ଦୁବାଇ, ୨୧ା୪ (ପି.ଟି.)-କରୋନା ସଂକ୍ରମିତଙ୍କ ସଂଖ୍ୟା ଦ୍ରୁତ ହାରରେ ବୃଦ୍ଧି ପାଉଥିବାରୁ ବ୍ରିଟେନ ଭାରତକୁ ଏହାର ଟ୍ରାଭେଲ ‘ରେଡ୍ ଲିଷ୍ଟ’ରେ ସ୍ଥାନ ଦେଇଥିଲେ ମଧ୍ୟ ଜୁନ୍ ୧୮ରୁ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଯଥାରୀତି ଅନୁଷ୍ଠିତ ହେବ ବୋଲି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ନିର୍ଭର ପ୍ରତିଶ୍ରୁତି ଦେଇଛି। ‘ରେଡ୍ ଲିଷ୍ଟ’ ସ୍ଥାନ ପାଇଥିବାରୁ ବର୍ତ୍ତମାନ ବ୍ରିଟେନକୁ ଭାରତୀୟଙ୍କ ଗସ୍ତ ଉପରେ କଟକଣା ରହିବ। ଯଦି କୌଣସି ୟୁନାଇଟେଡ୍ କିଙ୍ଗଡମ୍ (ୟୁକେ) ବାସିନ୍ଦା ସ୍ବଦେଶ ଫେରନ୍ତି ତେବେ ହୋଟେଲରେ ୧୦ ଦିନ କ୍ୱାରାଣ୍ଟାଇନ୍ ବାଧ୍ୟତାମୂଳକ। ହେଲେ ଏକ ଜୈବ-ସୁରକ୍ଷିତ ପରିବେଶରେ ଡବ୍ଲ୍ୟୁଟିସି ଫାଇନାଲ ଆୟୋଜନ ହୋଇପାରିବ ବୋଲି ଆଇସିସି ଦୃଢତାର ସହିତ କହିଛି। ମହାମାରୀ ସମୟରେ କିପରି ସୁରକ୍ଷିତ ଭାବେ ଅନ୍ତର୍ଜାତୀୟ କ୍ରିକେଟ ଆୟୋଜନ କରିହେବ ତାହା ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ସମେତ ଅନ୍ୟ ସଦସ୍ୟ ଦେଶ ତାହା କାର୍ଯ୍ୟରେ କରି ଦେଖାଇ ଦେଇଛନ୍ତି। ତେଣୁ ଯୋଜନା ମୁତାବକ ଜୁନ୍ରେ ଡବ୍ଲ୍ୟୁଟିସି ଫାଇନାଲ ଖେଳାଯିବ ବୋଲି ଆଇସିସି ପକ୍ଷରୁ ସୋମବାର ରାତିରେ ସ୍ପଷ୍ଟ କରିଦିଆଯାଇଛି। ଆଇସିସି ତରଫରୁ ଇତିମଧ୍ୟରେ ୟୁକେ ସରକାରଙ୍କ ସହ ‘ରେଡ୍ ଲିଷ୍ଟ’ରେ ସ୍ଥାନ ପାଇଥିବା ଦେଶମାନଙ୍କ ଲାଗି କରାଯାଇଥିବା ନିୟମ ଉପରେ ଆଲୋଚନା ହୋଇସାରିଛି। ଅନ୍ୟପକ୍ଷରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ବରିଷ୍ଠ କର୍ମକର୍ତ୍ତା କହିଛନ୍ତି, ଦେଶରେ ବର୍ତ୍ତମାନ ଯେଉଁ ପରିସ୍ଥିତି ଉପୁଜିଛି, ସେତେବେଳେ ହୁଏତ ତାହା ନ ଥିବ। ଜୁନ୍ ପ୍ରଥମ ଭାଗରେ ଟିମ୍ର ଗସ୍ତ ବେଳକୁ ଭାରତର ନାମ ହୁଏତ ‘ରେଡ୍ ଲିଷ୍ଟ’ରେ ନ ଥିବ। ଯଦି ଅବା ସମାନ ପରିସ୍ଥିତି ଥାଏ ତେବେ ୧୦ଦିନ କଠିନ କ୍ୱାରାଣ୍ଟାଇନ୍ର ଆବଶ୍ୟକତା ପଡ଼ିବ। ଭାରତୀୟ ମହିଳା କ୍ରିକେଟ ଦଳ ଜୁନ୍ରେ ଏବଂ ପୁରୁଷ ଦଳ ଅଗଷ୍ଟ ୪ରେ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ଲାଗି ୟୁନାଇଟେଡ୍ କିଙ୍ଗଡମ୍ ଗସ୍ତ କରିବା କାର୍ଯ୍ୟକ୍ରମ ରହିଛି। ଲଡର୍ସଠାରେ ଜୁନ୍୨ରୁ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳାଯିବ। ଭାରତ ‘ରେଡ୍ ଲିଷ୍ଟ’ରେ ସ୍ଥାନ ପାଇବା ଦ୍ୱାରା ବର୍ତ୍ତମାନ ଆଇପିଏଲ୍ ଖେଳୁଥିବା ଇଂଲଣ୍ଡ ଓ ନ୍ୟୁଜିଲାଣ୍ଡ ଖେଳାଳିଙ୍କ ଉପରେ ଏହାର କି ପ୍ରଭାବ ରହିବ ତାହା ଏକ ବଡ଼ ପ୍ରଶ୍ନ। ଆଇପିଏଲ୍ ମେ’ ୩୦ରେ ଶେଷ ହେବ। ଟାଇଟଲ ମୁକାବିଲା ଅହମଦାବାଦରେ ହେବ। ଖବର ଅନୁସାରେ ଗତ ୨୪ ଘଣ୍ଟା ମଧ୍ୟରେ ଭାରତରେ ନୂଆ ପଜିଟିଭ୍ଙ୍କ ସଂଖ୍ୟା ୨,୫୯, ୧୭୦ରେ ପହଞ୍ଚତ୍ଛି। ଦିନକରେ ଏହା ହେଉଛି ସର୍ବାଧିକ। ଦେଶରେ ମୋଟ କୋଭିଡ୍ ସଂକ୍ରମିତଙ୍କ ସଂଖ୍ୟା ୧.୫ କୋଟିରେ ପହଞ୍ଚିଛି।
