କଟକ ଅଫିସ,୨୦।୨: ନେତାଜୀ ବସ୍ ଟର୍ମିନାଲ ଓ ତାଳଦଣ୍ଡା କେନାଲ ରାସ୍ତା ସମ୍ପ୍ରସାରଣ ଅଗ୍ରଗତି ସମ୍ପର୍କିତ ସମୀକ୍ଷା ବୈଠକ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତ (ଆର୍ଡିସି)ଙ୍କ କାର୍ଯ୍ୟାଳୟର ସଭାଗୃହରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ଏଥିରେ ଆର୍ଡିସି ଅନିଲ କୁମାର ସାମଲ ଅଧ୍ୟକ୍ଷତା କରି କହିଥିଲେ, କଟକ ସହରକୁ ଆଧୁନିକୀକରଣ କରି ଏକ ନୂଆ ରୂପ ଦେବା ପାଇଁ ରାଜ୍ୟ ସରକାର ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛନ୍ତି। ଏଥିମଧ୍ୟରେ ଖାନ୍ନଗରଠାରେ ପ୍ରସ୍ତାବିତ ନେତାଜୀ ବସ୍ ଟର୍ମିନାଲ ପାଇଁ ସମସ୍ତ ମନ୍ଦିର ଏବଂ ଶବଦାହ କେନ୍ଦ୍ର ଉଚ୍ଛେଦ କରାଯିବ। ସେହିପରି ଜନସାଧାରଣଙ୍କ ପ୍ରବେଶ ଓ ପ୍ରସ୍ଥାନ ନିମନ୍ତେ ବ୍ୟବସ୍ଥା ହେବ। ଉକ୍ତ ଅଞ୍ଚଳରେ କଟକ ମହାନଗର ନିଗମ(ସିଏମ୍ସି) ଅଧୀନରେ ଥିବା ସରକାରୀ ଗୃହ, ବାସଗୃହ, ମାଇକ୍ରୋ କମ୍ପୋଷ୍ଟିଂ କେନ୍ଦ୍ର, ରାତ୍ର ଆଶ୍ରୟସ୍ଥଳକୁ ୧ ମାସ ମଧ୍ୟରେ ସ୍ଥାନାନ୍ତର କରାଯିବ। ଏହାପରେ ସମଗ୍ର ପ୍ରସ୍ତାବିତ ବସ୍ଷ୍ଟାଣ୍ଡ ଅଞ୍ଚଳକୁ ପାଚେରି ନିର୍ମାଣ କରି ଆବଦ୍ଧ ହେବ। ସେହିପରି ପ୍ରେସ୍ ଛକଠାରୁ ଖାନ୍ନଗର ରିଂରୋଡ ସମ୍ପ୍ରସାରଣ ନିମନ୍ତେ ପ୍ରସ୍ତୁତ ନକ୍ସା ଚୂଡାନ୍ତ କରିବାକୁ ଆର୍ଡିସି ସାମଲ ପୂର୍ତ୍ତ ଅଧିକ୍ଷଣ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହିତ ତାଳଦଣ୍ଡା କେନାଲ କାର୍ଯ୍ୟ, ନିକଟସ୍ଥ ରେଭେନ୍ଶା ବିଶ୍ୱବିଦ୍ୟାଳୟ ଓ ଜନସ୍ବାସ୍ଥ୍ୟ ବିଭାଗର ଜମି ଅଧିଗ୍ରହଣ କାର୍ଯ୍ୟକୁ ତ୍ୱରାନ୍ବିତ କରିବାକୁ ଆର୍ଡିସି ସାମଲ କହିଥିଲେ। କେନାଲ ନିକଟସ୍ଥ ବସ୍ତିବାସିନ୍ଦାଙ୍କୁ ଚାଉଳିଆଗଞ୍ଜ ଓ ନୂଆପଡ଼ା ଅଞ୍ଚଳରେ ଥଇଥାନ କରିବାକୁ ବୈଠକରେ ନିଷ୍ପତ୍ତି ହୋଇଥିଲା। ଏହି ବୈଠକରେ ଜିଲାପାଳ ଭବାନୀ ଶଙ୍କର ଚୟନୀ, ସିଏମ୍ସି କମିଶନର ଅନନ୍ୟା ଦାସ, ଡିସିପି ପ୍ରତୀକ୍ ସିଂଙ୍କ ସମେତ
ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
