ଦଶମନ୍ତପୁର,୪ା୯(ଡି.ଏନ. ଏ.):ଗ୍ରାମର କୌଣସି ବ୍ୟକ୍ତିଙ୍କ ମୃତ୍ୟୁ ଘଟିଲେ ମଶାଣିକୁ ମୃତଦେହ ସତ୍କାର ଲାଗି ନେବାକୁ ଗ୍ରାମବାସୀଙ୍କୁ ନଦୀପାର ହେବାକୁ ପଡୁଛି। ଜୀବନକୁ ବାଜି ଲଗାଇ ମୁରାନ ନଦୀ ପାରିହେବାକୁ ପଡୁଛି ସେମାନଙ୍କୁ। ବର୍ଷାଦିନେ ଏନେଇ ଗ୍ରାମବାସୀ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଏପରି ଦେଖିବାକୁ ମିଳିଛି କୋରାପୁଟ ଜିଲା ଦଶମନ୍ତପୁର ବ୍ଲକ ଗାଦିଆଗୁଡା ପଞ୍ଚାୟତର ବୋଗେଇପଦର ଗ୍ରାମରେ। କେବଳ ଏହି ଗୋଟିଏ ଗ୍ରାମ ନୁହେଁ, ପରଜାଗଦ୍ରି, ତଳଗଦ୍ରି ଗ୍ରାମବାସୀ ମଧ୍ୟ ସମାନ ସମସ୍ୟାର ସମ୍ମୁଖୀନ ହେଉଛନ୍ତି। ମୁରାନ ନଦୀର ୭ ଫୁଟରୁ ଅଧିକ ପାଣି ଥିବା ବେଳେ ମଧ୍ୟ ନଦୀ ପାରି ହୋଇ ମଶାଣିକୁ ମୃତଦେହ ନେଉଛନ୍ତି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ସେମାନେ କହିଛନ୍ତି, ଏହି ୩ ଖଣ୍ଡ ଗ୍ରାମର ଶ୍ମାଶାନ ଗୋଟିଏ ସ୍ଥାନରେ ରହିଛି। ଏହି ମଶାଣିରେ ୩ଗ୍ରାମର ଲୋକ ମୃତଦେହ ସତ୍କାର କରିଥାନ୍ତି। କେବଳ ମଶାଣି ନୁହେଁ, ଉପରୋକ୍ତ ଗ୍ରାମର ଲୋକେ ହାଟବଜାରଠାରୁ ଆରମ୍ଭକରି ଛାତ୍ରୀ ଛାତ୍ରମାନେ ବିଦ୍ୟାଳୟ ଯିବା ପାଇଁ ମଧ୍ୟ ନଦୀ ପାରିହୋଇ ଯାତାୟାତ କରିଥାନ୍ତି। ବର୍ଷାଦିନେ ନଦୀରେ ବେଶି ପାଣି ଥିଲେ ୫ କି.ମି. ଦୂର ବୁଲି ଛାତ୍ରୀଛାତ୍ର ବିଦ୍ୟାଳୟ ଯାଇଥାନ୍ତି। ଏଠାରେ ପୋଲ ନିର୍ମାଣ ହେଲେ ସମସ୍ୟା ସୁଧୁରିବ। ସମସ୍ୟା ନେଇ ସେମାନେ ପଞ୍ଚାୟତ, ବ୍ଲକ କାର୍ଯ୍ୟଳୟ, ଜିଲା ପ୍ରଶାସନ ଓ ରାଜନେତାଙ୍କୁ ବାରମ୍ବାର ଜଣାଇ ଦାବିପତ୍ର ଦେଇଥିଲେ ମଧ୍ୟ ଏଯାଏ କିଛି ସୁଫଳ ମିଳୁନାହିଁ ବୋଲି ଗ୍ରାମବାସୀ ପ୍ରକାଶ କରିଛନ୍ତି।
