ନୂଆଦିଲ୍ଲୀ,୨୩।୫(ପି.ଟି.): କାତାରର ରାଜଧାନୀ ଦୋହାରେ ପହଞ୍ଚିବା ପରେ ଭାରତୀୟ ଫୁଟ୍ବଲ ଦଳର ସବୁ ଖେଳାଳି ଓ ସପୋର୍ଟ ଷ୍ଟାଫ୍ କୋଭିଡ୍-୧୯ ଟେଷ୍ଟରେ ନେଗେଟିଭ ବୋଲି ଜଣାପଡିଛି। ଆସନ୍ତା ମାସରେ ୨୦୨୨ ବିଶ୍ୱକପ୍ ଓ ୨୦୨୩ ଏସିଆନ କପ୍ର ଯୁଗ୍ମ କ୍ୱାଲିଫାୟର୍ସ ଖେଳାଯିବାର କାର୍ଯ୍ୟକ୍ରମ ରହିଛି। ଫଳରେ ଦୋହାରେ ପହଞ୍ଚିବା ପରେ ଭାରତୀୟ ଫୁଟ୍ବଲରମାନେ ଟ୍ରେନିଂ ଆରମ୍ଭ କରିଛନ୍ତି।
ଭାରତୀୟ ଦଳ ବୁଧବାର ସନ୍ଧ୍ୟାରେ ଦୋହାରେ ପହଞ୍ଚିଥିଲା ଓ ବାଧ୍ୟତାମୂଳକ କ୍ୱାରାଣ୍ଟାଇନ୍ରେ ରହିଥିଲା। ଖେଳାଳିମାନେ ଆରଟି- ପିସିଆର ଟେଷ୍ଟ ରିପୋର୍ଟକୁ ଅପେକ୍ଷା କରିଥିଲେ। ରିପୋର୍ଟ ନେଗେଟିଭ ଜଣାପଡିବା ପରେ ଖେଳାଳିମାନେ ପ୍ରସ୍ତୁତି ଶିବିରରେ ଯୋଗ ଦେଇଥିଲେ। ସବୁ ୨୮ଜଣ ଖେଳାଳି ଓ ସପୋର୍ଟ ଷ୍ଟାଫ୍ ଟେଷ୍ଟରେ ନେଗେଟିଭ ବୋଲି ଅଲ୍ ଇଣ୍ଡିଆ ଫୁଟ୍ବଲ ଫେଡେରେଶନ (ଏଆଇଏଫ୍ଏଫ) ସାଧାରଣ ସମ୍ପାଦକ କୁଶଲ ଦାସ କହିଛନ୍ତି। ଭାରତୀୟ ଦଳକୁ ଅଧିନାୟକ ସୁନୀଶ ଛେତ୍ରୀ ପ୍ରତ୍ୟାବର୍ତ୍ତନ କରିଛନ୍ତି। ବାୟୋ ବବଲ ମଧ୍ୟରେ ଏହି ପ୍ରସ୍ତୁତି ଶିବିର ଆୟୋଜନ ହେବ। ଜୁନ୍ ୩ ତାରିଖରେ ଭାରତ ତା’ର ପ୍ରଥମ ମ୍ୟାଚ୍ରେ ଆୟୋଜକ କାତାରକୁ ଭେଟିବ। ସେହିପରି ଜୁନ୍ ୭ ତାରିଖରେ ଭାରତ ବାଂଲାଦେଶ ଓ ଜୁନ୍ ୧୫ ତାରିଖରେ ଆଫଗାନିସ୍ତାନକୁ ଭେଟିବାର କାର୍ଯ୍ୟକ୍ରମ ରହିଛି। କାତାର ଫୁଟ୍ବଲ ଆସୋସିଏଶନ ନିର୍ଦ୍ଦେଶ ଅନୁସାରେ ଭାରତୀୟ ଖେଳାଳିମାନେ ୧୦ ଦିନିଆ ହାର୍ଡ କ୍ୱାରାଣ୍ଟାଇନରେ ରହିଥିଲେ। ଗତ ରାତିରେ ଖେଳାଳିମାନେ ଅଭ୍ୟାସ କରିଛନ୍ତି ବୋଲି ଏଆଇଏଫ୍ଏଫ୍ ଟୁଇଟ୍ କରି ସୂଚନା ଦେଇଛି। କୋଚ ଆଇଗର ଷ୍ଟିମାକଙ୍କ ସହ ଖେଳାଳିମାନଙ୍କ ଟ୍ରେନିଂର ଫଟୋ ଏଆଇଏଫ୍ଏଫ୍ ଅପ୍ଲୋଡ କରିଛି।
ଗ୍ରୁପ୍ ଇ’ରେ ଭାରତୀୟ ଦଳ ୩ ପଏଣ୍ଟ ହାସଲ କରିବା ସହ ଚତୁର୍ଥ ସ୍ଥାନରେ ରହିଛି। ଭାରତ ଫିଫା ବିଶ୍ୱକପ୍ରେ ସ୍ଥାନ ହାସଲ କରିବା ଦୌଡ଼ରୁ ବାଦ୍ ପଡିସାରିଛି। ତେବେ ଚାଇନାରେ ଆୟୋଜନ ହେବାକୁ ଥିବା ୨୦୨୩ ଏସିଆନ କପ୍ ପାଇଁ ଯୋଗ୍ୟତା ହାସଲ କରିବା ଲକ୍ଷ୍ୟରେ ଭାରତ ରହିଛି। କାତାର ଯାତ୍ରା କରିବା ପୂର୍ବରୁ ମେ’ ୨ରୁ ଭାରତୀୟ ଖେଳାଳିମାନଙ୍କ ପାଇଁ ଜାତୀୟ କ୍ୟାମ୍ପ ଆରମ୍ଭ ହେବାର କାର୍ଯ୍ୟକ୍ରମ ରହିଥିଲା। ତେବେ କରୋନା ମହାମାରୀ ପାଇଁ ଏହାକୁ ବାତିଲ କରିବାକୁ ପଡିଥିଲା। ନୂଆଦିଲ୍ଲୀ ପ୍ରସ୍ଥାନ କରିବା ପୂର୍ବରୁ ଖେଳାଳି ଓ ସପୋର୍ଟ ଷ୍ଟାଫ୍ମାନେ ଆରଟି- ପିସିଆର ଟେଷ୍ଟ କରାଇଥିଲେ।
