ଟିକିରି,୩୦ା୯(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ବ୍ଲକ ଶଙ୍କରଅଡ଼ା ପଞ୍ଚାୟତ ଚଣା ପୁକେଲ ଗ୍ରାମରେ ଶୁକ୍ରବାର ଏକ ଅଘଟଣ ଘଟିଛି। ଟିକିରି ଅଞ୍ଚଳର କୃଷ୍ଣ ମାଝି ସ୍ତ୍ରୀ ହାକ ମାଝିଙ୍କୁ ଟାଙ୍ଗିଆରେ ହାଣି ଦେଇଛନ୍ତି।
କୃଷ୍ଣଙ୍କ ପ୍ରଥମ ସ୍ତ୍ରୀ ମରିଯାଇଥିବା ବେଳେ କୃଷ୍ଣ ଦ୍ୱିତୀୟ ବିବାହ କରିଥିଲେ। ଚଣା ପୁକେଲ ଗ୍ରାମର ହାକଙ୍କୁ ବିବାହ କରିଥିଲେ। ବିବାହକୁ କିଛି ବର୍ଷ ବିତି ଯାଇଥିବା ବେଳେ କୌଣସି ସନ୍ତାନ ସନ୍ତତି ହେଉ ନ ଥିଲା। କୃଷ୍ଣ ସବୁ ସମୟରେ ମଦ୍ୟପାନ କରି ଘରେ ଝଗଡ଼ା କରୁଥିଲେ। ଯାହା ଫଳରେ ସ୍ତ୍ରୀ ହାକ ତାଙ୍କୁ ଛାଡ଼ି ବାପଘରକୁ ଚାଲି ଯାଇଥିଲେ। ଏହା ପରେ କୃଷ୍ଣ ଗ୍ରାମର ଏକ ଛୋଟ ଛୁଆକୁ ନେଇ ପାଳିଲେ। କେବେ କେବେ ସ୍ତ୍ରୀ ପାଖକୁ କୃଷ୍ଣ ଯିବାଆସିବା କରୁଥିଲେ। ହେଲେ କୃଷ୍ଣ ଗତକାଲି ରାତିରେ ପ୍ରଚୁର ମଦ ପିଇ ଶୋଇଯାଇଥିଲେ। ଏହା ପରେ ଆଜି ଭୋର୍ରୁ କୃଷ୍ଣ ତାଙ୍କ ଝିଅ ମିନି ମାଝିଙ୍କୁ ଟାଙ୍ଗିଆରେ ମାରୁଥିବା ବେଳେ ହାକ ଝିଅକୁ କୋଳକୁ ନେଇ ଯାଇଥିଲେ। ଫଳରେ କୃଷ୍ଣ ରାଗିଯାଇ ସ୍ତ୍ରୀଙ୍କୁ ଟାଙ୍ଗିଆରେ ଗୋଟିଏ ଚୋଟ ପଛପଟେ ମାରି ଦେଇଥିଲେ। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା। ଏହା ପରେ ଗ୍ରାମର କିଛି ଲୋକ କୃଷ୍ଣଙ୍କୁ ଧରି ବିଦ୍ୟୁତ୍ ପୋଲରେ ବାନ୍ଧି ରଖିଥିଲେ। ସକାଳୁ ସେହି ଗ୍ରାମର କିଛି ଲୋକ ଟିକିରି ଥାନାକୁ ଜଣାଇଥିଲେ। ଏହା ପରେ ଘଟଣାସ୍ଥଳରେ ପୋଲିସ ପହଞ୍ଚି ଅଭିଯୁକ୍ତଙ୍କୁ ଧରି ଆଣିବା ସହ ମିନିଙ୍କୁ ଟିକିରି ମେଡିକାଲରେ ଚିକିତ୍ସା କରାଯାଉଛି । ଯେଉଁ ସମୟରେ ତାଙ୍କ ମା’ଙ୍କୁ ଟାଙ୍ଗିଆରେ ମାରୁଥିଲେ। ସେହି ସମୟରେ ସେ ଝିଅଙ୍କୁ ଠେଲି ଦେଇଥିଲେ। ଝିଅଟିର ମୁଣ୍ଡ ମାଡ଼ ହୋଇଛି। ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ଚାଲିଛି। ଅଭିଯୁକ୍ତଙ୍କୁ ଟିକିରି ଥାନାରେ ଅଟକ ରଖାଯାଇଛି। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି
