ପ୍ରାୟତଃ ଶୁଆ ଗୀତ ଗାଇବା କିମ୍ବା ମଣିଷ ପରି ଭାଷା କହୁଥିବାର ଦେଖିଥିବେ। ଶୁଆ ଏମିତି ଏକ ପକ୍ଷୀ, ଯିଏ କି ମଣିଷ ଭାଷା ବୁଝିପାରେ ଏବଂ କହିପାରେ ମଧ୍ୟ। କିନ୍ତୁ ଶୁଆ ଯୋଗୁ ଗୋଟିଏ ଚିଡ଼ିଆଖାନା ଯେ, ପୂରା ବଦ୍ନାମ ହେବ ଏକଥା କେବେ ଶୁଣିଛନ୍ତି। ଯଦି ନା ତେବେ ଜାଣନ୍ତୁ ଏ ସମ୍ପର୍କରେ…
ବ୍ରିଟେନରେ ଏଭଳି ଏକ ମାମଲା ସାମ୍ନାକୁ ଆସିଛି, ଯେଉଁଠାରେ ଏକ ଚିଡ଼ିଆଖାନାରେ ଥିବା ୫ ଶୁଆଙ୍କୁ ହଟାଇବାକୁ ପଡ଼ିଛି। କାରଣ ସେମାନେ ଲୋକମାନଙ୍କୁ ଅଶ୍ଳୀଳ ଭାଷାରେ ଗାଳି ଦେଉଥିଲେ। କୁହାଯାଉଛି, କିଛିଦିନ ପାଇଁ ଏହି ଶୁଆଗୁଡ଼ିକୁ ଚିଡ଼ିଆଖାନାରୁ ହଟାଇ ଦିଆଯାଇଛି।
ବ୍ରିଟେନର ଲିଙ୍କନଶିୟର ଓ୍ବାଇଲ୍ଡ ଲାଇଫ୍ ପାର୍କରେ କିଛି ଦିନ ପୂର୍ବରୁ ଏଠାକାର ଅଧିକାରୀମାନେ ଏରିକ, ଜାଡେ, ଏଲ୍ସି, ଟାଇସନ ଏବଂ ବିଲି ନାମକ ପାଞ୍ଚଟି ଶୁଆକୁ ବିଭିନ୍ନ ଲୋକଙ୍କଠାରୁ ନେଇଥିଲେ। ଏହା ପରେ ପାଞ୍ଚଜଣଙ୍କୁ ଗୋଟିଏ ପଞ୍ଜୁରୀରେ ରଖାଯାଇଥିଲା। କିଛି ଦିନ ମଧ୍ୟରେ, ଏହି ଶୁଆଙ୍କ ବିରୋଧରେ ଅଭିଯୋଗ କର୍ତ୍ତୃପକ୍ଷଙ୍କ ନିକଟରେ ପହଞ୍ଚିଲା।
ଚିଡ଼ିଆଖାନାର ଜଣେ ଅଧିକାରୀ କୁହନ୍ତି, ପୂର୍ବରୁ ଏହି ଶୁଆଗୁଡ଼ିକ ପରସ୍ପର ମଧ୍ୟରେ ଦୁର୍ବ୍ୟବହାର କରୁଥିଲେ। ପରେ ସେମାନେ ଏଠାକୁ ଆସୁଥିବା ପର୍ଯ୍ୟଟକମାନଙ୍କୁ ଦୁର୍ବ୍ୟବହାର କରିବା ଆରମ୍ଭ କଲେ। ଏହି ଶୁଆମାନେ ଏକାଠି ରହୁଥିବାରୁ ଏପରି ଅଶ୍ଳୀଳ ଭାଷା ଶିଖିଛନ୍ତି।
ଚିଡ଼ିଆଖାନାର ମୁଖ୍ୟ କାର୍ଯ୍ୟନିର୍ବାହୀ ଷ୍ଟିଭ୍ ନିକୋଲ୍ସ କହିଛନ୍ତି, ଏହି ଶୁଆଗୁଡ଼ିକ ଦୁର୍ବ୍ୟବହାର ପ୍ରଦର୍ଶନ କରୁଥିବାରୁ ଲୋକମାନେ ଶୁଣିବା ପରେ ହସିଲେ। ଲୋକମାନେ ଯେତେ ହସିଲେ, ଏହି ଶୁଆଗୁଡ଼ିକ ସେତେ ଅଧିକ ଅସଭ୍ୟ ଭାଷା କହିବାରେ ଲାଗିଲେ। ଶେଷରେ ଚିଡ଼ିଆଖାନା ଆସୁଥିବା ପର୍ଯ୍ୟଟକମାନେ ସେମାନଙ୍କ ପିଲାମାନଙ୍କୁ ଧରି ଚାଲିଗଲେ। ଏହା ପରେ ଚିଡ଼ିଆଖାନା ପକ୍ଷରୁ ଏହି ଶୁଆଗୁଡ଼ିକୁ ଅଲଗା କରି ଦିଆଯାଇଛି। କାରଣ କିଛିଦିନ ଅଲଗା ରହିବା ପରେ ଏମାନେ କିଛି ନୂଆ ଶବ୍ଦ ଶିଖିବେ ଏବଂ ଆଉ ଗାଳି ଦେବେନି ବୋଲି କର୍ତ୍ତୃପକ୍ଷ କହିଛନ୍ତି।
