ରାହାମା,୩୧ା୫(ଡି.ଏନ୍.ଏ.):ଜଗତ୍ସିଂହପୁର ଜିଲା ରାହାମା-ଖୋସାଲପୁର ପୋଲ ମହାନଦୀ ଉପରେ ନିର୍ମାଣ କରାଯାଇଛି। ଦେଢ଼ କିମି ବ୍ୟାପୀ ଏହି ପୋଲ ଦେଇ ଦୈନିକ ବହୁ ସଂଖ୍ୟାରେ ଲୋକ କେନ୍ଦ୍ରାପଡ଼ା ଓ ଜଗତ୍ସିଂହପୁରକୁ ଯାତାୟାତ କରିଥାନ୍ତି। ମାତ୍ର ଏଠାରେ ଆଲୋକୀକରଣ ପାଇଁ ବ୍ୟବସ୍ଥା ହୋଇ ନ ଥିବାରୁ ସନ୍ଧ୍ୟା ପରେ ଅନ୍ଧାର ଓ ନିଛାଟିଆ ହୋଇଯାଉଛି। ଏଥିସହ ଲାଗିଥିବା ଖୁଣ୍ଟରେ ବିଦ୍ୟୁତ୍ ସଂଯୋଗ ଦିଆଯାଇନାହିଁ। ଏହାର ସୁଯୋଗ ନେଇ ଅସାମାଜିକ ବ୍ୟକ୍ତି ଆଡ୍ଡା ଜମାଉଛନ୍ତି। ଏହାଛଡା ବହୁ ସମୟରେ ଛୋଟ ବଡ ଦୁର୍ଘଟଣା ଘଟୁଛି।
ଏହି ସମସ୍ୟାକୁ ଦୃଷ୍ଟିରେ ରଖି ତତ୍କାଳୀନ ଜିଲାପାଳ ସଂଗ୍ରାମ କେଶରୀ ମହାପାତ୍ର ଆଇଓସିଏଲ୍ର ସିଏସ୍ଆର ପାଣ୍ଠିରେ ୫୩ ଲକ୍ଷ ୭୪ ହଜାର ୬୮ ଟଙ୍କା ବିନିମୟରେ ଆଲୋକୀକରଣ ପାଇଁ ବନ୍ଦୋବସ୍ତ କରିଥିଲେ। ଏ ନେଇ ଉନ୍ନୟନ ବିଭାଗ ଚିଠି (ନଂ. ୩୮୫୨/୨୫ା୩ା୨୨)ରେ ଉଲ୍ଲେଖ ରହିଛି। ଦୁଇ ମାସରୁ ଊର୍ଦ୍ଧ୍ୱ ହେବ ଏହି ଅର୍ଥ ବିନିମୟରେ ଖୁଣ୍ଟ, ତାର ଓ ବଲ୍ବ ଲଗାଯାଇଥିଲେ ମଧ୍ୟ ବିଦ୍ୟୁତ୍ ସଂଯୋଗ ହୋଇପାରିନାହିଁ। ଏ ନେଇ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ପୋଲ ଉପରେ ଲଗାଯାଇଥିବା ଖୁଣ୍ଟିରେ ତୁରନ୍ତ ବିଦ୍ୟୁତ୍ ସଂଯୋଗ କରିବାକୁ ସାଇଲୋ ସରପଞ୍ଚ ସରୋଜ ସେଠୀ, ରାହାମା ବଜାର କମିଟି ସଭାପତି ଜଟାଧାରୀ ଦାସ, ସମ୍ପାଦକ ସୁନାକାର ବେହେରା, ଭିକାରୀ ସେନାପତି, ରାହାମା ପ୍ରେସ୍ କ୍ଲବ ସଭାପତି ମାନସ ରଞ୍ଜନ ମହାନ୍ତି, ସମ୍ପାଦକ ଶ୍ରୀକାନ୍ତ ଦାସ, ନିର୍ଲିପ୍ତ ଦାସ, ସିଦ୍ଧାର୍ଥ ଶଙ୍କର ସ୍ବାଇଁ ପ୍ରମୁଖ ଦାବି କରିଛନ୍ତି।
ଏ ସମ୍ପର୍କରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀ କହିଛନ୍ତି, ଖୁଣ୍ଟରେ ବିଦ୍ୟୁତ୍ ସଂଯୋଗ ଲାଗି ପ୍ରଥମେ ଉପଭୋକ୍ତା ହେବାକୁ ପଡିବ। ପୋଲଟି ହଂସୁରା ଓ ତାଳପଡ଼ା ପଞ୍ଚାୟତ ଅଧୀନରେ ଥିବାରୁ ଏ ନେଇ ସେଠାକାର ସରପଞ୍ଚଙ୍କ ସହ ଆଲୋଚନା କରାଯାଇଛି। ବିଦ୍ୟୁତ୍ ସଂଯୋଗ ଲାଗି ଆବଶ୍ୟକ ହେଉଥିବା ୨ ଲକ୍ଷ ୬ ହଜାର ଟଙ୍କା ମିଳିତ ଭାବେ ଦାଖଲ କରିବାକୁ ଉଭୟ ପଞ୍ଚାୟତକୁ କୁହାଯାଇଛି। ଏହି ଅର୍ଥ ଦାଖଲ କରିବା ପରେ ଆଲୋକୀକରଣ ହୋଇପାରିବ। ଅର୍ଥ ଦାଖଲ ପାଇଁ ତାଳପଡା ସରପଞ୍ଚ ଦମୟନ୍ତୀ ଲେଙ୍କା ଓ ହଂସୁରା ସରପଞ୍ଚ ରବିନାରାୟଣ ଦାସ ରାଜିଥିବା ନିଜ ପ୍ରତିକ୍ରିୟାରେ ପ୍ରକାଶ କରିଛନ୍ତି।
