ଭୁବନେଶ୍ୱର,୨୩।୪(ବ୍ୟୁରୋ): ଚୋରା ବାଇକ୍ରେ ବୁଲୁଥିଲେ। ଏକୁଟିଆ ଯାଉଥିବା ଲୋକଙ୍କୁ ଟାର୍ଗେଟ କରି କଟୁରି ଦେଖାଇ ଲୁଟୁଥିଲେ। ରାଜଧାନୀ ଭୁବନେଶ୍ୱରରେ ଆତଙ୍କ ସୃଷ୍ଟି କରୁଥିବା କଟୁରୀ ଗ୍ୟାଙ୍ଗ୍ ଶେଷରେ ଧରାପଡ଼ିଛି। ଏହି ଗ୍ୟାଙ୍ଗ୍ର ୫ଜଣଙ୍କୁ ଧରିଛି ଖଣ୍ଡଗିରି ଥାନା ପୋଲିସ। ସେମାନେ ହେଲେ ବରମୁଣ୍ଡା ମହାବୀର ବସ୍ତିରେ ରହୁଥିବା ପୁରୀର ରାଜେଶ ସାମଲ (୨୭), ପୁରୁଣା ଭୁବନେଶ୍ୱରରେ ରହୁଥିବା ପୁରୀର ବାବୁନା ଓରଫ ନାରାୟଣ ବାରିକ (୨୮), କଟକ ଜିଲା ତିଗିରିଆର ଅର୍ବାଜ ଖାନା ଓରଫ ରକି (୨୨), କେନ୍ଦ୍ରାପଡା ପଟ୍ଟାମୁଣ୍ଡାଇର ସୌମ୍ୟରଞ୍ଜନ ସିଂ (୨୭) ଓ ଅନ୍ୟଜଣେ ହେଉଛନ୍ତି ନାବାଳକ। ଏମାନଙ୍କଠାରୁ ୪ ଚୋରା ବାଇକ, ୨୨ ମୋବାଇଲ ଫୋନ, ୩୬ ହଜାର ଟଙ୍କା, ୨ କଟୁରି, ୨ ଭୁଜାଲି, ୫ ଘଣ୍ଟା ଜବତ କରାଯାଇଛି। ଏଥିସହ ନଂ.୧୨୨/୨୨ରେ ମାମଲା ରୁଜୁ କରାଯାଇ ୪ଜଣଙ୍କୁ ଗିରଫ କରାଯାଇ ଶୁକ୍ରବାର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ଅନ୍ୟପକ୍ଷରେ ନାବାଳକଙ୍କୁ ବାଳସୁଧାରଗୃହକୁ ପଠାଇଦିଆଯାଇଛି। ପଚରାଉଚରାବେଳେ ଗ୍ୟାଙ୍ଗ ସମ୍ପର୍କରେ ବହୁ ତଥ୍ୟ ପାଇଛି ପୋଲିସ। ସମ୍ପୃକ୍ତ ଅନ୍ୟମାନଙ୍କୁ ଧରିବା ଲାଗି ଚଢ଼ାଉ ଜାରି ରହିଥିବା ଜଣାପଡିଛି। ସୂଚନାଯୋଗ୍ୟ, ଖଣ୍ଡଗିରି ଓ ଭରତପୁର ଥାନାର ଅଧିକାରୀଙ୍କୁ ନେଇ ଗଠିତ ୨ଟି ଟିମ୍ ଏହି ଗ୍ୟାଙ୍ଗକୁ ଧରିବାକୁ ଉଦ୍ୟମ ଚଳାଇଥିଲା।
