ଜୋହାନ୍ସବର୍ଗ,୭।୧:କେଏଲ ରାହୁଲଙ୍କ ନେତୃତ୍ୱରେ ଭାରତୀୟ ଦଳ ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ ହାରିଛି ଏବଂ ଏହି ପରାଜୟ ସହିତ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ୧-୧ ସ୍ତରକୁ ଆସିଛି। ଭାରତୀୟ ଟେଷ୍ଟ ଦଳର ନିୟମିତ ଅଧିନାୟକ ବିରାଟ କୋହଲି ଆହତ କାରଣରୁ ଦ୍ୱିତୀୟ ଟେଷ୍ଟରୁ ବାଦ ପଡିଥିଲେ। ଏଭଳି ପରିସ୍ଥିତିରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଅନୁପସ୍ଥିତିରେ କେଏଲ ରାହୁଲ ଦ୍ୱିତୀୟ ଟେଷ୍ଟ ମ୍ୟାଚରେ ଦଳର ନେତୃତ୍ୱ ନେଇଥିଲେ।
ଏହି ପରାଜୟ ପରେ କୋହଲି ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ତଥା ଶେଷ ଟେଷ୍ଟକୁ ଫେରିବେ କି ନାହିଁ ତାହା ଉପରେ ଏବେ କେବଳ ଗୋଟିଏ ପ୍ରଶ୍ନ ରହିଛି। କେପଟାଉନରେ ଖେଳାଯିବାକୁ ଥିବା ତୃତୀୟ ଟେଷ୍ଟ ଉଭୟ ଦଳ ପାଇଁ ନିର୍ଣ୍ଣାୟକ ଅଟେ। ଦ୍ୱିତୀୟ ମ୍ୟାଚ ହାରିଯିବା ପରେ ଭାରତର ଷ୍ଟାଣ୍ଡ-ଅଧିନାୟକ କେ.ଏଲ ରାହୁଲ କହିଛନ୍ତି ଯେ ବିରାଟ କୋହଲି ନେଟ୍ସରେ ଅଭ୍ୟାସ କରିବା ଆରମ୍ଭ କରିଛନ୍ତି। ଆଶା ସେ ତୃତୀୟ ଟେଷ୍ଟ ମ୍ୟାଚ ପାଇଁ ଫିଟ ହୋଇଯିବେ।
କ୍ୟାପଟେନ କୋହଲି ତାଙ୍କ ଉପର ପିଠିରେ ଯନ୍ତ୍ରଣା ଯୋଗୁ ଦ୍ୱିତୀୟ ଟେଷ୍ଟରୁ ବଞ୍ଚିତ ହୋଇଥିଲେ। ମ୍ୟାଚ ପରେ ଦଳର ମୁଖ୍ୟ କୋଚ ରାହୁଲ ଦ୍ରାବିଡ ମଧ୍ୟ କୋହଲିଙ୍କ ଫିଟନେସ ଉପରେ ଏକ ଅପଡେଟ ଦେଇଛନ୍ତି। ସେ କହିଛନ୍ତି ଯେ କୋହଲି ଫିଟ ଦେଖାଯାଉଛନ୍ତି ଏବଂ ନେଟ୍ସରେ ଅଭ୍ୟାସ କରୁଛନ୍ତି। ସେ ଫିଜିଓ ସହିତ ଏପର୍ଯ୍ୟନ୍ତ ସମ୍ପୂର୍ଣ୍ଣ ଆଲୋଚନା କରିନାହାଁନ୍ତି, କିନ୍ତୁ ସେ ଯାହା ଶୁଣୁଛନ୍ତି ଏବଂ ତାଙ୍କ ସହ କଥାବାର୍ତ୍ତା କରୁଛନ୍ତି, ଏଥିରୁ ଜଣାପଡୁଛି ଯେ ସେ ଫିଟ ହୋଇ ଯିବେ। ଆଶା ଅଛି ସେ ତୃତୀୟ ଟେଷ୍ଟ ଖେଳିବେ।
