ରଘୁନାଥପୁର,୨୪ା୬(ଡି.ଏନ୍.ଏ.): ଅସରାଏ ବର୍ଷାରେ ରଘୁନାଥପୁର ବ୍ଲକ ତାରପୁର ବାଇପାସ ରାସ୍ତାର ଅବସ୍ଥା ବେହାଲ ହୋଇଯାଉଛି। କିଛି ବ୍ୟବସାୟୀ ସରକାରୀ ଜମିକୁ ମାଡିବସି ଜଳ ନିଷ୍କାସନ ପଥକୁ ସଙ୍କୁଚିତ କରିଦେଇଥିବାରୁ, ଆବଶ୍ୟକ ସମୟରେ ବର୍ଷାଜଳ ନିଷ୍କାସିତ ହୋଇପାରୁ ନାହିଁ। ଫଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହେଉଛି। ଏହାଛଡା ପୂର୍ତ୍ତ ଓ ଗୃହ ବିଭାଗ ଅଧୀନରେ ଥିବା ସର୍ବସାଧାରଣ ରାସ୍ତା ପାର୍ଶରେ ଜନୈକ ବ୍ୟବସାୟୀ ଦୀର୍ଘଦିନ ଧରି ବିପୁଳ ପରିମାଣରେ ବାଲି ଗଦା କରି ରଖିଥିବାରୁ ଜଳ ନିଷ୍କାସନରେ ପ୍ରତିବନ୍ଧକ ସୃଷ୍ଟି କରୁଛି। ଫଳରେ ଦୈନଦିନ ଏହି ବାଇପାସ ରାସ୍ତା ଦେଇ କଟକ, କେନ୍ଦ୍ରାପଡା, ଯାଜପୁର ଓ ଜଗତସିଂହପୁର ଜିଲାକୁ ଯାଉଥିବା ହଜାର ସଂଖ୍ୟକ ଲୋକେ ପାଣିରେ ପଶି ଯିବାକୁ ବାଧ୍ୟ ହେଉଛନ୍ତି। ଏପରିକି ଜମିରହିଥିବା ପାଣି ଭିତରେ ରାସ୍ତାର ସ୍ଥିତି ଜାଣିନପାରି ଅନେକ ବାଇକ ଚାଳକ ଦୁର୍ଘଟଣାରେ ସମ୍ମୁଖୀନ ହେଉଛନ୍ତି। ଆଗାମୀ ଦିନରେ ଲଗାଣ ବର୍ଷା ହେଲେ ବାଇପାସର ଅବସ୍ଥା ସଙ୍ଗିନ ହୋଇପଡିବ। ଦୋକାନ ବଜାର ସହ ବାଇପାସକୁ ଲାଗି ରହିଥିବା ୧ନଂ ୱାର୍ଡ ମଧ୍ୟ ଜଳାର୍ଣ୍ଣବ ହୋଇଯିବାର ଆଶଙ୍କାକୁ ଏଡ଼ାଇ ଦେଇ ହେବନି। ଏଣୁ ଜଳ ନିଷ୍କାସନ ପଥକୁ ମୁକ୍ତ କରିବା ସହ ଗଦାହୋଇ ରହିଥିବା ବାଲିକୁ ତୁରନ୍ତ ହଟାଇବା ନିମନ୍ତେ ସ୍ଥାନୀୟ ଅଧିବାସୀଙ୍କ ପକ୍ଷରୁ ଜିଲାପାଳ ଓ ଆରଡିସିଙ୍କ ଦୃଷ୍ଟି ଆକର୍ଷଣ କରାଯାଇଛି। ଏନେଇ ପଦକ୍ଷେପ ନିଆନଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ସ୍ଥାନୀୟ ଲୋକେ ଚେତାବନୀ ଦେଇଛନ୍ତି।
