ଅମରପାଲି,୩୧ା୭(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଖଣ୍ଡହତା ପଞ୍ଚାୟତର ସୀମାବର୍ତ୍ତୀ ଉପାନ୍ତ ଗ୍ରାମ ସାହାଜଲଥାରେ ସରକାରୀ ଖର୍ଚ୍ଚରେ ଯାତ୍ରୀ ପ୍ରତୀକ୍ଷାଳୟ (ବସ୍ ଷ୍ଟପ୍) ନିର୍ମାଣ ହୋଇଥିଲେ ମଧ୍ୟ ମୁଖ୍ୟମନ୍ତ୍ରୀ ବସ୍ ସେବା ପହଞ୍ଚତ୍ ପାରିନାହିଁ। ବସ୍ ଷ୍ଟପ୍ ଥିଲେ ବି ବସ ନ ଚାଲିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବା ସହ ମହିଳା, ଛାତ୍ରୀଛାତ୍ର, ବୃଦ୍ଧ ଓ ଭିନ୍ନକ୍ଷମମାନେ ହଇରାଣ ହେଉଛନ୍ତି।
ବୀରମହାରାଜପୁର ବ୍ଲକ ସଦର ମହକୁମାରୁ ପ୍ରାୟ ୨୫ କି.ମି. ଏବଂ ଖଣ୍ଡହତା ପଞ୍ଚାୟତ କାର୍ଯ୍ୟାଳୟରୁ ପ୍ରାୟ ୭ କି.ମି. ଦୂରରେ ଅବସ୍ଥିତ ସାହାଜଲଥା ଗ୍ରାମ ସମ୍ବଲପୁର ଜିଲାର ରେଢ଼ାଖୋଲ ବ୍ଲକ ସୀମାକୁ ଲାଗି ରହିଛି। ତତ୍କାଳୀନ ସରକାରଙ୍କ ଲକ୍ଷ୍ମୀ ବସ୍ ଯୋଜନା, ବର୍ତ୍ତମାନ ମୁଖ୍ୟମନ୍ତ୍ରୀ ବସ୍ ସେବା ନାମରେ ଚାଲୁଥିଲେ ମଧ୍ୟ ଏହି ଉପାନ୍ତ ଅଞ୍ଚଳକୁ ସେବା ବିସ୍ତାର ହୋଇନାହିଁ। ଏହି ବସ୍ ସେବା ଆରମ୍ଭ ହେବାର ମୂଳ ଉଦ୍ଦେଶ୍ୟ ଥିଲା ମହିଳା ସ୍ବୟଂ ସହାୟକ ଗୋଷ୍ଠୀ ସଦସ୍ୟ, ଛାତ୍ରୀଛାତ୍ର ଏବଂ ସାଧାରଣ ଲୋକଙ୍କୁ ବ୍ଲକ, ବ୍ୟାଙ୍କ, ସ୍କୁଲ, କଲେଜ ଓ ବିଭିନ୍ନ ସରକାରୀ କାର୍ଯ୍ୟାଳୟକୁ ସୁଲଭ ମୂଲ୍ୟରେ ଯାତାୟାତ ସୁବିଧା ଯୋଗାଇବା। ମହିଳା ଓ ଛାତ୍ରୀଛାତ୍ରମାନେ ୫ ଟଙ୍କାରେ ଯାତାୟାତ ସୁବିଧା ପାଉଥିଲେ। କିନ୍ତୁ ସାହାଜଲଥାବାସୀ ଏହି ସୁବିଧାରୁ ଏବେ ବି ବଞ୍ଚତ୍ତ ରହିଛନ୍ତି। ଗ୍ରାମବାସୀଙ୍କ କହିବା ଅନୁସାରେ, କୌଣସି କାମରେ ବୀରମହାରାଜପୁର କିମ୍ବା ଅନ୍ୟତ୍ର ଯିବାକୁ ହେଲେ ପ୍ରଥମେ ପ୍ରାୟ ୩ କି.ମି. ଦୂର ଖଣ୍ଡହତାକୁ ଯାଇ ସେଠାରୁ ମୁଖ୍ୟମନ୍ତ୍ରୀ ବସ୍ ଧରିବାକୁ ପଡ଼ୁଛି। ଫଳରେ ପ୍ରତିଦିନ ଛାତ୍ରୀଛାତ୍ର, ମହିଳା ଓ ବୃଦ୍ଧମାନେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଗ୍ରାମର ପୂର୍ବତନ ୱାର୍ଡ ସଭ୍ୟ ଭୁକୁଲୁ ପଧାନ କହିଛନ୍ତି, ସାହାଜଲଥା ପର୍ଯ୍ୟନ୍ତ ବସ୍ ସେବା ବଢ଼ାଇଲେ କେବଳ ଏହି ଗ୍ରାମ ନୁହେଁ, ବଡ଼କିରାସିରା, ଚୌକାଦାଦର, ନୂଅଁାପାଲି, କଦଳୀମୁଣ୍ଡା, ସୋରିଷମୁଣ୍ଡା, ସାନକିରାସିରା ସମେତ ରେଢ଼ାଖୋଲ ବ୍ଲକର ଭରତାପୁର ପଞ୍ଚାୟତର ପ୍ରାୟ ୧୦ ଗ୍ରାମର ଲୋକ ଉପକୃତ ହେବେ। ଏହି ଅଞ୍ଚଳର ହାଇସ୍କୁଲ, ବିଭିନ୍ନ କଲେଜକୁ ପାଠପଢ଼ିବାକୁ ଯାଉଥିବା ଛାତ୍ରୀଛାତ୍ର ଓ ଅନ୍ୟମାନେ ଉପକୃତ ହୋଇପାରିବେ। ସାହାଜଲଥା ଗ୍ରାମର ଝାଣ୍ଟୁ ଘିବିଲା କହିଛନ୍ତି, ବସ୍ ସେବା ଆରମ୍ଭ ହେଲେ ବୃଦ୍ଧ, ବିଧବା ଓ ଭିନ୍ନକ୍ଷମମାନେ ପଞ୍ଚାୟତ କାର୍ଯ୍ୟାଳୟକୁ ଭତ୍ତା ଆଣିବା ସହ ବିଭିନ୍ନ ସରକାରୀ କାମରେ ସହଜରେ ଯାତାୟାତ କରିପାରିବେ। ସାହାଜଲଥାରେ ଏକ ଯାତ୍ରୀ ପ୍ରତୀକ୍ଷାଳୟ ନିର୍ମାଣ ହୋଇଥିଲେ ହେଁ ଏପର୍ଯ୍ୟନ୍ତ ସେହି ଆଶା ପୂରଣ ହୋଇନାହିଁ। ଗତ ଏପ୍ରିଲରେ ଗ୍ରାମର ମହିଳାମାନେ ବୀରମହାରାଜପୁର ବିଡିଓଙ୍କୁ ଭେଟି ସାହାଜଲଥା ପର୍ଯ୍ୟନ୍ତ ମୁଖ୍ୟମନ୍ତ୍ରୀ ବସ୍ ଚଳାଚଳ କରାଇବାକୁ ଦାବିପତ୍ର ଦେଇଥିଲେ। ତେବେ ଏଯାଏ ଏହାର କୌଣସି ସମାଧାନ ହୋଇ ନ ଥିବାରୁ ସ୍ଥାନୀୟ ଲୋକଙ୍କ ଅସନ୍ତୋଷ ବଢ଼ିଛି। ଗ୍ରାମର ବାଣେଶ୍ୱରୀ ସାହୁ କହିଛନ୍ତି, ବାରମ୍ବାର ଦାବି କରିଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ବୀରମହାରାଜପୁର କଲେଜର ଛାତ୍ରୀ ମନୀଷା ପଧାନ ମଧ୍ୟ ଉପାନ୍ତ ଅଞ୍ଚଳ ପର୍ଯ୍ୟନ୍ତ ବସ୍ ସେବା ବିସ୍ତାର କରିବାକୁ ଦାବି କରିଛନ୍ତି। ଏହା ପୂରଣ କରା ନ ଗଲେ ଆନ୍ଦୋଳନ ପାଇଁ ଅଞ୍ଚଳବାସୀ ଚେତାବନୀ ଦେଇଛନ୍ତି। ଏ ସମ୍ପର୍କରେ ଓଏସ୍ଆର୍ଟିସି ସୁପରଭାଇଜର ଲିଲି ମହାନନ୍ଦଙ୍କୁ ପଚାରିବାରେ ସାହାଜଲଥା ପର୍ଯ୍ୟନ୍ତ ବସ୍ ସେବା ଚଳାଚଳ ପାଇଁ ସ୍ଥାନୀୟ ଲୋକଙ୍କ ଅଭିଯୋଗ ଆମ ପାଖକୁ ଆସିଛି। ବିଷୟଟି ଉପରିସ୍ଥ ଅଧିକାରୀଙ୍କୁ ଜଣାଇ ଦିଆଯାଇଛି। ସେମାନଙ୍କ ନିର୍ଦ୍ଦେଶ ମିଳିଲେ ସାହାଜଲଥା ପର୍ଯ୍ୟନ୍ତ ବସ୍ ଚଳାଚଳ ପାଇଁ ଆବଶ୍ୟକ ପଦକ୍ଷେପ ନିଆଯିବ।
