ଛେଣ୍ଡିପଦା ,୧୩।୯(ସ୍ବ.ପ୍ର): ଅନୁଗୋଳ ଜିଲା ଜରପଡା ଥାନା କୋରଡ଼ା ଆମ୍ବୁରି ସାହିରେ ଘରେ ପଶି ଚୋରି କରୁଥିବା ବେଳେ ଧରା ପଡିଛନ୍ତି ଚୋର। ନିର୍ଦ୍ଧୁମ ମାଡ଼ ଖାଇବା ପରେ ପୋଲିସ ଚୋରକୁ ଗିରଫ କରିଛି।
ସୂଚନା ଅନୁସାରେ, କୋରଡା ଗାଁର ଚକ୍ରଧର ସାହୁ ଘର ବାହାରେ ଶୋଇଥିବାବେଳେ ଅନ୍ୟମାନେ ଘର ଭିତରେ ଶୋଇଥିଲେ । ରାତିରେ ଚୋର ପ୍ରଥମେ ଚକ୍ରଧରଙ୍କ ମୁଣ୍ଡ ପାଖରୁ ମୋବାଇଲ ନେବା ପରେ ଘର ଭିତରେ ପଶି ଶେଯ ତଳୁ ଚାବି ସହ ୭୭୦ ଟଙ୍କା ନେଇଥିଲେ। ଆଲମିରା ଲକର ଖୋଲି ସୁନା ନେବା ପାଇଁ ଚେଷ୍ଟା କରୁଥିବା ବେଳେ ଚୋର ହାତରୁ କିଛି ଜିନିଷ ହାତରୁ ଖସି ପଡିଥିଲା। ସେହି ଶବ୍ଦ ଶୁଣି ଚକ୍ରଧରଙ୍କ ୧୪ ବର୍ଷର ପୁଅ ଦିପେନଙ୍କ ନିଦ ଭାଙ୍ଗିଯିବା ସହ ଚୋର ପଶିଥିବା ଜାଣିବାକୁ ପାଇଥିଲେ। ପୁଅ ପାଟି ଶୁଣି ଅନ୍ୟମାନେ ଉଠି ଆସିବା ସହ ସମସ୍ତେ ମିଶି ଚୋରକୁ କାବୁ କରି ନେଇଥିଲେ। ଚୋରି କରିବାକୁ ଆସିଥିବା ଆଉ ଦୁଇ ଜଣ ଫେରାର ହୋଇ ଯାଇଥିଲେ। ଚୋରକୁ ବାନ୍ଧି ନିସ୍ତୁକ ମାଡ ମାରିବା ସହ ଜରପଡା ପୋଲିସକୁ ସୂଚନା ଦେଇଥିଲେ। ପରେ ପୋଲିସ ତାକୁ ଥାନାକୁ ନେଇ ଅଟକ ରଖିଛି। ସମ୍ପୃକ୍ତ ଚୋର ପୁଟଗାଡ଼ିଆ ଗାଁର ସାଗର ସିଂହ ବୋଲି ଜଣା ପଡିଛି ।
