନ୍ତରଣ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫେରେନସିଂ ଜରିଆରେ ଏହି ସବୁ ହାଇସ୍କୁଲକୁ ଲୋକାର୍ପଣ କରିଛନ୍ତି। ଏହି ସବୁ ହାଇସ୍କୁଲଗୁଡିକ ସୁନ୍ଦର ଭାବେ ସଜେଇ ହୋଇଛି। ତେବେ ଅଧିକାଂଶ ସ୍କୁଲର ଶିକ୍ଷା ଓ ପରିମଳ ବ୍ୟବସ୍ଥାରେ ସୁଧାର ଆସିନି। ଜିଲାପାଳ ଅବୋଲି ସୁନିଲ ନରଓ୍ବଣେ ଓ ଜିଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇ କିଛି ହାଇସ୍କୁଲ ପରିଦର୍ଶନ କରିବା ପରେ ଏଭଳି ଚିତ୍ର ସାମ୍ନାକୁ ଆସିଛି।
ବୁଧବାର ଜିଲାପାଳ ନରଓ୍ବଣେ ଉଲୁଣ୍ଡା ବ୍ଲକର ସିଣ୍ଢୋଲ ହାଇସ୍କୁଲ ପରିଦର୍ଶନରେ ଯାଇଥିଲେ। ବିଦ୍ୟାଳୟର ପରିମଳ ବ୍ୟବସ୍ଥା ଓ ଶିକ୍ଷା ବ୍ୟବସ୍ଥାକୁ ନେଇ ଜିଲାପାଳ ଅସନ୍ତୋଷ ପ୍ରକାଶ କରିଥିଲେ। ହାଇସ୍କୁଲରେ ସ୍ମାର୍ଟ ଶ୍ରେଣୀଗୃହ, ଇ-ଲାଇବ୍ରେରୀ ଓ ଅତ୍ୟାଧୁନିକ ବିଜ୍ଞାନଗାରର ସୁବିଧା ରହିଛି। ଇ କଣ୍ଟେଣ୍ଟ ଡେଭଲପ ପାଇଁ ଶିକ୍ଷୟିତ୍ରୀ ଶିକ୍ଷକଙ୍କୁ ୭ଦିନିଆ ତାଲିମ ମଧ୍ୟ ଦିଆଯାଇଛି। କିନ୍ତୁ ବିଦ୍ୟାଳୟର କୌଣସି ଶିକ୍ଷୟିତ୍ରୀ ଶିକ୍ଷକ ତାହା ପ୍ରସ୍ତୁତ କରିନାହାନ୍ତି। ଛାତ୍ରୀଛାତ୍ରଙ୍କୁ ଅଡିଓ ଭିଜୁଆଲ ମାଧ୍ୟମରେ କୌଣସି ବିଷୟରେ ଡିଜିଟାଲ ଶିକ୍ଷା ଦିଆଯାଉନି। ସେହିପରି ଛାତ୍ରୀଛାତ୍ର ବ୍ୟବହାର କରୁଥିବା ବିଦ୍ୟାଳୟର ପାଇଖାନା ଅପରିସ୍କାର ରହିଛି। ତେଣୁ ଜିଲାପାଳ ସଣ୍ଢୋଲ ହାଇସ୍କୁଲର ସମସ୍ତ ଶିକ୍ଷକ ଓ ଅଣଶିକ୍ଷକ କର୍ମଚାରୀଙ୍କୁ ଶୁକ୍ରବାର କୈଫିୟତ ତଲବ କରିବା ସହ ଅଗଷ୍ଟ ମାସର ଦରମା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ବୀରମହାରାଜପୁର ବ୍ଲକ ଉଫୁଲା ମାହେଶ୍ୱରୀ ବିଦ୍ୟାପୀଠ ପରିଦର୍ଶନ ସମୟରେ ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକ ଇ କଣ୍ଟେଣ୍ଟ ଡେଭଲପ କରି ନ ଥିବା ଜଣାପଡିଥିଲା। ଛାତ୍ରୀଛାତ୍ର ଡିଜିଟାଲ ଶିକ୍ଷାରୁ ବଞ୍ଚତ୍ତ ହୋଇଛନ୍ତି। ଏହି ରୂପାନ୍ତରଣ ହାଇସ୍କୁଲର ସମସ୍ତ ଶିକ୍ଷୟିତ୍ରୀ ଶିକ୍ଷକଙ୍କୁ ଜିଲାପାଳ କୈଫିୟତ ତଲବ କରିବା ସହ ଅଗଷ୍ଟ ମାସର ଦରମା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷେ ଜିଲା ଶିକ୍ଷା ଅଧିକାରୀ ଲକ୍ଷ୍ମଣ କୁମାର ଭୋଇ ଉଲୁଣ୍ଡା ବ୍ଲକର କୋଟସମଲାଇ ସ୍ଥିତ ଶ୍ରୀ ଜଗନ୍ନାଥ ହାଇସ୍କୁଲ ପରିଦର୍ଶନ ସମୟରେ ନାନା ଅବ୍ୟବସ୍ଥା ଦେଖିଥିଲେ। ଏହି ବିଦ୍ୟାଳୟର କୌଣସି ଶିକ୍ଷୟିତ୍ରୀ ଶିକ୍ଷକ ଡିଜିଟାଲ ଜରିଆରେ ପାଠ ପଢାଇବା ପାଇଁ ଇ କଣ୍ଟେଣ୍ଟ ପ୍ରସ୍ତୁତ କରି ନ ଥିବା ଜଣା ପଡିଥିଲା। ବିଦ୍ୟାଳୟ ପରିସର ପରିସ୍କାର ପରିଚ୍ଛନ୍ନ ନ ଥିଲା। କର୍ତ୍ତବ୍ୟରେ ଅବହେଳା ପାଇଁ ଡିଇଓ ଭୋଇ ଏହି ହାଇସ୍କୁଲର ସମସ୍ତ ଶିକ୍ଷକ ଓ ଅଣଶିକ୍ଷକ କର୍ମଚାରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ଜିଲାପାଳ ଓ ଡିଇଓଙ୍କ ଏଭଳି କାର୍ଯ୍ୟାନୁଷ୍ଠାନ ପରେ ୫-ଟି ସ୍କୁଲର ପ୍ରଧାନଶିକ୍ଷକଙ୍କ ସମେତ ଶିକ୍ଷକ ଓ ଅଣଶିକ୍ଷକ କର୍ମଚାରୀଙ୍କ ମଧ୍ୟରେ ଛନକା ପଶିଛି। ଅନ୍ୟପକ୍ଷେ ହାଇସ୍କୁଲ ରୂପାନ୍ତରଣ କାର୍ଯ୍ୟକ୍ରମ ଯୋଗୁଁ ଶିକ୍ଷାକ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆସିବ ବୋଲି ସରକାର ଚିନ୍ତା କରୁଥିବା ବେଳେ କିଛି ଶିକ୍ଷୟତ୍ରୀ ଶିକ୍ଷକଙ୍କ ଖାମଖିଆଲ ମନୋଭାବ ଯୋଗୁଁ ଶିକ୍ଷା କ୍ଷେତ୍ରରେ ବିଶେଷ ପରିବର୍ତ୍ତନ ଆସି ନ ଥିବା ଆଲୋଚନା ହେଉଛି।
